د لاسرسۍ وړ لېنکونه

تازه خبر
شنبه ۱۰ لړم ۱۳۹۹ کابل ۰۲:۳۰

نړۍ

د اذربایجان او ارمنستان ترمنځ اوربند د ماتېدو له خطر سره مخامخ شوی

نګورنو قره‌باغ کې د اذربایجان او ارمنستان ترمنځ نښته

د اذربایجان او ارمنستان ترمنځ اوربند چې له اعلانېدو یې لا ورځ نه‌ده پوره شوې، د ماتېدو له خطر سره مخامخ شوی دی.

د دواړو خواوو ترمنځ اوربند پرون د غرمې په ۱۲ بجې د روسیې په منځګړیتوب پیل شو، خو ارمنستان او اذربایجان پر یو بل د بریدونو تور پورې کوي.

د راپورونو له مخې، د نګورنو قره‌باغ په ستیپاناکرت سیمه کې له پرون مازدیګره تر نن سهاره پورې د څو چاودنو غږ اورېدل شوی دی.

د ارمنستان د بهرنیو چارو وزارت تېره شپه وویل چې اذري ځواکونو د اوربند سرغړونه کړې ده.

په باکو کې د اذربایجان دفاع وزارت تېره شپه وویل، ارمنستان د اذربایجان پر ګنجې ښار راکټونه ویشتي دي.

تر اوسه پورې د دواړو هېوادونو ترمنځ په جګړو کې سلګونه تنه ملکیان او پوځیان وژل شوي دي.

د ورځې تازه خبرونه دلته ولولئ

ګرجستان کې نن پارلماني انتخابات دي

ګرجستان کې پارلماني انتخابات

په ګرجستان کې نن پارلماني انتخابات دي. خلک به پرېکړه وکړي چې حاکم ګوند د درېیم ځل لپاره بیا هم خپل حکومت جوړ کړي که څرنګه؟

په ګرجستان کې د جون په میاشت کې په انتخاباتي سیستم کې تغییر راغی او هدف‌یې دا دی چې تر ډېره په واک کې د یوې سیاسي ډلې د پاتېدو مخه ونیسي.

د ګرجستان د پارلمان ۱۵۰ څوکۍ دي.

امریکا کې د کرونا ویروس نږدې یو لک نوې پېښې ثبت شوې

ارشیف، امریکا کې روغتیايي کارکوونکي په کرونا ویروس د اخته کسانو د موندلو په لټه کې

د امریکا متحد ایالاتو کې د کرونا ویروس نږدې یو لک نوې مثبت پېښې ثبت شوې دي.

له دې سره د جمعې تر ورځې په متحده ایالاتو کې په 'کووېډ-۱۹' د اخته کسانو شمېر تر نهه میلیونو واوښت.

دا شمېرې په داسې وخت کې خپرې شوې دي چې د امریکا د ولسمشرۍ انتخاباتو ته درې ورځې پاتې دي.

بل لور ته په اروپا کې اوس د ورځې د کرونا تر دوه لکه ۴۰ زره ډېرې مثبت پېښې ثبتېږي.

په فرانسه کې پرون د کرونا وبا د خپرېدو د مخنیوي لپاره ټولبند اعلان شو او تمه ده چې سر له بل سبا په بلجیم کې هم ټولبند اعلان شي.

ترکیې او یونان کې د زلزلې له امله د وژل شویو شمېر ۱۹ ته ورسېد

ترکیه کې د زلزلې له امله ویجاړ شوې ودانۍ

په ترکیه او یونان کې د زورورې زلزلې له امله د وژل شویو خلکو شمېر ۱۹ ته رسېدلی.

ډېره مرګ‌ژوبله د ترکیې په ازمیر کې راپور شوې.

د ترکیې چارواکو د شپې ناوخته تأیید کړه چې هلته د مړو شویو خلکو شمېر ۱۷ ته پورته شوی او د ټپيانو شمېر له ۷۰۰ کسانو اوښتې ده.

