پاکستان د افغانستان د سولې لپاره د امریکا نوې طرح هر اړخیزه بولي او وايي چې په ترکیه او روسیه کې د افغانستان د سولې په اړه د بحث لپاره د جوړېدونکو غونډو هرکلی کوي.
په کابل کې د پاکستان سفیر منصور احمد خان له ازادي راډیو سره په مرکه کې وویل، هغه پروسه چې متحده ایالاتو یې طرح د راروانو څو اوونیو او میاشتو په مخه چمتو کړې، هدفیې د سیاسي حللارې پرمختګ دی، خو ښاغلي خان په عین حال کې د سولې په مذاکراتو کې د افغانستان د جګړې د ښکېلو کورنیو اړخونو ونډه ټاکونکې او مهمه وبلله.
ښاغلی احمد خان زیاتوي: "موږ باور لرو چې دا طرح د بینالافغاني خبرو لپاره یو هر اړخیز چوکاټ لري، خو دا چې په دې طرحو کې د افغانستان د سیاسي راتلونکې، سیاسي جوړښت او د یوه هر اړخیز او دایمي اوربند له لارې د جګړې د پای ته رسولو لپاره کومه د لارې نقشه وړاندې کېږي، پر دې ټولو باید په بینالافغاني خبرو کې موافقه وشي."
منصور احمد خان وویل چې پاکستان په تېرو ۴۰ کلونو کې نهیوازې د طالبانو، بلکې د ټولو افغانانو مېلمه پالنه کړې ده، خو هغه ټینګار وکړ چې اسلاماباد پر طالب مشرانو هومره نفوذ نهلري چې فشار پرې راوړي.
د پاکستان سفیر وايي چې د افغانستان د سولې په اړه د بحث لپاره په ترکیه او روسیه کې په راروانو غونډو کې پاکستان ته هم بلنه ورکړل شوې ده او یادونهیې وکړه چې هېواد بهیې په ډېره لېوالتیا برخه پهکې واخلي.
په داسې حال کې چې په ترکیه او روسیه کې د غونډو د جوړېدو بحثونه تاوده دي، پخواني ولسمشر حامد کرزي د دې غونډو لپاره د جدي تیاریو غوښتنه کړې.
ښاغلي کرزي پرون پنجشنبې له اسوشیټډ پرس خبري اژانس سره په ځانګړې مرکه کې همداراز وویل د افغان حکومت او طالبانو ترمنځ خبرې باید دوام وکړي څو ښکېل اړخونهیې نتیجه د استانبول په غونډه کې، که څه هم دقیقه نېټهیې تر اوسه نهده روښانه شوې وویني، خو پخواني ولسمشر په عین حال کې پر نړیوالې ټولنې هم غږ وکړ چې په افغانستان کې د خپل پوځي حضور د پای ته رسولو یا دوام په برخه کې مسؤلانه پرېکړې وکړي.
ښاغلی کرزی وايي: "دا د امریکا او د متحدانو لپارهیې چې په تېرو ۲۰ کلونو کې په افغانستان کې ښکېل وو، خورا زیاته مهمه ده چې مسؤلانه عمل وکړي، نو د افغانستان د سولې لپاره مسؤلانه وتل او مسؤلانه پاتې کېدل، هغه مسایل دي چې موږ باید د افغانستان د خلکو اړتیاوو ته په پام سره په دقت سره غور پرې وکړو."
په همدې حال کې د امریکا د بهرنیو چارو وزیر وايي، متحده ایالات غواړي چې په افغانستان کې د سولې د ټینګښت په هڅو کې د افغانستان د ګاونديو هېوادونو او ملګرو ملتونو ونډه پراخه شي، خو انتوني بلېنکن دا یادونه هم کړې چې امریکا تر دې دمه له افغانستانه د خپلو پوځي ځواکونو د ایستلو په برخه کې وروستۍ پرېکړه نهده کړې.
