ګاونډیو ته له افغانستان څخه د ترهګرۍ زیاتیدونکې ګواښ

په وروستیو کې د داعش ډلې ومنله چې د افغانستان له خاورې یې پر تاجکستان راکټونه توغولي دي. دې کار د منځنۍ اسیا په دې هېواد کې د افغانستان څخه د ورپېښ امنیتي خطر په اړه اندېښنې زیاتې کړې دي. د افغانستان بل ګاونډي هېواد پاکستان هم پرلپسې د پاکستاني طالبانو له هغو بریدونو شکایت کوي چې د دوی په وینا له افغانستان څخه ور اوړي. وروستیو پېښو په افغانستان کې د واکمنو طالبانو د هغې ژمنې په اړه پوښتنې پیدا کړي چې وايي د افغانستان خاوره به د چا پر ضد کارولو ته پرې نه ږدي. ددې اونۍ په مثلث کې په همدې غږیدلي یوو چې له افغانستان څخه دا مهال ګاونډیو هېوادونو په ځانګړې توګه تاجکستان او د منځنۍ اسیا نورو هېوادونو ته پېښ امنیتي ګواښ څومره جدي دي. په دې مثلث کې د د ازادي راډیو له تاجیکي څانګې څخه مومن احمدي، د مشال راډیو څخه اسرار عالم او له ازادي راډیو څخه احمد شیبر خپل معلومات شریکوي.