د لاسرسۍ وړ لېنکونه

تازه خبر
جمعه ۴ تله ۱۳۹۹ کابل ۰۷:۵۱

د ونیس د فلم نړیوال فیستیوال نن پیلېږي


ارشیف

ټاکل شوې چې نن (د سپټمبر ۲مه) د ونیس د فلم نړیوال جشن یا فیستیوال پیل شي.

دا اول وار دی چې په نړۍ کې د کرونا د ویروس تر خپرېدو وروسته د فلمونو یو نړیوال فیستیوال پیلېږي.

سږکال د ونیس د فلم په فیستیوال کې ۱۸ فلمونه نندارې ته وړاندې کېږي او له‌منځه به‌یې د نړیوالو کتونکو یو پلاوی تر ټولو غوره فلمونه وټاکي.

د فلمونو دا فیستیوال د ایټالیا په ونیس ښار کې جوړېږي.

ایټالیا کې د ونیس فلم فیستیوال
ایټالیا کې د ونیس فلم فیستیوال

هر کال به له ټولې نړۍ پېژندل شوي فلم جوړوونکي، هنرمندان او سیلانیان د ونیس فلم فیستیوال ته ورتلل. سږ کال د دې لپاره چې د کرونا ویروس د لا خپرېدو مخنیوی وشي، په ونیس کې خاص ترتیبات په پام کې نیول شوي دي.

ټول هغه کسان چې د فیستیوال لپاره ورځي باید ماسکونه ولري، د فلم د کتلو په وخت کې به خلک تر یو متر په زیاته فاصله کې ناست وي او د خلکو د تبې یا د بدن د حرارت درجه به هم کتل کېږي.

په ډېرو اروپايي هېوادونو کې د بندیزونو له نرمېدو سره د کرونا ویروس مثبتې پېښې زیاتې شوې دي، له دې کبله به د ونیس په ښار کې خلک ټول مجبور وي چې ماسک واغوندي.

هغه کسان به چې د شنګن له زون څخه له بهرنیو هېوادونو فیستیوال ته ورځي د کرونا ویروس دوه ټسټونه کوي، یو ايټالیا ته تر ورتګ مخکې او یو د ونیس ښار ته تر رسېدو وروسته څو چارواکي ډاډمن شي چې د کرونا خطر نه‌زیاتوي.

سږکال په پسرلی کې د کنس فلم فیستیوال د کرونا ویروس له کبله انلاین یا د انټرنټ له لارې ترسره شو.

د اسکار د فلم د جایزې مراسم هم د ۲۰۲۱ کال د اپرېل میاشتې ته وځنډول شول.

خو د ونیس فلم فیستیوال جوړوونکو ویلي چې دوی د فیستیوال نېټه نه‌بدلوي او نه‌یې هم د انټرنټ له لارې کوي، بلکې د دې لپاره چې د کرونا ویروس پر ضد په مبارزه کې خلک هيله‌مند شي، دا فیستیوال تر بندیزونو لاندې خو په خپل پخواني ډول ترسره کوي.

ارشیف، د ونیس فیستیوال
ارشیف، د ونیس فیستیوال

تېر کال په دې فیستیوال کې تر ټولو لوړه جایزه، د سرو زرو زمری د جوکر په نوم فلم وګټله او کتونکو اته دقیقې په ولاړو چکچکې ورته وکړې.

سږ کال د ریجیناکنګ فلم یوه شپه په میامې کې، د الکس ګبني مستند فلم لیونی او د ګوادانینو سلواتور د خوبونو موچي مستند فلم چې د ایټالوي ډیزاینر سلواتور فرګامو په ژوند راڅرخي ډېر خوښ شوي دي.

XS
SM
MD
LG