د یمن لپاره د ملګرو ملتونو ځانګړی استازی مارتین ګریفیټس وايي، په یمن کې سخته قحطي ښايي هغه فرصت له ګواښ سره مخامخ کړي چې په دې هېواد کې د جګړې د ختمولو لپاره د امریکا د هڅو په پایله کې رامنځ ته شوی.
ښاغلي ګریفیتس پرون پنجشنبه (د سلواغې ۳۰مه) د ملګرو ملتونو د امنیت شورا په غونډه کې د وینا پر مهال همدا راز د یمن پر مارب ښار چې د حکومتي ځواکونو په ولکه کې دی، د حوثي یاغیانو د حملو د بندېدو غوښتنه هم وکړه.
نوموړي خبرداری ورکړ چې د سیمو د نیولو لپاره د زور کارول په یمن کې د سولې د ټینګښت لپاره هڅې له ګواښ سره مخامخ کولای شي.
هغه د جګړې پر ښکېلو خواوو غږ وکړ چې د هېواد په کچه پر یوه اوربند سره سلا شي، حدیده بندر ته د تېلو ټانکرونه او د اړتیا وړ په موادو بار نور موټر ور پرېږدي او د صنعا په هوايي ډګر کې نړیوالو تجارتي الوتنو ته اجازه ورکړي.
ګریفیټس د یمن لپاره د ملګرو ملتونو د ځانګړي استازي په توګه له ټاکل کېدو وروسته د لومړي ځل لپاره په روانه میاشت کې ایران ته- چې د حوثي یاغیانو په ملاتړ تورن دی سفر کړی و، خو په خپله وینا کې یې د دې سفر یادونه ونه کړه.
د امریکا ولسمشر جوبایډن د کار له پیله د یمن د جګړې پای ته رسول یو مهم لومړیتوب بللی، د یمن لپاره یې ځانګړی استازی وټاکه او په دې هېواد کې یې د سعودي عربستان له عملیاتو څخه د امریکا ملاتړ پای ته ورساوه.
ګریفیټس د امنیت شورا د ۱۵ غړو هېوادونو استازو ته په وینا کې زیاته کړه چې په یمن کې د جګړې د پای ته رسولو په برخه کې د نړیوالو ملاتړ اړین دی ځکه د خبرو له لارې د سوله ییز چاپېریال لپاره یو فرصت رامنځ ته کوي.
د ملګرو ملتونو د بشري مرستو مشر مارک لوکاک غونډې ته د وینا پرمهال وویل چې په یمن کې اوس مهال د دایمي سولې د ټینګښت لپاره یو مهم فرصت رامنځ ته شوی، خو هغه خبرداری ورکړ چې که په دې هېواد کې قحطي نوره هم پراخه شي نو دا فرصت به ضایع شي.
ښاغلي لوکاک وویل چې د یمن ۱۶ میلیون وګړي وږي دي او له دې ډلې پنځه میلیونه بیا له قحطۍ سره یوازې یو ګام واټن لري.
نوموړي زیاته کړه په یمن کې د بشري مرستو د عملیاتو لپاره څلور میلیارده ډالرو ته اړتیا لیدل کېږي.
د ملګرو ملتونو سرمنشي انتونیو ګوتېرېش، سویس او سویډن په پام کې لري چې د مارچ په لومړۍ نېټه د یمن لپاره د مالي مرستو د راجلبولو په مقصد د نړیوال کنفرانس کوربه توب وکړي.
ملګرو ملتونو د یمن کړکېچ د نړۍ تر ټولو لوی ناورین بللی. د دې سازمان له خوا ورکړل شوي ارقام ښيي چې د یمن په سلو کې اتیا وګړي بشري مرستو ته اړ دي.
دا کړکېچ په ۲۰۱۵ میلادي کال کې وروسته له هغه پراخ شو چې د سعودي په مشرۍ ائتلاف د ایران پلوو حوثي یاغیانو پرضد جګړه کې د حکومتي ځواکونو په ملاتړ پوځي مداخله وکړه.
د یمن روانې شپږ کلنې جګړې ته تر ډېره د ایران او سعودي عربستان ترمنځ د نیابتي جګړې په سترګه کتل کېږي.
