چارواکي وايي چې امنیتي ځواکونو د کندز ښار په شاوخوا کې تصفیوي عملیات پیل کړي دي.

د کندز د امنیه قوماندانۍ ویاند انعام‌الدین رحماني نن (یکشنبه) وویل، امنیتي او دفاعي ځواکونو د شینوارو، اندرابیانو او د شینوارو په چله مزار سیمو کې چې د ښار په پنځمه امنیتي حوزه کې دي، تلاشي او تصفیوي عملیات پیل کړي دي.

دا په داسې حال کې ده چې د کندز ښاریان وايي، د جګړې ډزې په کورونو کې اوري او د ناامنۍ له درکه اندېښمن دي.

خو د کندز د امنیه قوماندانۍ ویاند وايي چې د ښار شاوخوا ټول کلي به د دولت له وسله‌والو مخالفانو پاک شي.

د ده په وینا تېره شپه د لغمانیو او زرخرید په کلیو کې ۵ مشکوک طالبان له وسلو سره نیول شوي دي.

طالبانو په دې اړه تر دې دمه څه نه‌دي ویلي.

د افغانستان د کرکټ د ملي ټیم لوبغاړي په کابل او ننګرهار کې تمریني کمپونه او سیالۍ کوي.

د کرکټ د ملي ټيم مشر روزونکي ریچارډ پایبس په کابل کې یوې خبري ناستې ته وویل چې دا تمرینونه نږدې راتلونکي کې له هند سره د یوې ټیسټ او دریو یو ورځنیو لوبو د ښه چمتووالي لپاره کېږي.

ښاغلي پایبس وویل په اوسنیو تمرینو او سیالیو کې به د ټیم ټاکونکې ډله او لوبډلمشران لوبغاړي وڅاري او تر ټولو تکړه لوبغاړي به د هند لپاره انتخاب کړي.

د افغانستان د ټیسټ او یو ورځنیو لوبو کپټان حشمت الله شهیدي وویل لومړۍ اوونۍ په کابل او بیا وروسته ننګرهار کې لوبې او تمرینونه کېږي.

هغه زیاته کړه چې په دغو تمرینونو کې به په نیمګړتیاوو باندې ډېر کار وشي.

تمه ده د افغانستان د کرکټ ملي ټيم د جون په شپږمه له هند سره ټیسټ لوبه پیل کړي. د جون په ۱۴مه، ۱۷مه او ۲۰مه به درې یو ورځنۍ لوبې وکړي.

مشهوره هندۍ سندرغاړې آشا بهوسلي د ۹۲ کلونو په عمر مړه شوه.

د آشا زوی آنند بهوسلي د یکشنبې په ورځ رسنیو ته تایید کړه چې مور یې وفات شوې.

آشا بهوسلي له ۱۹۴۳ کاله کله چې یواځې نهه کلنه وه سندرې پيل کړې وې.

هغې په اتو لسیزو فعالیت سره څه باندې ۱۲زره سندرې ثبت کړې او اکثر خلک په تېره د بالیوود سینما مینه وال یې له غږ سره اشنا دي.

د آشا بهوسلي مشره خوره لتا منګیشکر د هند تر ټولو نامتو سندرغاړې وه.

د امریکا ولسمشر ډونالډ ټرمپ په اسلام اباد کې له ایراني پلاوي سره تر ناکامو مذاکراتو وروسته خبرداری ورکړی چې د هرمز تنګی محاصره کوو.

هغه نن پر خپلې سوشل پاڼې ټروت کې لیکي،" له همدې شیبې د امریکا سمندري ځواکونه په هرمز تنګي کې د کښتو هر ډول تګ راتګ محاصره کوي".

د ټرمپ په ټکو،"په مذاکراتو کې مهمه موضوع د ایران اټومي پروګرام و، چې هوکړه پرې ونه شوه".

هغه وړاندې وویل، د امریکا سمندري ځواکونو ته امر شوی چې "په نړیوالو اوبو کې هر هغه کښتۍ وپیژني او ودروي چې ایران ته مالیه ورکوي".

ولسمشر ټرمپ ژمنه وکړه چې په هرمز تنګي کې د ایران له خوا کرل شوي ماینونه به له منځه یوسي او په ټکو يې،" هر ایرانۍ چې پر موږ یا بلې ملکي کښتو ډزې وکړي له منځه به یوړل شي".

پاکستان پرون شنبې د ایران او امریکا ترمنځ د مذاکراتو کوربه و چې نن سهار بې پایلې پایته ورسیدې.

