د لاسرسۍ وړ لېنکونه

تازه خبر
جمعه ۲۴ زمری ۱۳۹۹ کابل ۰۶:۱۲

د ملګرو ملتونو اټومي ادارې د ایران په اړه پرېکړه لیک خپور کړ


په دغه سند کې له ایرانه غوښتنه شوې، چې دوو ساحو ته دې د دې نړیوالې ادارې د څارونکو د تګ اجازه ورکړي، چې ښايي پخوا په کې اټومي فعالیتونه کېدل.

د ملګرو ملتونو د اټومي انرژۍ نړیوالې ادارې مدیره پلاوي پرون د ایران په اړه یو پرېکړه لیک خپور کړ.

په دغه سند کې له ایرانه غوښتنه شوې، چې دوو ساحو ته دې د دې نړیوالې ادارې د څارونکو د تګ اجازه ورکړي، چې ښايي پخوا په کې اټومي فعالیتونه کېدل.

د ملګرو ملتونو د اټومي انرژۍ نړیوالې ادارې د مدیره پلاوي پرېکړه لیک له ایرانه غواړي چې له دې نړیوالې ادارې سره "بشپړه همکاري" وکړي او د دې ادارې درخواستونه له ځنډ پرته پرځای کړي.

دغې ادارې د ایران د دوو ساحو د کتلو غوښتنه هم کړې، چې معلومه شي، ایا د ۲۰۰۰ میلادي کلونو په لومړیو کې هلته په پټه اټومي فعالیت شوی که څنګه؟

ایران له څو میاشتو راهیسې دغو ساحو ته د لاسرسي مخه نیولې ده، چې دې مسئلې په ډیپلوماتیک ډګر کې کړکېچ ولاړ کړی دی.

د ملګرو ملتونو د اټومي انرژۍ نړیوالې ادارې تازه پرېکړه لیک په ۲۵ موافقو رایو سره تصویب شو، چې فرانسې، جرمني او بریتانیا وړاندې کړی و او د امریکا متحدو ایالتونو یې ملاتړ کاوه.

خو روسیې او چین د پرېکړه لیک په مخالفت کې رایه ورکړه او ۷ نورو هېوادونو اذرباییجان، پاکستان، هندوستان، منګولیا، جنوبي افریقا، ټایلنډ او نایجر سپینې یا ممتنع رایې وکارولې.

په ویانا کې د اټومي انرژۍ په نړیواله اداره کې د ایران سفیر کاظم غریب ابادي وویل، تهران دغه پرېکړه لیک په کلکه ردوي او مناسبت ځواب به یې ورکړي.

کاظم غریب ابادي
کاظم غریب ابادي

ایراني چارواکو ویلي، دا ډول پرېکړه لیک به د تهران او د ملګرو ملتونو د دې ادارې ترمنځ اړیکې زیانمنې کړي.

بلخوا په ویانا کې د ملګرو ملتونو لپاره د روسیې سفیر میخایل یولیانوف په یوه ټویټ کې ویلي، دا پرېکړه لیک به مثمر نه وي، خو په عین حال کې یې ټینګار کړی و، چې اړتیا ده تهران او د اټومي انرژۍ نړیواله اداره په خپلو کې دا ستونزه له ځنډ پرته حل کړي.

که څه هم داسې ګومان نه کېږي هغه دوې ساحې چې په اړه یې پوښتنې شته، د ایران په اوسني اټومي پروګرام پورې مستقیم ارتباط ولري، خو د اټومي انرژۍ نړیواله وايي غواړي وپوهېږي، هغه فعالیتونه چې نږدې دوې لسیزې مخکې دلته شوي، په مناسب ډول یې راپور ورکړل شوی او هلته د ټولو کارول شویو اټومي موادو حساب کتاب ورکول شوی دی او که څنګه؟

XS
SM
MD
LG