د لاسرسۍ وړ لېنکونه

تازه خبر
سه شنبه ۱ غبرګولی ۱۴۰۳ کابل ۰۷:۰۵

په کابل، کندز، لوګر، پکتیکا او هلمند کې د "الیاس داعي" فاتحه واخیستل شوه


الیاس داعي
الیاس داعي

په کابل، لوګر، پکتیکا او هلمند ولایتونو کې نن د ازادي راډیو د وژل شوي خبریال محمد الیاس داعي فاتحه واخیستل شوه.

د شنبې په ورځ په کابل، کندز، لوګر، پکتیکا او هلمند ولایتونو د الیاس داعي د فاتحې په مراسمو کې سلګونو کسانو ګډون کړی و.

د فاتحې ګډونوال ځوانيمرګ داعي ته د دعا تر څنګ د خبریالانو د امنیت د خوندیتوب غوښتنه کوي.

په کابل کې د الیاس داعي د فاتحې مراسم په قومي چارو کې د ولسمشر سلاکار جمعه خان اڅکزي او په کابل کې د میشتو هلمندیانو له لوري د کابل د څلورمې کارتې په شېر شاه سوري جومات کې واخیستل شوه.

جمعه خان اڅکزي د فاتحې له مراسمو وروسته ازادي راډیو ته وویل: "په دغه فاتحه کې موږ سره سلګونو کسانو ګډون کړی و، شهید داعي د بیان د ازادي یو ستوری و، د خلکو مظلوم ولس اواز یې تر مسوولینو رساوه، د نوموړي په شهادت د بیان د ازادي په خوله لاس نه نیول کېږي، د هغه په شان زرګونه کسان شته چې د بیان ازادي ته به کار کوي او د الیاس داعي نیمګري ارمانونه به پوره کوي."

په ورته وخت کې په همدې ورځ د کابل په ګاونډ ولایت لوګر کې هم د محمد الیاس داعي د فاتحې مراسم پرځای شول.

د فاتحې مراسم د لوګر د اطلاعاتو فرهنګ ریاست، د لوګر د ازادو ژورنالیستانو ټولنې، د لوګر د خبریالانود خونیدتوب کمېتې او خبریالانو لوري نیول شوي و، د قاتحې ګډنوالو د الیاس داعي وژنې د غندلو ترڅنګ یې د پېښې د عاملین د نیولو غوښتنه وکړه.

پکتیکا پریس کلب او د دغه ولایت خبریالانو هم د الیاس داعي فاتحه واخیسته او د هغه په یاد یې شمعې بلې کړې.

د دغه ولایت د خبريالانو د خونديتوب کميټې مسول خيرالدين ذکې هم د يادې پېښې د وژنې د څيړلو غوښتنه وکړه.

هغه زیاته کړه: "له حکومت نه مو غوښتنه دا ده، چې د داعي په نامه دې په بېلابېلو ولایتونو په ځانګړې توګه په کابل کې یو څلور لاری ونومول شي، همداشان دې د نوموړي اولادونو ته د زده کړې زمینه برابره کړي."

اخوا په کندز کې لسګونو تنو خبریالانو، مدني فعاالنو او فرهنګیانو په هلمند کې د ازادي راډیو د خبريال الیاس داعي پر وژل کېدو ژوره خواشیني هم وښوده.

دوی نن په کندز ښار کې سره راټول شوي وو او پر حکومت يې غږ وکړ، چې د خبریالانو خوندیتوب ته جدي پاملرنه وکړي او په دې اړه دې نور غفلت نه کوي.

په شمال ختېځ زون کې د افغان ژورنالیستانو د مرکز مسئول رحمت هلال همنوا، د الیاس داعي وژل کېدل ستره ضايعه وبلله او زیاته کړه، چې حکومت باید د هدفې وژنو مخه ونیسي.

هغه زیاته کړه: "د خبریالانو او په مجموع کې د رسینو د کور دا ستره اندېښنه ده ولې خبریالان په نښته کېږي او ولې خبریالان له تاوتریخوالی سره مخ کېږي. چې په همدې موخه نن ګڼ شمېر خبریالان، د رسنیو چارواکي
او فرهنګیان راټول شوي وو تر په دې اړه اندېښنه وښیي او د شهید الیاس داعي اروا ته دعا وکړي."

په کندز کې د اورانوس خصوصي تلویزیون مسئول هدایت هلال زیارمل هم د ازادي راډیو د خبريال الیاس داعي وژل کېدل وغندل او له چارواکو غوښتنه وکړه، چې د دغې پېښې عاملین ونیسي او د قانون منګلو ته دې وسپاري.

هغه زیاته کړه: "دالیاس داعي وژنه او د یما سیاوش وژنه واقعاً موږ له امنیتي چارواکو غواړو چې د ټولو ژورنالیستانو د امنیت د خوندیتوب لپاره پوره چمتوالی ونیسي څو دوی په ډاډه زړه باندې د ورځینو پېښو په اړه راپورونه جوړ کړي او په وخت سره اطلاع رسونه وکړي."

پکتیا کې د الیاس داعي په نوم د نومول شوي واټ یو انځور
پکتیا کې د الیاس داعي په نوم د نومول شوي واټ یو انځور

بل خوا په هلمند کې دا دویمه ورځ ده، چې د محمد الیاس داعي د فاتحې مراسم روان دي.

له دې وړاندې په ارزګان، ننګرهار، خوست، پکتیا، بغلان او یو شمېر نورو ولایتونو کې هم د محمد الیاس داعي فاتحه اخیستل شوې وه او تر څنګ يې ګډنوالو د پېښې د څېړنو غوښتنه کړې وه.

تېره ورځ په پکتیا کې یو واټ د الیاس داعي په نوم ونومول شو او همداشان وړمه ورځ په بامیان ولایت کې د هغه په یاد شمعې بلې شوې.

محمد الیاس داعي د تېرې پنجنشبې په ورځ په لښکرګاه کې د ده په موټر پسې د نښلول شوي یا چسپکي ماین به چاودنه کې ووژل شو،د نوموړي وژل کېدل په ملي سیمه ییزه او نړیواله کچه سخت غبرنونو را وپارول.

تراوسه کومې ډلې یا کس د الیاس داعي د وژلو مسوولیت نه دی منلی، له دې وړاندې د تېرې شنبې په ورځ په کابل کې د طلوع نيوز د سياسي خپرونو بخوانی وپاند یما سیاووش هم په ورته چاودنه کې وژل شوی و.

د افغان ولسمشر لومړي مرستیال په دې وروستیو کې په مدني فعالانو او بنسټونو د وسله والو له لوري د حملو خبرداری ورکړی.

XS
SM
MD
LG