د لاسرسۍ وړ لېنکونه

تازه خبر
جمعه ۹ لړم ۱۳۹۹ کابل ۰۹:۲۲

خبرونه

ولسمشر غني تېره ورځ له خلیلزاد سره لیده کاته رد کړي

ولسمشر غني

والسټریټ ژورنال د افغان دولت د یوه چارواکي له خولې وايي، افغان ولسمشر محمد اشرف غني د چهارشنبې په ورځ د افغانستان د سولې لپاره د امریکا د ځانګړي استازي زلمي خلیلزاد سره لیده کاته رد کړي دي.

زلمی خلیلزاد تېره ورځ له قطر ه کابل ته راغی او د ملي یووالي حکومت له اجرائیه رئیس عبدالله عبدالله سره یې ولیدل.

اجرائیه ریاست وايي، د لیدنې په پیل کې اجرائیه رئیس او د ثبات او همپالنې ټیم مشرتابه د امریکا متحده ایالاتو او طالبانو ترمنځ د سولې د هوکړې په برخه کې د زلمي خلیلزاد له هڅو مننه او قدردانی وکړ او د سولې د هوکړې د عملي کولو پر لارو چارو، بین الافغاني مذاکراتو، د دواړو خواو ترمنځ د اعتماد فضا رامنځته کولو، د دایمي سولې لپاره پر هڅو او د ولسمشریزو ټاکنو پایلو څخه په رامنځته شوي بحران بحث او خبرې وشوې.

خو والسټریټ ژورنال وايي، خلیلزاد غوښتل څو له ولسمشر غني سره هم وګوري خو هغه دغه لیدنه نه ده منلې.

خو د ولسمشرۍ ماڼۍ ویاند صدیق صدیقي بیا پر خپل ټویټ پاڼه دغه خبر رد کړی.

هغه لیکلي دا خبره حقیقت نه لري.

د ورځې تازه خبرونه دلته ولولئ

امریکا، يمن ته ۲ توغندي لېږدوونکې ایرانۍ کښتۍ نيولي

ارشیف

د امریکا متحده ایالتونه وايي، دوه ایرانۍ کښتۍ یې چې د دې هېواد د سپاه پاسداران قدس ځواک څو ډوله توغندي یې یمن ته لېږدول نیولي دي.

د امریکا متحده ایالتونو همدارنګه اعلان کړی چې هغه تېل یې هم پلورلي چې د اګست میاشت کې یې وینزویلا ته روانې یوې ایرانۍ کښتۍ کې ضبط کړي وو.

د امریکا د عدلیې وزارت د پنجشنبې په ورځ وویل، د امریکا دوه کښتیو د ۲۰۱۹ م کال په نومبر کې او د ۲۰۲۰ م کال په فبرورۍ کې دوه بې بیرغه کښتۍ په عرب سمندرګي کې ودرولې او له دواړو کښتیو یې بېلابېل توغندي ترلاسه کړل.

امریکايي چارواکي وايي، د ایران قدس ځواک غوښتل دا وسلې په یمن کې حوثي یاغیانو ته ورکړي چې د یمن د حکومتي ځواکونو پر ضد جنګیږي.

د امریکا د عدلیې وزارت ویلي د ایران هغه یو میلیون او زر بیلر تېل چې ټاکلې وه وینزویلا ته انتقال شي او امریکا ضبط کړي وو، پلورلي او پیسې د تروریستي پېښو قربانیانو ته ورکړي.

ایران تر اوسه د دې ادعاوو په اړه څه نه‌دي ویلي.

'ارغنداب ولسوالۍ کې جګړې شااوخوا ۱۰۰ کورنۍ بې‌ځايه کړي'

بې‌ځایه شوي خلک

په کندهار کې د کډوالو چارو ریاست وايي، په ارغنداب ولسوالۍ کې د جګړې له کبله شااوخوا ۱۰۰ کورنۍ بې کوره شوي دي.

د دې ادارې چارواکي وايي دا کورنۍ د کندهار ښار ته کډه شوي او په ناوړه وضیعت کې دي.

په سیمه کې د ازادي راډیو خبریال د چارواکو له خولې وايي، په ارغنداب ولسوالۍ د سه شنبې په شپه د طالبانو له برید وروسته ولسوالۍ ته نږدې پراته ولسي وګړي د خپلو کورونو پرېښودو ته اړ شول.

