د بوسنیا هرزګوینا حکومت د کډوالو د بشري بحران د حل لپاره د هڅو په ترڅ کې هغو کورنیو ته خیمې ورکړې چې تېره اوونۍ یې کمپ وسوځېد او دوی دوه شپې په سخته یخنۍ کې بې اسرې پاتې وو.
د بوسنیا پوځ د جمعې په ورځ سلګونه کډوالو ته چې افغانان هم په کې دي خیمې ورکړې. څه باندې یوه اوونۍ مخکې د کرویشیا سرحد ته نژدې د لیپا Lipa کمپ له سوځېدو وروسته د بوسنیا پر حکومت له دې کبله چې شااوخوا زر تنه کډوال یې بې سرپناه پریښي دي، سخت انتقادونه وشول.
د بوسنیا پوځ پرون د مرغومي په ۱۲مه نېټه وویل چې کډوالو ته د خېمو د درولو په عملیاتو کې شااوخوا یونیم سل سرتېرو برخه اخېستې وه. د دې کمپ ټولې چارې 'IOM' یا د کډوالو نړیوال سازمان ترسره کوي.
پرون جمعه له دې مخکې دې کډوالو په یوه اعتراضیه لاریون کې ګډون وکړ، څو نړیوال له هغو سختو شرایطو- چې دوی په بوسنیا کې ورسره مخامخ دي خبر کړي.
مرستندویې ټولنې وايي چې د دې اعتراض په ترڅ کې سلګونه کډوالو د دوډۍ له خوړلو ډډه وکړه او په لیکلو شعارونو کې یې له نړیوالو مرسته وغوښته.
بوسنیايي چارواکو په روانه اوونۍ کې اعلان وکړ چې دا کډوال له لیپا کمپ څخه په مرکزي بوسنیا کې د پوځ یوې پخوانۍ اډې ته لېږدوي، خو دا پلان عملي نه شو ځکه د سیمې اوسېدونکو اعتراض وکړ.
دا کډوال د ۲۴ ساعتونو لپاره د بسونو په کتار کې ناست وو خو وروسته له دې چې د لېږد پلان یې رد شو، بېرته د لیپا سوځېدلي کمپ ته راوستل شول. په تېرو دوو شپو کې دې کډوالو د ځان د تودولو لپاره اورونه لګول.
بوسنیا هرزګووینا د هغو زرګونه غیرقانوني کډوالو پر لاره پروت دی چې د منځني ختیځ، افریقا او آسیا له جګړه ځپلو هېوادونو څخه تښتې او اروپا ته ځي.
دوی اکثرا د بوسنیا له شمال لویدیځې څنډې څخه- چې د اروپايي ټولنې له غړي هېواد کرویشیا سره ګډ سرحد لري، اوړي او له هغه ځایه غواړي چې ځانونه د اروپا شتمنو هېوادونو ته ورسوي، خو ډېری دا کډوال چې ښځې او ماشومان هم ورسره وي، په کرویشا کې د سرحدي پولیسو او په بوسنیا کې د سیمه ییزو اوسېدونکو له تشدد سره مخامخ کېږي.
