د لاسرسۍ وړ لېنکونه

تازه خبر
سه شنبه ۶ لړم ۱۳۹۹ کابل ۰۲:۲۱

د اذربایجان او ارمنستان ترمنځ نګورنو قره‌باغ کې اوربند تر ګواښ لاندې دی


نګورنو قره‌باغ

د روسیې د ولسمشر ولادیمیر پوتین په منځګړیتوب په نګورنو قره‌باغ کې اوربند له پرونیو نښتو وروسته اوس تر ګواښ لاندې دی.

باکو او ایروان یو بل په دې لانجمنه سیمه کې د جګړې په پیل تورنوي.

اذربایجان پر ارمنستان تور ولګاوه چې نن سهار وختي یې د دې هېواد په دوهم لوی ښار ګنجه کې د استوګنې پر کورونو د توغندیو درنې ډزې کړي.

د دې هېواد لویې څارنوالۍ وویل چې په دې ډزو د استوګنې یو بلاک لګېدلی دی، پنځه کسان مړه او ۲۸ نور ټپیان شوي دي.

د ارمنستان دفاع وزارت دا ادعا بې‌بنسټه او دروغ بللې ده او پر اذربایجان‌یې تور لګولی دی چې د قره‌باغ لوی ښار ستیپاناکېرت او نورې ګڼ مېشتې سیمې یې په توغندیو ویشتلې دي.

نګورنو قره‌باغ کې جګړه
نګورنو قره‌باغ کې جګړه

تېره شپه په دې سیمه کې درنې چاودنې وشوې چې تر سهاره‌یې دوام وکړ. د ارمنستان د بهرنیو چارو وزارت تېره شپه ناوخته په یوه بیان کې پر اذربایجان له اوریند څخه د سرغړونې تور ولګاوه.

د اوربند له نافذېدو راهیسې د نګورنو قره‌باغ په هغه سیمو کې چې اذري او ارمني ځواکونه سره بېلوي او د تماس کرښه بلل کېږي د ډزو راپورونه ورکړل شوي.

دواړه لوري له دوو اوونیو درنو جګړو وروسته اوربند ته چمتو شول. دا موافقه د جمعې په ورځ په مسکو کې د اذربایجان، ارمنستان او روسیې د بهرنیو چارو د وزیرانو په غونډه کې وشوه. دا د دواړو هېوادو ترمنځ د لانجې د حل لپاره لومړنۍ ډیپلوماتیکه هڅه وه.

په دې غونډه کې پر اوربند سربېره د سره صلیب له نړیوالې کمېټې غوښتنه وشوه چې د دواړو خواوو ترمنځ د بندیانو په تبادله او د اوربند د موافقې د نورو بشري اړخونو په عملي کولو کې مرسته وکړي.

د روسیې، اذربایجان او د ارمنستان د بهرنیو چارو وزیرانو غونډه
د روسیې، اذربایجان او د ارمنستان د بهرنیو چارو وزیرانو غونډه

د نګورنو قره‌باغ پر سر لانجه د ۱۹۹۱ کال په پای کې د شوروي اتحاد له پرځېدو وروسته رابرسېره شوه.

دا سیمه نړیوالو د اذربایجان د قلمرو د برخې په توګه په رسمیت پېژندلې ده، خو د ۱۹۹۴ کال له اوربند وروسته عملاً د هغو ارمن ټبره ځواکونو په ولکه کې ده چې ایروان‌یې ملاتړ کوي او په دې توګه د سیمې سلګونه زره اذري اوسېدونکي بې‌کوره شوي دي.

دا کورني بې‌ځایه شوي کډوال له نږدې ۲۵ کلونو راهیسې د اذربایجان په پلازمېنه باکو او نورو سیمو کې دېره دي.

XS
SM
MD
LG