پاکستاني چارواکي وایي، د لشکر طیبه وسلهوالې ډلې یو لوړپوړی مشر ذکيالرحمان لکهوي یې نیولی دی.
پاکستاني چارواکو د نوموړي تور د ترهګرو ډلو تمویل یاد کړی دی.
د پاکستان د پنجاب ایالت د ترهګرۍ ضد ادارې پرون (شنبه) وویل چې ذکيالرحمان لکهوي یې د لاهور ښار په ختیځ کې نیولی دی.
د دغې ادارې ویاند ویلي، لکهوي له خلکو د روغتیایي خدمتونو په نوم پیسې راټولې کړي او پر پوځي فعالیتونو یې لګولې دي.
ویل کېږي چې لکهوي د لشکر طیبه له لوړپوړو غړو څخه دی، هغه ډله چې د هند او امریکا لهخوا د ممبی د ۲۰۰۸ کال خونړیو بریدونو مسؤله بلل شوې.
په دغو بریدونو کې چې د ممبی په څو ځایونو کې وشول د یو شمېر امریکایانو په ګډون ۱۱۶ تنه ووژل شول.
له دغو بریدونو څو ورځې وروسته ذکيالرحمان لکهوي ونیول شو، خو ۲۰۱۵ کال کې د پاکستان د یوې محکمې لهخوا بېرته خوشې شو.
د ملګرو ملتونو امنیت شورا نوموړی د افغانستان، عراق، چچن او بوسنیا په جګړو کې په لاس لرلو تورن کړی دی.
هند له ډېره وخته د نوموړي د نیولو هڅه کوله. اوس ټاکل شوې راتلونکې اوونۍ د لکهوي محاکمه په پنجاب ایالت کې ترسره شي.
لشکر طیبه له القاعده شبکې سره تړلې وسلهواله ډله بلل کېږي او دوی تر ډېره د کشمیر لانجمنه سیمه کې د هندي ځواکونو پر ضد جنګېږي.
هند او افغانستان تل پاکستان تورن کړی چې د لشکر طیبه ملاتړ کوي، خو پاکستان بیا دا تورونه رد کړي دي.
د پاکستان یوې محکمې شاوخوا درې میاشتې مخکې د لشکر طیبه بنسټ ایښودونکی حافظ سعید د ترهګرو د مالي ملاتړ په جرم په پنځه نیم کاله بند محکوم کړ او نوموړی دا مهال هلته د بند شپې ورځې تېروي.
سعید د امریکا د عدلیې وزارت لهخوا د ترهګر په توګه معرفي شوی او د موندلو لپارهیې ۱۰ میلیونه ډالر انعام ټاکل شوی و.