د یونان په ساموس ټاپو کې د ۲ کسانو د وژل کېدو او د ۱۹ نورو د ټپي کېدو خبره تأیید شوې ده.

د دې زورورې زلزلې مرکز د اژه سمندرګی بلل شوی چې څپې یې ان په استانبول او یونان کې حس شوي.

امریکا د دې زلزلې اندازه اووه درجې ښودلې، خو ترکیې د ریښتر په کچه ۶،۶ اعلان کړې.

ترکیه په سیمه کې د هغو هېوادونو له ډلې ده چې پخوا هم خطرناکه زلزلې په‌کې تېرې شوي.

تېره جنوري په ایلاژيک ښار کې یوې زلزلې ۳۰ کسان مړه او څه باندې ۱،۶۰۰ نور کسان‌یې ټپیان کړل.

د ترکیې په ازمیت «Izmit» ښار کې د ۱۹۹۹ کال زلزله تر ټولو خونړۍ بلل کېږي چې په‌کې ۱۷ زره کسان مړه شوي و.

امریکا، يمن ته ۲ توغندي لېږدوونکې ایرانۍ کښتۍ نيولي

ارشیف

د امریکا متحده ایالتونه وايي، دوه ایرانۍ کښتۍ یې چې د دې هېواد د سپاه پاسداران قدس ځواک څو ډوله توغندي یې یمن ته لېږدول نیولي دي.

د امریکا متحده ایالتونو همدارنګه اعلان کړی چې هغه تېل یې هم پلورلي چې د اګست میاشت کې یې وینزویلا ته روانې یوې ایرانۍ کښتۍ کې ضبط کړي وو.

د امریکا د عدلیې وزارت د پنجشنبې په ورځ وویل، د امریکا دوه کښتیو د ۲۰۱۹ م کال په نومبر کې او د ۲۰۲۰ م کال په فبرورۍ کې دوه بې بیرغه کښتۍ په عرب سمندرګي کې ودرولې او له دواړو کښتیو یې بېلابېل توغندي ترلاسه کړل.

امریکايي چارواکي وايي، د ایران قدس ځواک غوښتل دا وسلې په یمن کې حوثي یاغیانو ته ورکړي چې د یمن د حکومتي ځواکونو پر ضد جنګیږي.

د امریکا د عدلیې وزارت ویلي د ایران هغه یو میلیون او زر بیلر تېل چې ټاکلې وه وینزویلا ته انتقال شي او امریکا ضبط کړي وو، پلورلي او پیسې د تروریستي پېښو قربانیانو ته ورکړي.

ایران تر اوسه د دې ادعاوو په اړه څه نه‌دي ویلي.

امریکا کې تېرو ۲۴ ساعتونو کې ۹,۱۰۰۰ کسان په کرونا اخته شوي

په کرونا اخته شوی کس

د امریکا په متحده ایالتونو کې د ۲۴ ساعتونو په لړ کې په کرونا ویروس د یو نوي زره (۹۱۰۰۰) کسانو د اخته کېدو بې‌ساری شمېر ثبت شو.

د جانز هاپکنز پوهنتون د شمېرو له مخې په امریکا کې پرون په کرونا ویروس د اخته کسانو شمېر ۸ میلیونو او ۹ لکو ته ورسېد او په دې ویروس د مړو شمېر تر ۲ لکو او ۲۸زرو اوښتی دی.

د امریکا د براون پوهنتون د عامې روغتیا مشر ډاکټر اشیش جها رویټرز اژانس ته وویل: "اوس په امریکا کې وضعیت ډېر ناوړه دی."

د اروپا په ګڼو هېوادونو کې د کرونا ویروس بیا خپرېدو د دې لویې وچې ګڼ هېوادونه د محدودیتونو سختولو ته اړ کړي دي.

