د افغانستان خبریالانو د خوندیتوب کمېټه وایي، د افغانانو ترمنځ د سولې په پروسه کې د رسنیو ازادي باید په پام کې ونیول شي.
دغه کمېټه وایي، د رسنیو او بیان ازادي د افغانستان دولت او خلکو له مهمو لاسته راوړنو څخه ده، باید قرباني نهشي او په جدي ډول ترې دفاع وشي.
د دغې کمېټې مشر نجیب شریفي وایي، دغه هدف ته د رسېدو لپاره اړتیا ده چې د بیان ازادۍ او د رسنیو د حراست یوه کمېټه جوړه او دوامداره خبرې اترې پیل شي.
ښاغلي شریفي د چهارشنبې په ورځ «۱۳۹۹ کال د غويي ۰۲» په کابل کې د یوې خبري ناستې پر مهال وویل، دا مهال د سولې د خبرو په لړ کې د دواړو لورو نه د رسنیو او بیان ازادۍ په اړه چلند کمزوری دی.
ښاغلی شریفي زیاتوي: "هغه مهال چې د سولې د پروسې په لړ کې د رسنیو او بیان ازادۍ موضوع مطرح کېږي، هغه استازي چې له طالبانو سره مذاکره کوي باید لازمه پیاوړتیا ولري چې د رسنیو او بیان ازادۍ له مورچل نه سمه دفاع وکړای شي."
نوموړی وایي چې د رسنیو او بیان ازادۍ نه د ملاتړ په هدف باید د سولې پروسې لپاره یوه داسې کمېټه جوړه شي چې د ملي شورا، اطلاعاتو او فرهنګ وزارت، مدافع وکیلانو، اروپایي ټولنې، یوناما او یو شمېر نورو بنسټونو استازي پهکې ګډون ولري.
ښاغلي شریفي دا ټینګار هم وکړ چې د حکومت ترڅنګ د رسنیو د اوسني وضعیت نه د نړیوالې ټولنې مالي، سیاسي او مسلکي ملاتړ ته هم اړتیا ده.
خو افغان حکومت هم وایي چې له طالبانو سره د سولې په مذاکراتو کې د رسنیو او بیان ازادي نه دفاع کول حتمي چاره ده.
د افغان ولسمشر مرستیال ویاند دوا خان مینهپال وایي، د حکومت د سولې مذاکراتو استازي به له طالبانو سره په خبرو کې د رسنیو او بیان له ازادۍ نه په جدیت دفاع وکړي.
ښاغلي مینهپال وویل: "حکومت د رسنیو او بیان ازادي له خپلو مهمو لاسته راوړنو څخه بولي، د سولې په مذاکراتو کې د رسنیو ازادي، د ښځو او بشر حقونه په هېڅ وجه د معاملې وړ نهدي، حکومت د بیان له ازادۍ دفاع کول خپل مسؤلیت بولي."
دا مهال په افغانستان کې لسګونه ټلوېزیونونه، سلګونه راډیوګانې او چاپي رسنۍ فعالیت لري، خو په دې وروستیو کې اندېښنې دا دي چې ګواکې د سولې په مذاکراتو کې به د بیان د ازادۍ پر سر معامله وشي.
دا په داسې حال کې ده چې یو شمېر خصوصي ټلوېزیونونو، راډیوګانو او چاپي رسنیو د مالي ستونزو له امله خپل فعالیتونه درولي دي.
