جمهور رئیس محمد اشرف غني وايي، سوله پیاوړی تدبیر، صبر، حوصله او قرباني غواړي.
ښاغلي غني وویل چې جمهوریت د ټولو افغانانو غوښتنه ده او باید ننګهیې وشي. دی وايي، د سولې راتګ او د جمهوریت ساتنه د افغانانو په یووالي پورې اړه لري.
ښاغلي غني دا څرګندونې د یکشنبې په ورځ «۱۳۹۹ کال د وږې ۳۰» بامیان ولایت ته د خپل سفر پر مهال یوې ولسي غونډې ته وکړې او ویېویل چې د سولې راتګ لپاره هر ډول قرباني ته چمتو دی.
ښاغلی غني زیاتوي: "فکر کوئ چې ستاسو په مخ کې ناست درې تنه (غني، صالح، دانش) د تېښتې خلک دي، نه هېڅکله هم نه، خو سوله تدبیر، تعمق او قرباني غواړي."
محمد اشرف غني دا څرګندونې داسې مهال کوي چې د تېرې شنبې په ورځ د قطر په پلازمېنه دوحه کې د سولې د بینالافغاني خبرو پرانیستونکې غونډه وشوه، خو له یوې اوونۍ تر زیات وخت تېرېدو وروسته لا هم د افغان حکومت او طالبانو مرکچي پلاوو د تماس ډلې د خبرو طرزالعمل یا کړنلاره نهده وروستۍ کړې.
ټاکل شوې وه چې رسمي خبرې د تېرې دوشنبې په ورځ پیل شي.
ښاغلي غني بامیان ته په سفر کې د سولې په اړه په خپلو خبرو کې خلکو ته په خطاب کې دا هم وویل چې د یو مسؤل ولسمشر په توګه ستاسو په مخ کې ولاړ یم، خو د طالبانو مشر او نور مشرانیې پټ دي.
بامیانو ته په سفر کې له ښاغلي غني سره د هغه دواړه مرستیالان هم ملګري دي.
د نوموړي لومړي مرستیال امرالله صالح غونډې ته په وینا کې وویل، طالبان له دې وېرې چې په ټولنه کې ذوب نهشي اوربند ته غاړه نهږدي.
ښاغلی صالح زیاتوي: "که چېرې طالبان یوه ورځ هم اوربند وکړي، یو ځل بیا دا خبره تکراروم چې طالبان به د ټولنې په کره کې ویلي (ذوب) شي."
ښاغلي صالح زیاته کړه، د طالبانو هویت او د امارت اصطلاح نور زاړه شوي او په افغاني ټولنه کې نور کار نهورکوي.
د جمهور رئیس غني دوهم مرستیال سرور د دانش بیا د غونډې ګډنوالو ته په خپلو خبرو کې وویل چې په قطر کې بینالافغاني مذاکرات باید داسې مدیریت شي چې موږ یوې با عزته او تلپاتې سولې ته ورسوي.
ښاغلي دانش ټینګار وکړ چې د سولې په خبرو کې د جمهوریت نظام او اساسي قانون ته باید زیان ورنهرسېږي او د تېرو کلونو لاسته راوړنې هم خوندي شي.
