د افغان ولسمشر دویم مرستیال سرور دانش وايي، عبدالله عبدالله به ډېر ژر د مصالحې د عالي شورا مشرتابه پر غاړه واخلي او په افغانستان کې اوسنۍ سیاسي ترینګلیتا به پای ته ورسېږي.
د افغانستان د ولسمشر دویم مرستیال وايي، د ولسمشر محمد اشرف غني او عبدالله ترمنځ سیاسي ترینګلتیا ممکن زر پای ته ورسېږي.
سرور دانش ویلي چې ښاغلی عبدالله به د مصالحې د عالي شورا مشرتابه پر غاړه واخلي.
نوموړې د افغانستان لپاره د ملګرو ملتونو له ځانګړې استازې دیبورا لاینز سره په خبرو کې ویلي چې د ملي مشارکت د حکومت په چوکاټ کې د یووالي او همغږۍ د ټینګښت لپاره هڅې روانې دي او په څو راتلونکو ورځو کې به دواړه لوري یوې وروستۍ هوکړې ته ورسېږي.
دوی دواړو د پنجشنبې په ماسپښین د ویډیو کنفرانس له لارې خپلو کې خبرې کړي دي.
د دې خبرو اترو جزییات د سرور دانش مطبوعاتي دفتر په یوې اعلامیې کې خپاره کړي دي.
له بلې خوا د افغانستان د پخواني اجرائیه رئیس عبدالله عبدالله یو ویاند امید میثم ازادي راډیو ته وویل چې د دوی له خوا د حکومت طرحه وروستۍ شوې ده.
هغه زیاته کړه: "د دې طرحې پر بنسټ په راتلونکې حکومت کې د سیاسي مخکښانو ته د عادلانه او موثر شراکت زمینه برابرېږي، موږ هیله مند یوو چې راتلونکې اوونۍ د اوسني بحران د پای ته رسېدو لپاره د عملي ګامونو د اخیستو شاهدان و اوسو."
دا سیاسي ترینګلتیا وروسته له هغې راپورته شوه چې د افغانستان د ټاکنو کمېسیون د فبروري په میاشت کې محمد اشرف غني د ولسمشرۍ د ټاکنو ګټونکی اعلان کړ خو سیال یې عبدالله عبدالله دا نتایج ونه منل.
د مارچ د میاشتې په نهمه نېټه دواړو غني او عبدالله جلا جلا د ولسمشرۍ د لوړې مراسم پر ځای کړل.
د دواړو لورو ترمنځ له اوږدې مودې راهېسې د کورنیو او بهرنیو منځکړو له خوا د جوړجاړي هڅې روانې دي.