په وروستیو کې فرانسې رستورانتونه او ځینې نور غیرحیاتي کار و بارونه بند کړي، هاخوا په جرمني کې هم د نوامبر له دوېیمې دېته وَرته محدودیتونه لګول کېږي.

اذربایجان، نګورنو قره‌باغ کې د وژل شويو سرتېرو مړي ارمنستان ته وسپارل

دواړو لوریو د دغو مړو د سپارل کېدو خبر تأیید کړی دی.  

اذربایجان د هغو ۲۹ سرتېرو مړي چې په لانجمنه سیمه نګورنو قره باغ کې د جګړې په نتیجه کې وژل شوي وو، ارمنستان ته پرون وسپارل.

دواړو لوریو د دغو مړو د سپارل کېدو خبر تأیید کړی دی.

دا په داسې حال کې ده، چې باکو او یریوان یو او بل د هغه درېیم اوربند په ماتولو تورنوي، چې د واشنګټن په منځګړیتوب ورباندې موافقه شوې وه.

د ارمنستان د دفاع وزارت ویاند وویل، یریوان یو وار بیا چمتو دی، چې د اذربایجان د سرتېرو مړي هغه هېواد ته تسلیم کړي.

تمه کېده چې د دواړو هېوادونو د بهرنیو چارو وزیران د منسک ډلې دغه راز د اروپا د امنیت او همکارۍ سازمان له استازو سره پرون په ژنیف کې وګوري، خو وروسته راپورونه راغلل چې دغه کتنه لږترلږه د یوې ورځې لپاره ځنډول شوې ده.

پر لانجمنه سیمه نګورنو قره‌باغ د اذربایجان او ارمنستان جګړه د سپټمبر پر ۲۷مه، پیل شوه.

فرانسه کې امنیتي احضارات تر ټولو لوړې سطحې ته پورته شول

فرانسه کې له برید وروسته د امنیت خوندیتوب

وروسته له هغې چې د فرانسې په یوه کلیسا کې یوه حمله کوونکي په چړې درې کسان ووژل، په دغه هېواد کې امنیتي احضارات تر ټولو لوړې سطحې ته پورته شول.

د فرانسې ولسمشر امانویل مکرون پرونۍ پېښه "یوه اسلام‌پاله تروریستي" حمله بللې ده.

بل‌خوا د فرانسې صدراعظم ژان کاستکس په دغه هېواد کې د نیس کلیسا په شااوخوا کې د وسله‌والو پولیسو د یوه کمرند په ایجاد سره د احضاراتو شدت زیات کړ.

حمله کوونکي چې د الله اکبر نارې وهلې د پولیسو په ډزو ټپي شو.

بلاروس له روسیې پرته ټولو ګاونډیو سره پولې وتړلې

د بلاروس بیرغ

بلاروس له روسیې پرته له نورو ګاونډیو هېوادونو سره خپلې پولې وتړلې.

دغه اقدام د الکساندر لوکاشینکا تر هغو هڅو وروسته کېږي چې په بلاروس کې پر لارو او سړکونو د مظاهرو د ختمولو لپاره یې پیل کړې دي.

مظاهرې د بلاروس د ولسمشرۍ د لانجمنو ټاکنو د نتایجو پرخلاف چې لوکاشینکا یې په نتیجه کې بریالی اعلان شوی، پیل شوي دي.

د دغه هېواد د سرحدونو د کنټرول کمېټې پرون د هغه څه په پلمه چې دوی د کرونا وبا بللې، له لاتویا، لتوانیا، پولنډ او اوکراین سره د خپلو سرحدونو د تړلو خبر ورکړ.

خو داسې ګنګوسې دي، چې دغه اقدام ښايي سیاسي انګېزه ولري.

د سرحدونو د کنټرول کمېټې ویلي، یوازې د بلاروس وګړي او باروړونکي موټر کولای شي، د ځمکنیو چک پاینټونو له لارې دغه هېواد ته ننوځي.

