د اسرایلو او حماس وسله والې ډلې ترمنځ بېګا د جګړې پنځمه شپه وه. د فلسطین روغتیایي چارواکو ویلي، د شپې پرمهال د غزې په شمال کې د هوایي بریدونو له کبله لږ تر لږه ۱۲ تنه وژل شوي.
پرون هم فلسطیني چارواکو وویل چې په لویدیځه غاړه کې د اسراییلي پولیسو او فلسطیني مظاهره کوونکو ترمنځ اخ او ډب کې ۱۱ تنه وژل شوي او پنځوس نور په ربړۍ او اور غورځونکو ګولیو ټپيان شوي دي.
د شپې په اوږدو کې د اسراییل په دوو لویو جنوبي ښارونو کې د خطر زنګونه وهل کېدل او د حماس له خوا د توغندیو د ویشتلو خبرداری یې ورکاوه.
د مې له لسمې راهیسې تراوسه په غزه کې ۱۳۲ تنه وژل شوي چې ۳۲ ماشومان او ۲۱ مېرمنې په کې دي.
فلسطیني رسنیو ویلي، دغو جګړو کې ۹۵۰ تنه ټپيان شوي هم دي.
د اسراییل لوري ته یوازې د ۸ کسانو د وژل کېدو راپورونه خپاره شوي دي.
پرون د اسراییل په پراخو هوایي بریدونو کې هغه تونل ویجاړ شوی چې د اسراییلي چارواکو په خبره حماس ډلې په کې تګ را تګ درلود او توغندي یې لېږدول.
د اسراییل په شمالي پوله کې سرتیري هغه مهال ډزو ته اړ شول چې د لبناني او فلسطیني مظاهره کوونکو یوې ډلې د سرحد کټاره ماته کړه او د لنډې مودې لپاره د اسراییل خاورې ته ننوتل.
ایران پلوه حزب الله ډلې ویلي، د دوی یوه غړي په روغتون کې سا ورکړې ده.
د اسراییلي ځواکونو د دغو ډزو له کبله یو ټپي شوي لبنانی هم مړ شوی دی.
د ګاونډي سوریې له خوا هم د اسراییلو پر لور درې توغندي ویشتل شوي دي، خو دا بېرته د سوریې په خاوره او یا هم شاړو ځمکو کې لګیدلي دي.
سملاسي نه ده تایید شوې چې دا توغندي چا توغولي دي؟
په ختیځ بیت المقدس کې دا شخړې د اقصا جومات پرسر او دغلته په احتمالي ډول د فلسطینیانو د تخلیې پر سر پيل شوي دي.
د اسراییل او فلسطین ترمنځ د ارامۍ نړیوالې هڅې تراوسه په ظاهره بریالۍ نه بریښي.
د امریکا یو لوړپوړی ډیپلومات تل ابیب ته رسیدلی چې له اسراییلي او فلسطیني چارواکو سره وګوري.
واشنګټن او د نړۍ یو شمېر نور هېوادونه هڅه کوي د دوو هېوادونو ترمنځ دا جګړه چې له ۲۰۱۴ کال راهیسې تر ټولو سخته بلل شوې، و دروي.
