د ناټو عمومي منشي ینس سټولټنبرګ یو ځل بیا له افغانستان سره د دې پوځي تړون د ملاتړ ټینګار وکړ.
ښاغلی سټولټنبرګ وايي، دا پوځي تړون پلان لري چې د افغانستان امنیتي ځواکونو ته له دې هېواد څخه بهر روزنه ورکړي.
ینس سټولټنبرګ د جمعې په ورځ په پاریس کې د فرانسې له ولسمشر امانوئل مکرون سره په یوه ګډه خبري غونډه کې وویل، په افغانستان کې د ناټو د ځواکونو د حضور په پای ته رسېدو یو نوی فصل پرانیستل کېږي.
هغه زیاته کړه: "د ناټو راتلونکی ملاتړ به پر درې اصلي محورونو راڅرخي. لومړی موږ پلان لرو چې د سلا مشورو ورکولو او وړتیاوو رامنځته کولو په برخو کې د افغانستان د امنیتي ځواکونو ملاتړ وکړو او همدارنګه د دې هېواد له امنیتي ځواکونو دوامداره مالي ملاتړ چمتو کړو. دوهم نیت لرو چې پر ځانګړو ځواکونو پر تمرکز د افغانستان څخه بهر دوی ته پوځي روزنه ورکړو او درېیم دا چې موږ د کابل د هوايي ډګر د فعالیت په شمول د خدمتونو د وړاندې کولو لپاره د بودجې په برابرولو د پلان جوړولو په حال کې یوو."
تر دې مخکې د امریکا د لوی درستیزانو د کمېټې مشر جنرال مارک میلي د مې میاشتې په شپږمه نېټه ویلي وو، په نورو هېوادونو کې د افغان امنیتي ځواکونو د روزنې په اړه غور کوي. ناټو په ۲۰۱۴ م کال کې افغانستان خپل جګړهییزه مأموریت پای ته ورساوه او د غوڅ ملاتړ ملاتړ مأموریتیې پیل کړ چې په ترڅ کې یې افغان ځواکونو ته روزنه او سلا مشورې ورکولې.
په اپرېل میاشت کې د امریکا ولسمشر جو بایډن له اعلان سره هم مهاله د ناټو پوځي تړون هم اعلان وکړ چې سرتېري بهیې د سپټمبر تر ۱۱مې نېټې له افغانستان څخه ووځي.
له افغانستان څخه د ناټو تر مشرۍ لاندې د ټولو سرتېرو د وتلو بهیر د مې په لومړۍ نېټه پیل شوی دی.
ناټو په خپل وېبپاڼه کې په یوه اعلامیه کې ویلي چې سټولټنبرګ او مکرون د ناټو د راتلونکې سرمشریزې، په افغانستان او عراق کې له ترهګرۍ سره په مبارزې او ځینو نورو مسئلو هم خپلو کې خبرې کړې دي.
ټاکل شوې ده د ناټو د مشرانو غونډه د جون په ۱۴مه نېټه جوړه شي.