د بلغاریا جمهور رئيس ځان قرنطین کړ

د بلغاریا ولسمشر رومن رادف

د بلغاریا جمهور رئیس وروسته له هغې ځان قرنطین کړ چې د دفتر رئیس یې په کرونا ویروس اخته وبلل شو.

د دې هېواد جمهوري ریاست ویلي د جمهور رئیس رومن رادف د دفتر رئیس ډیمېټار ستویانوف د پنجشنبې په ورځ په 'کوویډ-۱۹' ویروس اخته تشخصی شو.

د بلغاریا د جمهوري ریاست په وینا ستویانوف د اکټوبر له ۲۶ مې نیټې راهېسې دفتر کې نه‌و او د جمهوري ریاست له کارمندانو سره یې وروستی تماس درې ورځې کې مخکې وو.

د دې هېواد صدراعظم بویاکو بوریسوف او د مرکزي بانک رئیس یې ډېمېټر راډیف هم په 'کوویډ-۱۹' د اخته کېدو له کبله په قرنطین کې دي.

بلغاریا پرون په دې هېواد کې د کرونا ویروس د خپرېدو د مخنیوي لپاره پوهنتونونه، لېسې او شپني کلپونه د دوو اوونیو په مخه وتړل.

په دې هېواد کې تر اوسه تر ۴۵ زرو زیات کسان په کرونا اخته شوي چې نږدې ۱۲ سوه تنه‌یې دې ناروغۍ وژلي دي.

هند کې په کرونا ویروس د اخته کسانو شمېر تر ۸ میلیونو زیات شو

هند کې روغتیايي کارکوونکي د کرونا ویروس د ناروغانو د موندلو لپاره د ازموینې پر مهال.

په هند کې نن په کرونا ویروس د اخته کسانو شمېر تر ۸ میلیونو واوښت.

تر اوسه پورې په دغه هېواد کې چې یو میلیارد او ۳۰۰ میلیونه نفوس لري، یو لک او ۲۰ زره تنه په دې وبا مړه شوي.

اوس تر هند یوازې د امریکا په متحده ایالاتو کې د کرونا پېښې ډېرې دي.

د امریکا حکومت د شمېرو له مخې، په دې هېواد کې د کرونا ۹ میلیونه او ۱۰۰ زره مثبتې پېښې ثبت شوې دي.

د اذربایجان او ارمنستان د بهرنیو چارو وزیران د مېنسک غونډه کې ګډون کوي

د اذربایجان او ارمنستان د بهرنیو چارو وزیرانو په شمول د مېنسک ډلې یو شمېر غړي

ټاکل شوې چې د اذربایجان او ارمنستان د بهرنیو چارو وزیران نن په هغه غونډه کې ګډون وکړي چې د مېنسک ډلې په مشرۍ جوړېږي.

د امریکا متحده ایالات، فرانسه او روسیه په ګډه د مېنسک ډلې مشري کوي.

د نګورنو قره‌باغ د بېلې شوې سیمې پر سر د اذربایجان او ارمنستان ترمنځ په جګړه کې مرګ‌ژوبلې په زیاتېدو دي.

دواړه خواوې یو بل د امریکا په منځګړیتوب د شوي اوربند په سرغړونې تورنوي.

امریکا ۸ تنه د چین له حکومت سره په همکارۍ او جاسوسۍ تورن کړل

ارشیف، د امریکا او چین بیرغونه

د امریکا د عدلیې وزارت پرون (چهارشنبه) ۸ تنه د چین له حکومت سره په همکارۍ او جاسوسۍ تورن کړل.

د امریکا د عدلیې وزارت او «اېف بي ای» چارواکو په یوه خبري غونډه کې وویل، په دې تړاو ۵ تنه په نیویارک، نیوجرسي او کالیفورنیا کې د چین د حکومت لپاره د جاسوسۍ په تور نیول شوي.

ویل کېږي چې ۳ نور تورن کسان په چین کې دي.

