د لاسرسۍ وړ لېنکونه

تازه خبر
چهارشنبه ۱۴ غبرګولی ۱۳۹۹ کابل ۱۰:۲۶

نړۍ کې د کرونا ویروس له امله د مړو شمېر له ۱۴۰۰۰ واوښت


افغانستان، رومانیا، چک جمهوریت، کوسوو او شمالي مقدونیه کې د کرونا ویروس له امله د لومړنیو قربانیانو خبر ورکړل شوی.​

په داسې حال کې چې د کرونا ویروس یا 'کووایډ ۱۹' له امله په نړۍ کې د تلفاتو شمېر له ۱۴ زره کسانو اوښتی، افغانستان، رومانیا، د چک جمهوریت، کوسوو او شمالي مقدونیه د دغه ویروس له امله د لومړنیو قربانیانو خبر ورکړ.​

له چین وروسته چې د ووهان له ښاره‌یې دغه ویروس خپور شوی، اوس اروپا د دغه ویروس د پراختیا پر لوی مرکز بدله شوې.​

په اروپا کې ډېر هغه کسان چې دغه ویروس مړه کړي عمرونه‌یې پاخه او د اوږدو ناروغیو سابقه لرونکي بلل شوي دي.​

د رومانیا چارواکو پرون د لومړي ځل لپاره پر کرونا ویروس د اخته شویو کسانو د دوه تنو د مړینې خبر ورکړ.​

په دې هېواد کې پر دې ویروس د اخته شویو کسانو شمېر پرون په چټکۍ لوړ شو او ۴۳۳ تنو ته ورسېد.​

رومانیا کې په کرونا ویروس د اخته کسانو شمېر ۴۳۳ تنو ته رسېدلی.
رومانیا کې په کرونا ویروس د اخته کسانو شمېر ۴۳۳ تنو ته رسېدلی.

چارواکو وویل، لومړنی قرباني یو ۶۷ کلن سړی و چې د سرطان ناروغي یې لرله او پنځه ورځې مخکې پر کرونا ویروس اخته شوی و.​

دغه کس هم په دې وروستیو کې له فرانسې بېرته هېواد ته ستون شوی و.​

فرانسه هم مخکې له دې چې پر نړیوالو الوتنو محدودیتونه ولګوي، د کرونا ویروس ډېر ځپلی و.​

په رومانیا کې د دغه ویروس دوهم قرباني هم یو ۷۴ کلن سړی ښودل شوی چې ویل شوي د بډوډو ناروغي یې درلوده.​

د کوسوو چارواکو هم په دې هېواد کې د کرونا ویروس له امله لومړنی مړ شوی کس د پاخه عمر لرونکي یو کس یاد کړی او ویلي یې دي چې هغه د زړه او سږو پر ناروغۍ اخته و.​

کوسوو کې ۳۱ تنه په کرونا ویروس اخته شوي دي.​
کوسوو کې ۳۱ تنه په کرونا ویروس اخته شوي دي.​

د کوسوو چارواکو ویلي چې ۳۱ تنه په کرونا ویروس اخته شوي دي.​

په ګاونډ شمالي مقدونیه کې یې پرون یوه ۵۷ کلنه ښځه په دې هېواد کې د کرونا ویروس لومړنۍ قرباني وه.

چارواکو ویلي چې دغه ښځه په ایټالیا کې پر دغه ویروس اخته شوې وه.​

په شمالي مقدونیه کې په کرونا ویروس ۱۱۴ کسان اخته شوي دي.
په شمالي مقدونیه کې په کرونا ویروس ۱۱۴ کسان اخته شوي دي.

په شمالي مقدونیه کې د کرونا ویروس ۱۱۴ پېښې ثبت شوې دي.​

پر کرونا ویروس د اخته شویو او مړو شویو لوړ شمېر هم په ایټالیا کې ثبت شوی.​

پر دغه ویروس د اخته شویو کسانو شمېر په دې هېواد کې نږدې ۶۰ زره او د مړو شویو له پنځه نیم زرو اوښتی.​

په چک جمهوریت کې هم پرون د لومړي ځل لپاره د کرونا ویروس له امله یو کس چې عمر یې شاوخوا ۹۰ کاله و، مړ شو.

په دې هېواد کې د کرونا شاوخوا ۱۲۰۰ مثبتې پېښې ثبت شوې دي.​

په افغانستان کې هم پرون د لومړي ځل لپاره پر کرونا ویروس اخته شوی یو کس مړ شو. ​

د افغانستان په ګاونډ ایران کې د کرونا ویروس له امله د مړو شویو شمېر له زرو تنو اوښتی او پر دغه ویروس د اخته شویو کسانو شمېر نږدې ۲۲ زره کسانو ته رسېدلی دی.​

ایران کې کرونا ویروس له زرو ډېر کسان وژلي او له ۲۲ زرو ډېر پرې اخته شوي.
ایران کې کرونا ویروس له زرو ډېر کسان وژلي او له ۲۲ زرو ډېر پرې اخته شوي.

د افغانستان بل ګاونډ ازبکستان د دغه ویروس د خپرېدو د مخنیوي هڅې تېزې کړي او په ټولو ښارونو کې یې د ماسک ایښودل اجباري کړي دي.

دغه‌راز چارواکو په تاشکند کې ټولو شرکتونو ته امر کړی چې کارکوونکي دې له لیرې واټن څخه کار کوي.​

پاکستان هم د کرونا ویروس پر وړاندې د نويو اقداماتو په ترڅ کې​ په سند ایالت کې ۱۵ ورځنی قرنطین اعلان کړی چې سر له ننه به عملي کېږي.​

د پاکستان د ۶۷۸ مثبتو پیښو ډېرې یې په سند ایالت کې ثبت شوې دي.​

په خېبر پښتونخوا ایالت کې هم له سې شنبې څخه د ښارونو ترمنځ پر ټرانسپورت محدودیت لګول کېږي.

XS
SM
MD
LG