د لاسرسۍ وړ لېنکونه

تازه خبر
جمعه ۳۰ غویی ۱۴۰۱ کابل ۰۱:۴۰

ټولنیزو رسنیو کې د وسله‌والو له‌خوا د موسیقۍ الو د ماتولو وېډیو غبرګونونه راپارولي


ارشيف، د موسيقۍ الات-انځور تزئیني بڼه لري.

په ټولنیزو رسنیو کې د ځینو بې‌‌یونفورمه وسله‌والو له‌خوا د الله اکبر په ویلو سره په ډبرو د موسیقۍ د الو د ماتولو خپره شوې وېډیو، د یو شمېر سندرغاړو او عام افغانانو له غبرګون سره مخ شوې.

خو وېډيو کې دا نه‌ښيي چې کله او چېرې ثبت شوې ده.

دا کار د افغانستان د سندرغاړو او هنرمندانو له غبرګون سره مخ شوی دی.

افغان سندرغاړی زر ولي افغان غږ وایي د دې وېډیو په لیدلو سخت خواشینی شوی.

دی زياتوي: "که تاسو موسیقي واخلئ، فرهنګ واخلئ او کلتور واخلئ، نور هېڅ داسې څه نه‌شته چې په دنیا کې د دوی پېژندګلوي وشي چې دا کوم قوم دی، ځکه موسیقي د فرهنګ یوه برخه ده او موسیقي فرهنګ او کلتور مخ ته وړي."

د کونړ ولايت سيمه‌ييز سندرغاړی شفیع‌الله بیا وايي: "دا د ټولو هنرمندانو لپاره یوه صدمه ده، ځکه موږ د افغانستان یو جز او یو فرد یو او دا د افغانستان هنري تاریخ ته یوه لویه صدمه ده."

یو افغان سندرغاړی صفدر توکلي
یو افغان سندرغاړی صفدر توکلي

دا وېډیو له تېرو دوو ورځو راهیسې په ټولنیزو رسنیو کې لاس په لاس کېږي، د دغه رسنیو ډېری کاروونکو په دې اړه نیوکې کړې دي.

په ورته وخت کې د کابل ښار یو شمېر اوسېدونکي هم دا عمل سم نه‌بولي.

له دې ډلې هادي ازادي راډیو ته وویل: "د افغانستان موسیقي ته سپک کتل خپل ځان ته سپک کتل دي، د افغانستان موسیقي ته سپک کتل د افغانستان دود او کلتور ته سپک کتل دي."

په ورته وخت کې یو شمېر افغان سندرغاړي چې نه‌غواړي نومونه‌يې واخیستل شي ازادي راډیو ته د ځینو تصویرونو په لېږلو سره ادعا کوي چې افغانستان کې د طالبانو له بیا ځلې حکومت وروسته د دې حکومت یو شمېر ځواکونو د دوی دفترونو باندې برید کړی او د دوی د موسیقۍ وسایل‌یې ویجاړ کړي دي.

هڅه مو وکړه د دې دواړو موضوعاتو په اړه د طالبانو نظر هم ترلاسه کړو، خو د دې راپور تر خپرېدو پورې په دې کار بریالي نه‌شوو.

د طالبانو حکومت ویاند او د اطلاعاتو او فرهنګ وزارت مرستیال ذبیح‌الله مجاهد
د طالبانو حکومت ویاند او د اطلاعاتو او فرهنګ وزارت مرستیال ذبیح‌الله مجاهد

خو پر ټولنيزو رسنيو د خپرې شوې وېډيو په اړه د طالبانو حکومت ویاند او د اطلاعات او کلتور وزارت مرستیال ذبیح‌الله مجاهد وایي په دې تړاو یې پلټنې پیل کړي چې ایا دغه کار د دوی د کسانو له‌خوا شوی او که نه.

دا په داسې حال کې ده چې تازه د طالبانو د امر‌ بالمعروف او نهي عن‌المنکر وزارت موټر چلوونکو ته لارښوونه کړې چې له دې وروسته دې په موټر کې موسیقي نه‌اوري او دا خبره د دغه وزارت وياند عاکف مهاجر ازادي راډیو سره په خبرو کې تأييد کړې هم وه.

XS
SM
MD
LG