د بلاروس د کورنیو چارو وزیر؛ پر ویجاړوونکو یا ترهګري کوونکو ډزې وکړئ

د بلاروس د کورنیو چارو وزیر یوري کرایف

د بلاروس د کورنیو چارو وزیر ویلي، امنیتي ځواکونه پر هغو کسانو ډزې کولای شي چې "ویجاړوونکو یا ترهګریزو" فعالیتونو کې برخه واخلي.

یوري کرایف دغه خبرداری داسې مهال ورکوي چې د الکساندر لوکاشینکا پر ضد اعتراضونه اوس په هېواد شموله اعتصاب بدل شوي دي.

لوکاشینکا بیا دغه اعتصاب "د پلان شویو جرمي ډلو" کار بللی دی.

د بلاروس د کورنیو چارو وزیر چې د مظاهره‌چیانو د ځپلو لپاره پرې اروپایي ټولنې بندیزونه لګولي په یوه مرکه کې ویلي، د سوله‌ییزو مظاهره‌چیانو پر ضد به وسله نه‌کارېږي، خو په خبره‌یې که کوم څوک ګډوډي یا ترهګریز فعالیت وکړي، د پولیسو له‌خوا به‌یې په فزیکي فعالیت یا وسلې مخه نیول کېږي.

بلاروس کې د سیاسي مخالفانو له‌خوا عمومي اعتصاب وروسته له هغې پیل شو چې الکساندر لوکاشینکا د مخالفانو له پرله‌پسې غوښتنو سره سره وویل چې استعفا نه‌ورکوي.

چنای سوپر کېنګز کرکټ لوبډله له کلکته نایټ رایډرز سره نن لوبه کوي

د چنای سوپر کېنګز او کلکته نایټ رایډرز لوبډلو سیالۍ

د هند د کرکټ غوره لیګ لوبو په ترڅ کې ټاکل شوې ده چې نن چنای سوپر کېنګز لوبډله له کلکته نایټ رایډرز سره مسابقه وکړي.

کلکته نایټ رایډرز په جدول کې پنځم ځای لري او چنای سوپر کېنګز د جدول په اخر کې دی.

د هند د کرکټ غوره لیګ چې د نړۍ د کرکټ تر ټولو ګران بیه لیګ دی، د کرونا ویروس له امله سږ کال د هند پر ځای په متحده عربي اماراتو کې د سپټمبر په ۱۹مه پرانیستل شو.

دا لوبې به د نومبر تر ۱۰مه په متحده عربي اماراتو کې روانې وي.

جرمني او فرانسه کې د کرونا وبا د خپرېدو د مخنیوي لپاره بندیزونه

فرانسه کې لګول شوی بندیز

جرمني او فرانسې د کرونا وبا د کنټرول لپاره بندیزونه اعلان کړل.

د فرانسې ولسمشر امانوئل مکرون وویل، په ملي کچه د دوهم ځل لپاره ټولبند ضروري دی. مکرون زیاته کړه چې د اروپا په نورو برخو کې هم د کرونا دوهمه څپه راغلې چې ښایي تر لومړۍ یوې ډېره سخته او وژونکې وي.

له تېرې شپې (اکټوبر ۲۹) بارونه، رستورانتونه او غیر ضروروي دکانونه بند شول او له خلکو غوښتل شوي چې سفر ونه‌کړي او چې څومره ممکنه وي په کورونو کې پاتې شي.

بل لور ته د جرمني صدراعظمې انګلا مېرکل د څلور اوونیو په مخه یو لړ بندیزونه اعلان کړل. دې وویل چې باید ژر لاس په کار شو، ځکه چې وضعیت جدي دی.

په جرمني کې به د نومبر له دوهمې تر ۳۰مې ټول بارونه، رستورانتونه، تفریحي مرکزونه، د کنسرت هالونه او تیاترونه بند وي. دکانونه به پرانیستي وي، خو خلک باید په دکانونو کې له یوه بله فاصله رعایت کړي.

نور راوښيه

XS
SM
MD
LG