د لاسرسۍ وړ لېنکونه

تازه خبر
یکشنبه ۱۷ وری ۱۳۹۹ کابل ۰۳:۱۴

ولسمشر غني او عبدالله عبدالله د ولسمشرۍ لوړه وکړه


افغان ولسمشر محمد اشرف غني او عبدالله عبدالله

محمد اشرف غني د افغانستان د ټاکنو خپلواک کمېسیون له‌خوا او عبدلله عبدالله چې د ټاکنو پایلې یې ونه‌منلې دواړو د لوړې مراسم ترسره کړل.

ولسمشر محمد اشرف غني د راتلونکو پنځو کلونو لپاره د ولسمشر په توګه لوړه وکړه.

د محمد اشرف غني د لوړې په مراسمو کې د افغانستان د سولې لپاره د امریکا د ځانکړي استازي زلمي خلیل‌زاد په ګډون د ۳۵ هېوادونو سیاسي استازو ګډون کړی و.

د افغان ولسمشر محمد اشرف غني د لوړې په مراسمو کې ګډون کوونکي بهرني مېلمانه.
د افغان ولسمشر محمد اشرف غني د لوړې په مراسمو کې ګډون کوونکي بهرني مېلمانه.

ولسمشر غني له سیاسیونو وغوښتل چې د نوي حکومت په جوړښت کې اوږه ورکړي.

ښاغلي غني زیاته کړه: "د دې لپاره چې په ټاکنو کې د شریکانو او سیاسیونو ترمنځ د همکارۍ او همغږۍ یو فرصت جوړ شي، د جمهوریت تر چتر لاندې به له پخوانۍ یعنې د ملي یووالي حکومت څخه د راپاتې کابینې سره کار ته دوام ورکړم. له هغه وروسته به د پراخو او هر اړخیزو مشورو وروسته داسې حکومت جوړ کړم چې ټول ګډونه او ټول خوښی واوسي."

د افغان ولسمشر محمد اشرف غني د لوړې مراسم.
د افغان ولسمشر محمد اشرف غني د لوړې مراسم.

ولسمشر محمد اشرف غني همدا ډول سولې ته اشاره وکړه او ویې‌ویل، د حکومت لومړیتوب‌یې باعزته او د جمهوریت تر چتر لاندې سوله ده چې ژر به راشي.

ولسمشر له طالبانو سره د مرکچي پلاوي په اړه وویل چې دا هیئت تر سبا وروستی کېږي او تر خوا به‌یې د پنځه زره بندیانو د خلاصون لپاره هم په همدې ورځ فرمان صادر کړي.

په ورته وخت کې عبدالله عبدالله هم د لوړې په مراسمو کې خپل پلویانو ته د وینا پر مهال وویل، د ده حکومت اجرائیه رئیس هم لري چې په نږدې راتلوکي کې به‌یې د لوړې مراسم ترسره شي.

د عبدالله عبدالله چې ځان‌یې ولسمشر اعلان کړی د لوړې مراسم.
د عبدالله عبدالله چې ځان‌یې ولسمشر اعلان کړی د لوړې مراسم.

ښاغلي عبدالله وویل: "زموږ لومړیتوب په حکومت کې یوه سیاسي اجماع رامنځته کول او د سولې خبرو لپاره د هیئت ټاکل دي، د سولې لپاره هر ډول قربانۍ ته تیار یم."

د محمد اشرف غني د لوړې مراسم د افغانستان د قاضی‌القضات یوسف حلیم او د عبدالله عبدالله د لوړې مراسم د ولسي جرګې پخواني غړي شهزاده شاهد له‌خوا ترسره شول.

د ښاغلي غني او عبدالله د لوړو مراسمو ته نږدې که څه هم څو راکټونه ولګېدل او غونډې له څه ستونزې سره مخ شوې، خو بیا هم دواوړ خپلو ویناوو ته دوام ورکړ.

د افغان سولې لپاره د امریکا ځانګړی استازی زلمی خلیل‌زاد د ولسمشر غني د لوړې مراسمو کې د ګډون پر مهال.
د افغان سولې لپاره د امریکا ځانګړی استازی زلمی خلیل‌زاد د ولسمشر غني د لوړې مراسمو کې د ګډون پر مهال.

د یادنې وړ ده چې امریکايي چارواکو په تېره زلمي خلیل‌زاد له تېرې ورځې راهیسې هڅې پیل کړې وې ترڅو د غبرګو مراسمو مخه ونیسي، خو بیا هم په ارګ او اجرائیه ریاست کې دواړه مراسم ترسره شول.

XS
SM
MD
LG