پر غزې د اسرائیل د هوايي حملو په لړ کې پرون شنبه هغه دنګه ودانۍ ویجاړه شوه چې د اسوشیټډ پرس خبري اژانس، الجزیرې او نورو رسنیو دفترونه پهکې وو.
اسرائیل د لبنان په سرحد کې، دغهراز د عرب او یهودو له خپلمنځي ناکراریو سره جوخت پرون د ورځې په لومړیو کې پر غزې تړانګې خپلې حملې لا سختې کړې.
بلخوا د فلسطین د حماس ډلې ملېشهوو هم د پنځمې شپې په مخه د اسرائیل پر لوري د راکټونو توغولو ته دوام ورکړ.
فلسطیني ډاکټران وايي، پر غزې په تازه هوايي حملو کې ګڼو کسانو ته مرګ ژوبله اوښتې ده.
د غزې یوه اوسېدونکي احمد یعقوبي پرون د یوې نړېدلې ودانۍ په ویجاړیو کې د پلټنې پر مهال روېټرز خبري اژانس ته وویل: "په دې ویجاړ شوي کور کې نږدې ۱۰ کسان چې اتهیې ماشومان، یوهیې مور او یو پلار و، اوسېدل. د ماشومانو عمرونه د ۸ او نهو کلونو ترمنځ وو. دا یوه پلان شوې او منظمه وژنه ده. دا جنایتکارانه عمل چې په هېڅ ډول نهشي توجیه کېدلای، نهمنونکی او غیر انساني کار دی."
د اسرائیل پوځ وايي، د افراطي وسلهوالو څو کیلومتره سمڅه، نور سنګرونه او د وسلو د تولید مرکزونهیې ویشتلي چې د راکټي حملو د هڅې مخهیې ونیول شي.
د اسرائیل په شمالي سرحد کې یوه ډله لبناني او فلسطیني اعتراض کوونکو سرحدي کټارې ویجاړې کړې او د لنډې شېبې لپاره اسرائیل ته ننوتل.
په لبنان کې ایران پلوه حزبالله ډلې ویلي چې یو غړی یې په روغتون کې مړ شوی دی.
د لبنان یوې امنیتي سرچینې او محلي رسنیو ویلي، د لبنان دوه اعتراض کوونکي د اسرائیلي ځواکونو د ډزو په نتیجه کې مړه شوي دي.
په ختیځ بیتالمقدس کې د روانې میلادي میاشتې په لومړیو کې د کړکېچ تازه لړۍ وروسته له هغې پیل شوه چې د اسرائیل پولیسو په زاړه ښار کې له الاقصی جومات څخه چې مسلمانان او اسرائیلیانیې دواړه درناوی کوي، د فلسطینیانو د اخراج اقدام وکړ.
وروسته افراطي ډلې حماس چې پر غزې تړانګې واکمنه ده، الاقصی جومات ته څېرمه د فلسطینیانو په وړاندې د اسرائیل د پولیسو د چلند په عکسالعمل کې پر اسرائیل راکټي حملې پیل کړې.
د دې شخړې د مخنیوي لپاره تر اوسه د منځګړیتوب لپاره نړیوالو هڅو کومه نتیجه نهده ورکړې.
په پام کې ده نن یکشنبه د ملګرو ملتونو امنیت شورا په غزې تړانګه کې د روان وضعیت په اړه بحث وکړي.
په همدې حال کې پرون د لندن په مرکزي برخه کې په زرګونه کسانو په یوه مظاهره کې د بریتانیا له حکومته غوښتنه وکړه چې د فلسطینیانو او اسرائیل ترمنځ د روانې خونړۍ شخړې د ختمېدو لپاره بېړنی اقدام وکړي.
