مسکو د چهارشنبې په ورځ «۱۴۰۰ کال د تلې ۲۸» د افغانستان په اړه د یوې غونډې کوربه دی.
دغې غونډې ته د طالبانو، امریکا، چین او پاکستان استازي وربلل شوي دي.
طالبانو د افغانستان په اړه د مسکو په راتلونکې غونډه کې خپل ګډون تأیید کړ.
طالبان وايي د دوی د رئیسالوزرا د مرستیال عبدالسلام حنفي په مشرۍ یو پلاوی به په دې غونډه کې د دوی په خبره د افغانستان استازیتوب وکړي.
د طالبانو د حکومت ویاند او د اطلاعاتو او کلتور وزارت مرستیال ذبیحالله مجاهد پرون ماښام د مسکو په غونډه کې د طالبانو د پلاوي د ګډون په اړه ازادي راډیو ته وویل: "د اسلامي امارت یو پلاوی چې مشري یې د رئیسالوزرا مرستیال مولوي عبدالسلام حنفي کوي، د مسکو په کنفرانس کې ګډون کوي او د افغانستان استازیتوب به وکړي."
تر دې وړاندې د افغانستان لپاره د روسیې د ولسمشر ولادیمیر پوتین ځانګړي استازي ضمیر کابلوف د مسکو په غونډه کې د طالبانو د پلاوي ګډون تأیید کړی و، خو دا یې نهو ویلي چې په پلاوي کې څوک شامل دي.
د متحده ایالاتو، چین او پاکستان استازي به په غونډه کې برخه واخلي، مګر روېټرز راپور ورکړ چې مسکو د هند او ایران له استازو هم غوښتي و چې دې غونډې ته ورشي.
روسي رسنیو د ضمیر کابلوف په حواله لیکلي چې د افغانستان په اړه د مسکو له غونډې یوه ورځ مخکې، د متحده ایالاتو، چین، روسیې او پاکستان استازي به په یوه لومړنۍ غونډه کې سره وویني چې د هغه په وینا هڅه کېږي د افغانستان د وروستیو تحولاتو په اړه یوه ګډ درېځ ته ورسېږي.
تر دې مخکې راپور ورکړل شوی و چې د ملي مصالحې عالي شورا رئیس عبدالله عبدالله او پخوانی افغان ولسمشر حامد کرزی هم په مسکو کې د چهارشنبې غونډې ته وربلل شوي وو.
خو باختر خبري اژانس په کابل کې د روسیې د سفارت په حواله د عبدالله عبدالله او حامد کرزي بلنه رد کړې او ویلي یې دي چې د دوی نومونه د ګډونوالو په لېست کې نهدي شامل.
تېره مارچ میاشت کې هم مسکو د افغانستان په اړه د یوه نړیوال کنفرانس کوربه و چې پهکې د روسیې، چین او پاکستان استازو یوه ګډه اعلامیه خپره کړه او په جګړه کې پر ښکېلو خواوو یې غږ وکړ چې د سولې یوې موافقې ته ورسېږي او تاوتریخوالی پرېږدي.
په هغې اعلامیه کې دا هم ویل شوي و چې د ملګرو ملتونو د امنیت شورا د ۲،۵۱۳ شمېره پرېکړهلیک له مخې، متحده ایالات، روسیه، چین او پاکستان به په افغانستان کې د اسلامي امارت د بیا راژوندي کېدو ملاتړ ونهکړي.
په مسکو کې راروانه غونډه داسې وخت پلان شوې چې طالبان په افغانستان کې واک ته رسېدلي او د سراسري امنیت د ټینګښت په ادعا سره سره د طالبانو حکومت د داعش لهخوا د مرګونو بریدونو له ګواښ سره مخ دی.
د طالبانو په بیا واکمنېدو سره داعش په افغانستان کې د لږ تر لږه درېیو لویو خونړیو بریدونو مسؤلیت منلی دی.
تر ټولو وروستۍ خونړۍ حمله په کندهار کې د شیعهګانو په جامع جومات د جمعې د لمانځه پر مهال ځانمرګي بریدونه وو چې په نتیجه کې یې ۴۷ کسان وژل شوي او شااوخوا ۷۰ نور ټپیان دي.
د چاودنې شدت او د ټپيانو زیات شمېر ته په کتو د وژل شویو په ارقامو کې د بدلون وېره هم ښودل شوې وه.
تر دې برید یوه اوونۍ مخکې په کندز کې د شیعهګانو یو جومات تر برید لاندې راغی چې ۵۰ کسان پهکې ووژل شول او ۱۵۰ نور ټپیان شول.
د کابل د هوایي ډګر د اګسټ د ۲۶مې خونړۍ حمله هم د یادونې ده چې پهکې تر ۱۸۰ زیات کسان ووژل شول او سلګونه نور ټپيان شول.
د دغو ټولو بریدونو مسؤلیت د داعش یا اسلامي دولت ډلې خراسان څانګې منلی دی.
هغه ډله چې طالبان وايي په وړاندې یې برلاسي دي او د ځپلو توانیې لري.
د داعش دغو وروستیو بریدونو او فعالیت ته په کتو روسیه دا مهال په افغانستان کې د داعش د فعالیت د پراخېدو او د منځنۍ اسیا هېوادونو ته د ګواښ په اړه اندېښنه لري.
د روسیې ولسمشر ولادیمیر پوتین تېره چهارشنبه وویل چې داعش ډله له سوریې او عراق څخه افغانستان ته د عملیاتي تجربې لرونکي جنګیالي لېږدوي.
خو طالبانو دغه موضوع نهده منلې.
