د امریکا بهرنیو چارو وزیر مایک پومپیو یو ځل بیا د ولسمشر غني او ډاکتر عبدالله عبدالله څخه غوښتې چې یو ټول شموله حکومت جوړ کړي.
د افغانستان ولسمشرۍ ماڼۍ، د امریکا بهرنیو چارو وزیر د پیغام په غبرګون کې وایي محمد اشرف غني به یو پراخ بنسټه حکومت جوړ کړي.
د ولسمشرۍ ماڼۍ او سپیدار ترمنځ د اختلافاتو تر څنګ د دې اختلافاتو له منځه وړلو لپاره د کورنیو او نړیوالو ناکامو هڅو سره، د امریکا بهرنیو چارو وزیر یو ځل بیا له محمد اشرف غني او عبدالله عبدالله غوښتي چې ټول شموله حکومت رامنځته کړي.
تازه د امریکا بهرنیو چارو وزیر په خپل ټویټر کې د افغانستان له سیاسي مشرانو غوښتې چې د یو ټول شموله حکومت جوړیدو لپاره دې هڅې وکړي.
پومپیو لیکلي: "دا او دې ورته ګامونه کولی شي افغانان یوه روښانه راتلونکي ته ورسوي."
په ورته وخت کې ولسمشرۍ ماڼۍ وایي چې محمد اشرف غني به پراخ بنسټه حکومت جوړ کړي.
په عامه او استراتیژیکو اړیکو کې د ولسمشر سلاکار وحید عمر د یکشنبې په ورځ ازادي راډیو ته وویل چې پراخ بنسټه حکومت به د اساسي قانون په چوکاټ کې جوړ شي.
هغه زیاته کړه: "د ولسمشر هوډ دا دی چې نوی حکومت باید اغېزمن او تاثیر لرونکی وي او د دې تر څنګ د افغانستان نوی حکومت باید د دې هېوادو له ټولو اقشارو او خلکو استازیتوب وکړي، دا اراده وجود لري، انشالله د اساسي قانون په چوکاټ کې به پراخ حکومت چې هم اغېزمن وي او هم پراخ جوړ به شي."
له دې وړاندي د امریکا ځانکړي استازي د افغانستان سولې په اړه ویلي و چې سیاسي مشران باید ټول شموله حکومت رامنځته کړي.
هم مهاله د محمد اشرف غني د لوړې مراسم چې د افغانستان منتخب ولسمشر په توګه ترسره شول د ولسمشريز ټاکنو نوماند عبدالله عبدالله د ټاکنو خپلواک کمېسیون دا پرېکړه و نه منله او د ټوله شموله حکومت د مشر په توګه یې لوړه وکړه.
د عبدالله عبدالله او اشرف غني دواړو لخوا ویل کېږي چې د رامنځته شویو ستونزو د حل لپاره سیاسي خبرو ته چمتو دي.
د دې اختلافاتو د حل لپاره له دې وړاندې د امریکا بهرنیو چارو وزیر مایک پومپیو کابل ته راغی خو د محمد اشرف غني او عبدالله عبدالله ترمنځ د اختلافاتو د حل هڅو یې پایله ور نه کړه.
د پومپیو تر څنګ د افغانستان ځینو نورو سیاسي څېرو د افغانستان مخکینې ولسمشر حامد کرزي او پخواني جهادي رهبر عبدالرب الرسول سیاف هم هڅې وکړې څو د عبدالله عبدالله او محمد اشرف غني ترمنځ ستونزي حل کړي خو تر اوسه کومې پایلې ته نه دې رسېدلي.
اوس ولسمشرۍ ماڼۍ د پراخ بنسټه حکومت جوړېدو خبر ورکوي، ایا عبدالله عبدالله به په کې برخه ولري که نه؟
په عامه او استرتیژیکو اړیکو کې د ولسمشر سلاکار وحید عمر د دې پوښتنې په ځواب کې ازادي راډیو ته وویل: "اوس مهال زه نشم کولی چې ووایم راتلونکي حکومت کې به څوک برخه ولري، په دې باندې کار جریان لري، هرکله چې وروستی شو حتماً به اعلان شي."
د عبدالله عبدالله د ډلې ویاندویان په رسمي ډول د پومپیو څرګندونو او وحید عمر د خبرو په تړاو څه نه وايي خو د دې ټېم یو غړې چې نه غواړي نوم یې واخیستل شي وویل: "ټول شموله حکومت به هغه وخت د منلو وړ وي چې دواړه ټیمونه د دوو حکومتونو په توګه سیاسي خبرو ته ور داخل شي."
له دې وړاندې د افغانستان ولسمشر محمد اشرف غني د هغې ناستې په هکله چې د عبدالله عبدالله سره د امریکا بهرنیو چارو وزیر په ګډون ترسره شوې وه، وویل چې ده غوښتل د پراخ بنسټ حکومت په چوکاټ کې عبدالله عبدالله ته د سولې بهیر کې اساسي ونډه ورکړي او کابینه کې به یې هم ټیم ته ونډه ورکړي خو د ښاغلي غني په وینا ښاغلی عبدالله د داسې جوړښت غوښتونکی دی چې اساسي قانون سره ټکر کې دی، هغه څه چې بيا عبدالله عبدالله به يوه خبري ناسته کې رد کړ او وې ويل، د ده هېڅ غوښتنه د اساسي قانون سره مخالفت نه لري.
