د لاسرسۍ وړ لېنکونه

تازه خبر
پنجشنبه ۲۶ وری ۱۴۰۰ کابل ۰۸:۴۰

امریکايي سناتور جک رید افغانستان کې د امریکايي پوځیانو د حضور د تمدید اټکل کړی


ارشیف، په افغانستان کې امریکايي سرتیري

د امریکا متحدو ایالاتونو د مشرانو جرګې د پوځي خدماتو کمېټې مشر وايي، دی په افغانستان کې تر مې میاشتې وروسته هم د امریکايي پوځیانو د حضور د تمدید اټکل کوي.

سناتور جک رید (Sen. Jack Reed) پرون چهارشنبه (د کب ۶مه) خبریالانو ته وویل: "اټکل کوم چې په لنډ مهال کې به په افغانستان کې د امریکايي ځواکونو حضور یو څه تمدید شي."

د هغې موافقې له مخې چې د ۲۰۲۰میلادي کال د فبروري پر ۲۹مه په دوحه کې د طالبانو او امریکا ترمنځ لاسلیک شوه، په پام کې وه ټول نړیوال ځواکونه د مې تر لومړۍ نېټې د طالبانو له خوا د ځینو ضمانتونو په بدل کې له افغانستانه ووځي.

د امریکا متحدو ایالاتونو د مشرانو جرګې د پوځي خدماتو کمېټې مشر سناتور جک رید
د امریکا متحدو ایالاتونو د مشرانو جرګې د پوځي خدماتو کمېټې مشر سناتور جک رید

د امریکا دفاع وزارت په دې وروستیو کې ویلي چې طالبانو د دوحې د موافقې پر اساس خپلې ژمنې نه دي پرځای کړي.

د تاوتریخوالي کمول، د القاعده په ګډون له نړیوالو تروریستي ډلو سره د اړیکو پرې کول او ځینې نور موارد هغه څه دي چې طالبان یې په نه مراعاتولو تورن شوي دي.

اوس د جو بایډن اداره د امریکا او طالبانو د موافقې بیا کتنه کوي، څو معلومه کړي چې طالبانو د اوربند او له افغان حکومت سره د بامفهومه خبرو پر ژمنو عمل کړی او که نه؟

بل خوا د جرمني د صدراعظمې انګېلا مېرکل کابینې پرون چهارشنبه نوې مسوده تصویب کړه چې جرمني پوځیانو ته لار هواروي د ۲۰۲۲میلادي کال د جنورۍ تر ۳۱مې په افغانستان کې پاتې وي.

جرمني دناټو په چوکاټ کې له امریکا وروسته زیات سرتیري لري
جرمني دناټو په چوکاټ کې له امریکا وروسته زیات سرتیري لري

جرمني د ناټو په چوکاټ کې د امریکا تر متحدو ایالاتونو وروسته زیات پوځیان لري.

دا مهال په افغانستان کې د قاطع ملاتړ ماموریت په چوکاټ کې د ناټو ۱۰،۰۰۰ پوځيان دېره دي چې په دې شمېر کې نږدې ۱۱۰۰ یې د جرمني دي.

تردې مخکې د چک جمهوریت چارواکو تېره سې شنبه ویلي وو، په افغانستان کې به خپل پوځي ماموریت ته دوام ورکړي.

د افغانستان د ملي دفاع وزارت مرستیال شاه محمود میاخېل د امریکا او د ناټو د غړو هېوادونو د وروستيو احتمالي پرېکړو په اړه محتاطانه عکس العمل وښود.

نوموړي وویل: "دا چې امریکا او د ناټو نور غړي هېوادونه افغانستان ته د ترورېزم پر وړاندې د مبارزې لپاره یوځای راغلي دي، طبعاً هره پرېکړه به په ګډه کوي. دا چې د امریکا نوې اداره د دوحې پر موافقه بیاکتنه کوي، نو د ناټو غړي هېوادونه هم په خپلو منځو کې د افغانستان د سولې له پروسې، امنیتي او دفاعي ځواکونو پر خپل ملاتړ او بامسوولیته وتلو باندې ټینګار کوي. له بده مرغه د طالبانو غلطه محاسبه د دې سبب شوه چې د سولې په خبرو کې ځنډ او خنډ راشي."

د افغانستان د ملي دفاع وزارت مرستیال شاه محمود میاخېل
د افغانستان د ملي دفاع وزارت مرستیال شاه محمود میاخېل

ښاغلی میاخېل وايي، طالبانو د جګړې له کبله امتیاز نه دی اخیستی، بلکې د سولې د خبرو له کبله یې یو هویت پیدا کړ او په کار ده، د سولې پر خبرو ډېر تمرکز وکړي.

د امریکا پخواني ولسمشر ډونالډ ټرمپ د خپلې واکمنۍ په وروستیو کې وویل چې په افغانستان کې یې د امریکايي پوځیانو شمېر ۲۵۰۰ ته راکم کړی چې دا له ۲۰۰۱میلادي کال راهیسې په افغانستان کې د امریکايي پوځیانو تر ټولو ټیټ شمېر دی.

د ناټو عمومي منشي ینس سټولټنبرګ تېره پنجشنبه د ناټو د دفاع د وزیرانو تر انلاین غونډې وروسته وویل، له افغانستانه د ناټو ځواکونو پر وتلو موافقه ونه وشوه.

ده وویل، ناټو تړون به د افغانستان د امنیتي او دفاعي ځواکونو ملاتړ ته دوام ورکړي.

XS
SM
MD
LG