د افغانستان د بشري حقونو خپلواک کمېسیون وايي د دوی ارزونې ښيي چې په هېواد کې د ورځې په اوسط ډول ۱۶ ملکیانو ته مرګ ژوبله اوړي.
د افغانستان د بشري حقونو خپلواک کمېسیون وايي، په هېواد کې د ناامنیو په وروستیو پېښو کې تر ډېره ملکیانو او هغو کسانو ته مرګ ژوبله اوړي، چې په جګړه کې هېڅ رول نه لري.
د دغه کمېسیون د نشراتو رئیس ذبیح الله فرهنګ پرون جمعه ناوخته ازادۍ راډیو ته وویل، د دوی ارزونې ښيي چې هره ورځ په هېواد کې په اوسط ډول ۱۶ ملکیانو ته مرګ ژوبله اوړي.
هغه وايي: "زموږ د ارزونو له مخې د هېواد په بېلابېلو برخو کې د ورځې په اوسط ډول ۱۶ ملکیانو ته چې په جګړه کې هېڅ رول نه لري- مرګ ژوبله اوړي، زموږ د ارزونو له مخې یوازې د ۲۰۲۰میلادي کال په لومړیو شپږو میاشتو کې د ۶۳۰ ماشومانو مرګ ژوبله ثبت شوې، ممکن دغه شمېر زیات وي."
په تازه مورد کې د هرات ولایت په ادرسکن ولسوالۍ کې په یوه بمبارۍ کې ملکیانو ته د مرګ ژوبلې اوښتو ادعا شوې ده.
د هرات چارواکو ویلي دغه حمله تېره چهارشنبه د طالبانو پر یوه غونډه شوې، چې په نتیجه کې یې ځینې افراطي وسله وال وژل شوي دي.
خو په سیمه کې ځینو کسانو د ازادۍ راډیو خبریال ته ویلي، په دې بمبارۍ کې لږترلږه ۱۲ ملکي وګړي وژل شوي او ۲۰ نور ټپیان دي.
د ملي مصالحې عالي شورا مشر عبدالله عبدالله د پنجشنبې په ورځ په ادرسکن ولسوالۍ کې دغې پېښې ته په اشاره په یوه اعلامیه کې ویلي، د ملکیانو وژنه په هېڅ ډول د توجېه وړ نه ده.
ښاغلي عبدالله غوښتنه کړې، چې د بین الافغاني مذاکرو د پیلېدو له نږدې کېدو سره دې تاوتریخوالی راکم شي.
د ملي مصالحې عالي شورا مشر عبدالله عبدالله د پنج شنبې په ورځ ویلي، د جګړې په میدانونو کې د مرګ ژوبلې شمېرې د انساني غمیزې څرګندوي کوي او د جګړې اصلي قربانیان ملکي وګړي دي.
بلخوا د افغانستان د سولې لپاره واشنګټن ځانګړي استازي زلمي خلیلزاد هم د پنج شنبې په ورځ په ټویټر کې لیکلي، نور قبرونه د سولې د مذاکرو د پرمختګ نه سبب کېږي.
د بشري حقونو خپلواک کمېسیون د نشراتو رئیس ذبیح الله فرهنګ د جګړې له ښکېلو لوریو د اوربند په برخه کې د عملي اقداماتو غوښتنه وکړه.
هغه زیاته کړه: "څومره چې جګړه اوږدېږي، بشري حقونه هم تر پښو لاندې کېږي، موږ له ټولو اړخونو چې د افغانستان په جګړه کې ونډه لري، غوښتنه کوو چې د اوربند لپاره ګامونه واخلي او د تاوتریخوالي کمېدو په موخه باید اساسي ګامونه واخیستل شي. له بده مرغه ملکي کسان، غیرنظامي او بېدفاع کسان اصلي قربانیان دي، چې دا موږ ته د اندېښنې وړ خبره ده."
خو په روانه جګړه کې چې په وروستیو کې یې شدت زیات شوی، د ملکیانو تر څنګ د افغان امنیتي ځواکونو مرګ ژوبله هم زیاته شوې ده.
بریتانوۍ ورځپاڼې ایشین لایټ پرون د ځینو رسنیو په حواله راپور ورکړی، چې د افغانستان په ۱۱ ولایتونو کې په تېرو درېیو اوونیو کې د وسلوالو طالبانو د ۲۲۰ په حملو په نتیجه کې لږ تر لږه ۲۵۰ امنیتي پوځیان وژل شوي او تر ۳۰۰ زیات نور ټپیان دي.
په افغانستان کې د ملګرو ملتونو مرستندوی ماموریت یا یوناما د پنج شنبې په ورځ د جګړې له ښکېلو اړخونو د راروان لوی اختر په ورځو کې د اوربند غوښتنه وکړه، چې حکومت یې هرکلی وکړ.
د جمهوري ریاست د لومړي مرستیال دفتر وویل، که طالبان اوربند نهکوي، لږترلږه دې تاوتریخوالی راکم کړي، څو په افغانستان کې د سراسري سولې لپاره بین الافغاني خبرو ته زمینه برابره شي.
