ارمنستان کې اعتراض کوونکي تېره ورځ د پلازمېنې ایروان په ازادۍ میدان کې ټول شوي وو، د صدراعظم پر ضد یې شعارونه ورکول او هغه یې خاین وباله.
اعتراض کوونکو له نیکول پاشینیان نه وغوښتل چې ژر تر ژره د صدارت له څوکۍ نه لېرې شي.
اعتراضونه له هغه وروسته راپورته شول چې ارمنستان او اذربایجان د نومبر په لسمه نېټه د مسکو په منځګړیتوب یوه هوکړه لاسلیک کړه.
له دغې هوکړې سره، د نګورنو قره باغ لانجمنې سیمې پر سر د ارمني او اذري ځواکونو ۴۴ ورځنۍ جګړه پایته ورسېده.
دغې هوکړې که یوې خوا جګړه پای ته ورسوله، بل لور ته یې ارمنستان کې سیاسي کړکېچ رامنځته کړ.
دا ځکه، د هوکړې له مخې اذربایجان اجازه لري چې د نګورنو قره باغ د پام وړ برخه چې جګړه کې یې نیولې، وساتي.
د هوکړې پر بنسټ اذربایجان به د دغې غرنۍ سیمې پر شااوخوا هم ولکه ولري، دا سیمې له ۱۹۹۴ کال راهیسې د ارمنستان په کنټرول کې وې.
د یادې هوکړې له مخې به د روسیې شااوخوا دوه زره سوله ساتي ځواکونه د نګورنو قره باغ د امنیت په خاطر ځای پر ځای کېږي.
دغه روسي ځواکونه به د لاچین ستراتیژیک دهلیز ساتنه هم کوي، دا دهلیز د نګورنو قره باغ او ارمنستان ترمنځ د نښلېدو یوازنۍ لاره ده.
په نړیواله کچه نګورنو قره باغ د اذربایجان د خاورې په توګه په رسمیت پیژندل شوی، خو ارمنيان چې د دغۍ غرنۍ سیمې اکثریت اوسیدونکي دي، د اذربایجان حاکمیت نه مني.
د نګورنو قره باغ د وروستۍ هوکړې پر سر د ارمنستان ۱۷ سیاسي ډلې په غوسه دي، د دوی ټولو غوښتنه د صدر اعظم استعفا ده.
د اعتراض کوونکو له څو ځلي غوښتنو سره-سره تراوسه پاشنیان له واکه د لېرې کېدو هېڅ اشاره نه ده ښودلې.
پاشنیان خپله ویلي، وروستۍ هوکړه بده وه، خو په خبره یې د نګورنو قره باغ بقا د همدې هوکړې له مخې تضمېنېږي.