په افغانستان کې د ملګروملتونو مرستنیدونه ماموریت یوناما تایید کړه چې تېره جمعه په په هرات کې یوولس تنه ملکیان په ډزو سره وژل شوي.

یوناما یکشنبې په یوه اعلامیه کې ویلي "د جمعې په ورځ د هرات په انجیل ولسوالۍ کې پر ملکي شعیه ګانو د وسله والو په ډزو کې یوولس کسان وژل شوي او ۱۱ نور ټپیان شوي دي".

په اعلامیه کې راغلي،"په وژل شویو او ټپیانو کې ښځې او ماشومان هم شامل دي".

په افغانستان کې د ملګرو ملتونو د سرمنشي ځانګړې استازې جورجیټ ګاګنون ویلي،"موږ د دغې وحشتناکې غمیزې د قربانیانو کورنیو ته تسلیت وایو او ټپیانو ته روغتیا هیله کوو".

ګاګنون د طالبانو له حکومته د دې پېښې په اړه د څیړنو غوښتنه وکړه.

د طالبانو حکومت مخکې ویلي و چې په دې پېښه کې ۱۱ کسان وژل شوي او ۷ نور ټپیان دي.

تراوسه د دغه برید مسولیت چا یا کومې ډلې منلی نه دی.

د ایران د پارلمان مشر محمد باقر قالبیاف وايي،"امریکا دې پریکړه وکړي چې زموږ باور ترلاسه کوي او که نه".

قالیباف نن یکشنبه په اسلام اباد کې د ایران او امریکا ترمنځ د مذاکراتو د بې پایلې پایته رسیدو وروسته وویل،" امریکا زموږ اصولو او منطق درک کړل، اوس پریکړه د هغوي په لاس کې ده چې زموږ باور ترلاسه کوي او که نه".

د قالیباف دغه څرګندونې د ایران د بهرنیو چارو وزیر عباس عراقچي پر خپلې ایکس پاڼې خپرې کړي دي.

هغه وړاندې ویلي چې د ډپیلماسي او پوځي لارو څخه به د ایران او ایرانیانو له ملي ګټو دفاع ته دوام ورکړي.

پاکستان پرون ماښام د ایران او امریکا ترمنځ د مذاکراتو کوربه و.

دغه مذاکرات نن سهار بې پایله پایته ورسیدل او امریکايي او ایراني پلاوي بیرته خپلو هېوادونو ته ستانه شوي دي.

په جرمني کې شمیر افغانان "پریږدئ افغانې نجونې زده کړې وکړي" په نوم یو ملي کمپاین پیلوي.

پرون شنبې د (حمل۲۲مه) په پلازمینه برلین کې د ملي مرکې په نوم د یو بنسټ له خوا یوه غونډه رابلل شوې وه چې په کې د برلین میشتو علمي، سیاسي او ټولنیزو فعالانو ګډون کړی وو.

د غونډې د کډونوالو په ټکو، د ناستې اجندا ملي ډیالوګ، ټولنیز عدالت او د افغانانو ترمنځ د زغم فرهنګ رامنځته کول وو.

کډونوالو یو ځل په افغانستان کې د طالبانو له خوا پر افغان نجونو د زده کړو بندیز ته غبرګون ښودلی او ویلي دي چې دغه بندیز د افغان نجونو پر وړاندې "ظلم" او د افغانستان د ملي ګټو خلاف بللی دی.

په پرونۍ ناسته کې برلین میشتو افغانانو پریکړه چې د افغان نجونو د غږ پورته کولو په موخه "پریږدئ افغانې نجونې زده کړې وکړي" ملي کمپاین پیل کړي.

د ملي مرکې په نوم په برلین کې د میشتو افغانانو بنسټ له دې مخکې هم د طالبانو له خوا پر افغانو نجونو د زده کړو د بندیز په اړه ورته ناسته جوړه کړې وه.

هالنډ میشتو افغانانو پر افغانستان د پاکستان وروستي بریدونه او په کې د ملکیانو مرګژوبله غندلی ده.

په لسهاوو کسان پرون شنبې د (حمل۲۲مه) د هالنډ په امسټردام ښار کې راټول شوي وو او له نړیوالې ټولنې يې وغوښتل چې په افغانستان کې د پاکستان د بریدونو او د دوی په ټکو "د بشري جنایت" پر وړاندې اقدام وکړي.

