طالب چارواکي هغه راپورونو غوسه کړي چې ګنې امریکا او پاکستان پر دې هوکړه کوي چې د متحده ایالاتو هوايي او استخباراتي دستګاوې د پاکستان له خاورې په ګټې اخیستنې سره، افغانستان کې عملیات وکولای شي.
د طالبانو حکومت دغو راپورونو ته په اشارې وايي، که داسې یوه هوکړه وشي، پایلې بهیې د هېڅچا په ګټه نهوي. د دوی په وینا، پر افغان خاوره هېڅوک د برید اجازه نهلري.
سياېناېن د شنبې په ورځ یوه راپور کې د یو شمېر امریکايي چارواکو له قوله ولیکل، امریکا او پاکستان پر دې موضوع هوکړې ته نږدې شوي چې امریکايي الوتکې د پاکستان له حریم په افغانستان کې هوايي او اطلاعاتي عملیات کولای شي.
هغه څه چې پاکستان هم اوس او هم په تېره کې رد کړي دي.
د طالبانو د حکومت د رسنیز ټیم غړي بلال کریمي ازادي راډیو ته وویل: "فکر کوم دا خبره پاکستاني چارواکو رد کړې، خو که بیا هم داسې کومه خبره وي د هېڅچا په ګټه نهده. افغانستان د افغانانو کور او ملکیت دی، ځمکه او فضا یې د افغانانو ده. که بیا هم په نظر کې نیول کېږي، پایلې بهیې نه د افغانانو او نه هم د هغه چا په ګټه وي چې تجاوز کوي."
پاکستاني چارواکو هم پرون رسنیو ته وویل، تر اوسه د پاکستان له خاورې په افغانستان پوځي عملیاتو ته د اجازې په اړه هوکړې نهده شوې.
د پاکستان د اطلاعاتو د وزیر فواد چوهدري له قوله، امریکا د افغانستان په اړه خپله تګلاره لري، خو دوی یې له ترهګرۍ سره د مبارزې په برخه کې پوره ملګري دي.
امریکا هم په افغانستان کې هوايي عملیات د ترهګرۍ د ځپلو په هدف کوي.
په افغانستان د طالبانو له واکمنېدو وروسته امریکايي چارواکو په ځلونو په دې هېواد کې د ترهګرو ډلو په ځانګړي ډول د داعش او القاعده د بیا فعالېدو په اړه اندېښنه ښودلې.
امریکا اوسمهال په افغانستان کې د ترهګرۍ ضد عملیات له قطر رهبري کوي چې وروستیو کې یې یو شمېر د بېپیلوټه الوتکو بریدونه هم کړي.
تر خوا یې د افغانستان په فضا د امریکايي جنګي جېټ الوتکو پروازونه شوي چې د طالبانو غبرګونیې هم لاره.
طالبانو نږدې ۳ اوونۍ وړاندې د امریکا هوايي الوتنې د افغانستان په هوايي حریم تېری وباله او د سمدستي بندېدو غوښتنهیې وکړه.
په ورته وخت کې یو شمېر شنونکي وايي، پاکستانی حکومت په کور دننه او نړیواله کچه تر سخت فشار لاندې دی او مجبور دی چې د بهرني فشار د کمېدو لپاره د امریکا غوښتنه ومني.
شنونکي شفیق همدم ازادي راډیو ته وویل، پاکستان وړاندې هم خپله خاوره د افغانستان پر ضد کارولې او بیا به هم امریکا ته د دې کار اجازه ورکړي.
همدم زیاتوي: "پاکستان ته دا مهمه نهده چې په افغانستان څوک واکمن دي، بلکې دا ورته مهمه ده چې له کومې برخې ګټه ور رسېږي. زما په اند له پاکستان د ښه ګاونډیتوب تمه لوی حماقت دی."
د جون په ۱۸مه د پاکستان صدراعظم عمران خان د اکسیو اېناېچبياو ټلوېزیون سره مرکه کې وویل، هېڅکله به په افغانستان کې د عملیاتو لپاره امریکا ته د پاکستان خاوره په واک کې ورنهکړي.
د پاکستان د بهرنیو چارو وزیر شاه محمود قریشي هم په ډېرو مرکو کې دا خبره تکرار کړې ده.
دا په داسې حال ده چې پرون د افغانستان د دفاع سرپرست وزیر ملا محمد یعقوب هم وویل، اجازه به ورنهکړي چې د افغانستان خاوره د چا په ضد وکارول شي، خو له ګاونډیانو هم د ښو اړیکو هیله لري.
