د قرغزستان جمهور رئیس ویلي چمتو دی چې استعفا ورکړي.
د پارلماني ټاکنو له پایلو ناخوښو کسانو بلاخره د قرغزستان جمهور رئیس انعطاف ته اړ کړ.
سورونبای جینبیکوف په خپله ویبپاڼه لیکلي چې چمتو دی د نوې کابینې تر تأیید وروسته استعفی ورکړي.
د هغه په حواله زیاته شوې: "کله چې په قرغزستان کې یو وار بیا د قانون حاکمیت ټینګ شو چمتو دی د جمهوري ریاست څوکۍ پرېږدي."
که څه هم داسې برېښي چې د جمهور رئیس جینبیکوف دا وړاندیز او انعطاف د واک د انتقال چاره اسانه کړي خو معلومه نهده چې د ده ایډیال شرایط به پوره کېږي که څنګه؟
د قرغزستان جمهور رئیس داسې وخت نن جمعه چمتووالی ښودلی د هر څه په سمېدو واک پریږدي چې د پارلماني ټاکنو د پایلو په اړه ناخوښو سیاسي ډلو او مظاهره چیانو د تازه مظاهرو د ترسره کولو غږ پورته کړی.
د قرغزستان پارلماني ټاکنې یکشنبه وشوې چې په کې د اوسني واکمن رژيم اکثر پلوي کسان بریالي اعلان شول.
دې پایلو د منځنۍ اسیا د دغه هېواد د سیاسي مخالفو ډلو او خلکو تند غبرګون وپارواه او پراخې مظاهرې یې ترسره کړې
د مظاهرو په ترڅ کې خلکو دولتي ودانۍ ونیولې او د انتخاباتو کمېسیون یې اړ کړ چې چهارشنبه د پارلماني ټاکنو پایلې باطلې اعلان کړي.
ولسمشر سورونبای جینبیکوف هم د پایلو له باطلېدو سره موافقه وښودله.
مظاهره چیانو د نوي موقت حکومت د جوړېدو غوښتنه کړې هغه غوښتنه چې دوی يې د تحقق لپاره د مظاهرو د دوام ګواښ کړی.
د سیاسي مخالفو ډلو له منځه څو تنو د نوي موقت حکومت د رهبري لپاره چمتووالی ښودلی خو تر اوسه په هېڅ یوه موافقه نهده شوې.
له یکشنبې راهیسې د منځنۍ اسیا دا هېواد په تازه کړکېچ کې ایسار دی چې ورسره په اکثرو ښارونو کې عادي ژوند ګډوډ شوی.
په ځینو راپورونو کې خلکو دا شکایتونه هم کړي چې د مظاهرو په پلمه ځینې لوټماران د خلکو شخصي شتمنۍ او وسایل غلا کوي.