د لاریون کوونکو په خبره،"د عام افغانانو په نښه کول له بشري نړیوالو حقونو ښکاره سرغړونه ده".

لاریون کوونکو د جرمونو له نړیوالې محکمې هم غوښتنه کړې چې د پاکستان پوځ او پر عام افغانانو په بریدونو کې ښکیل پاکستاني چارواکي د عدالت محکمې ته راکش کړي.

د افغانستان او پاکستان ترمنځ د فبرورۍ میاشتې راهیسې جګړه او تاواتریخوالی روان دی.

د طالبانو حکومت به رسمي ډول ادعا کړې چې د تېرې فبرورۍ له ۲۲ مې د پاکستان په هوايي او ځمکنیو حملو کې ۷۶۱ ملکي افغانان وژل شوي، ۶۲۲ ټپیان شوي دي او له ۲۷ زره زیاتې کورنۍ له خپلو اصلي مېنو بې ځایه شوي دي.

پاکستان بیا ادعا لري چې په افغانستان کې د ترهګرو پټنځایونه په نښه کوي.

پرون شنبې نژدې څلور زره افغان کډوال له ایران او پاکستانه بیرته افغانستان ته راستانه شوي دي.

د کډوالو په چارو کې د طالبانو د حکومت عالي کمیسیون د شنبې په ورځ د (حمل۲۲مه) وویل،"۶۹۶ کورنۍ چې ۳۸۵۹ کسان کیږي د تورخم او سپین بولدک له لارې راغلي دي".

د دغه کمیسیون په ټکو، ۴۳ نور افغان کډوال له ایرانه راستانه شوي.

له ایران او پاکستانه په وروستیو کې د افغان کډوال اخراج د پخوا پرتله زیات شوی دی.

په افغانستان کې د طبیعي پېښو له کبله په تیرو درې اونیو کې ۱۷۹کسان مړه شوي دي.

پېښو سره د مبارزې ملي اداره وايي، د روانې حمل میاشتې له ۶ مې تر مې ۲۲نیټې د بارانونو، سیلابونو، زلزلې او نورو طبیعي پېښو له کبله په ټول افغانستان کې ۱۷۹کسان مړه او ۲۳۸ نور ټپیان شوي دي.

د دې ادارې مرستیال ویاند تاج محمد همت د شنبې په ورځ پر خپلې ایکس پاڼه په یو ویډيو پیغام کې ویلي چې د دغو شمیرو سربیره ۹ نور کسان نادرکه دي.

دغې ادارې وړاندې ویلي چې وروښتو او سیلابونو په ټول افغانستان کې ۱۲۷۷ کورونه په کامله او ۵۷۷۰ کورونه په جزيي توګه ویجاړ کړي دي.

ملګرو ملتونو پرون په یو راپور کې ویلي وو چې وروښتونو په افغانستان کې ۷۳زره خلک زیانمن کړي دي.

د ایران او امریکا ترمنځ مذاکرات بې پایلې ته پایته ورسیدل.

د امریکا د ولسمشر مرستیال جي ډي ونس نن سهار په اسلام اباد کې خبریالانو ته وویل چې هوکړه ونه شوه او امریکايي پلاوی بیرته ستنیږي.

هغه وړاندې وویل، په اسلام اباد کې "خپل وروستۍ او ښه وړاندیز " ایران ته پریږدي.

د هغه په ټکو، "موږ یوې هوکړې ته ونه رسېدو موږ خپلې سره کرښې روښانه کړې، دوی (ایرانیانو) زموږ د شرایطو له منلو انکار وکړ".

جي ډي ونس د مذاکراتو په بهیر کې نیمګړتیاوو ته په اشارې وویل،"ایران پریکړه کړې چې د اټومي وسلو د جوړولو په ګډون د امریکا شرایط ونه مني".

په عین حال کې د ایران د بهرنیو چارو د وزارت ویاند اسماعیل بقايي وايي،"په ځینو موضوعاتو هوکړه شوې وه، خو په ۲ یا ۳ برخو کې هوکړه ونه شوه او ورسره مذاکرات بې پایلې پایته ورسیدل".

د بقايي په ټکو،"په مذاکراتو کې ځيني نوي موضوعات لکه د هرمز تنګي موضوع اضافه شوې او هر یوه يې خپلې ستونزې لري".

بل پلو، د پاکستان د بهرنیو چارو وزیر چې د دغو مذاکراتو کوربه و، له دواړو خواو غوښتي چې دوه اونیز اوربند پلي او رعایت کړي.