د کندهار د کډوالو د چارو ریاست وايي، د دې کورنیو سروې یې پیل کړي او ښايي په نږدې وخت کې ورته مرستې ورسوي.

دا اداره وايي په روان کال کې ۱۵۰۰ کورنۍ په کندهار کې د خپلو کورونو پرېښودو ته اړ شوي دي.

امریکا کې تېرو ۲۴ ساعتونو کې ۹,۱۰۰۰ کسان په کرونا اخته شوي

په کرونا اخته شوی کس

د امریکا په متحده ایالتونو کې د ۲۴ ساعتونو په لړ کې په کرونا ویروس د یو نوي زره (۹۱۰۰۰) کسانو د اخته کېدو بې‌ساری شمېر ثبت شو.

د جانز هاپکنز پوهنتون د شمېرو له مخې په امریکا کې پرون په کرونا ویروس د اخته کسانو شمېر ۸ میلیونو او ۹ لکو ته ورسېد او په دې ویروس د مړو شمېر تر ۲ لکو او ۲۸زرو اوښتی دی.

د امریکا د براون پوهنتون د عامې روغتیا مشر ډاکټر اشیش جها رویټرز اژانس ته وویل: "اوس په امریکا کې وضعیت ډېر ناوړه دی."

د اروپا په ګڼو هېوادونو کې د کرونا ویروس بیا خپرېدو د دې لویې وچې ګڼ هېوادونه د محدودیتونو سختولو ته اړ کړي دي.

په وروستیو کې فرانسې رستورانتونه او ځینې نور غیرحیاتي کار و بارونه بند کړي، هاخوا په جرمني کې هم د نوامبر له دوېیمې دېته وَرته محدودیتونه لګول کېږي.

ارزګان کې لا هم د وسله‌والو طالبانو او حکومتي ځواکونو جګړه روانه ده

د ارزګان نقشه

د ارزګان د دهراود ولسوالۍ د امنیې قومندان وايي، د دې ولسوالۍ په بازار کې لا هم د وسله‌والو طالبانو او حکومتي ځواکونو ترمنځ جګړه روانه ده.

جان محمد کریمي څو ساعته مخکې ازادي راډیو ته وویل چې نیم بازار لاهم د طالبانو په ولکه کې دی.

هغه زیاته کړه: "دې خوا نیم بازار زموږ په واک کې دی. دښمن د بازار له غرب څخه ګټه اخیستې، هلته چې مارکیټونه دي له دې ځایه جګړه کوي او د روغتون شاته چې کورونه دي له دې کورونو جګړه کوي."

تر دې مخکې د ارزګان د والي ویاند احمد شاه ساحل ازادي راډیو ته ویلي وو چې تېره شپه افغان هوايي ځواکونو د دهراود بازار په شااوخوا سیمو کې پر طالبانو هوايي بریدونه کړي او لږترلږه ۳۷ وسله‌وال یې وژلي دي.

د ساحل په وینا سیمې ته د طالبانو په شاه تبولو لپاره تازه نوي ځواکونه هم استول شوي دي.

طالبانو له تېرو دوو ورځو راهېسې د دهراود ولسوالۍ پر مرکز پراخ بریدونه پیل کړي دي.

خپله طالبانو د د هراود د وروستۍ جګړې په اړه تبصره نه‌ده کړې.

اذربایجان، نګورنو قره‌باغ کې د وژل شويو سرتېرو مړي ارمنستان ته وسپارل

دواړو لوریو د دغو مړو د سپارل کېدو خبر تأیید کړی دی.  

اذربایجان د هغو ۲۹ سرتېرو مړي چې په لانجمنه سیمه نګورنو قره باغ کې د جګړې په نتیجه کې وژل شوي وو، ارمنستان ته پرون وسپارل.

دواړو لوریو د دغو مړو د سپارل کېدو خبر تأیید کړی دی.

دا په داسې حال کې ده، چې باکو او یریوان یو او بل د هغه درېیم اوربند په ماتولو تورنوي، چې د واشنګټن په منځګړیتوب ورباندې موافقه شوې وه.

د ارمنستان د دفاع وزارت ویاند وویل، یریوان یو وار بیا چمتو دی، چې د اذربایجان د سرتېرو مړي هغه هېواد ته تسلیم کړي.

تمه کېده چې د دواړو هېوادونو د بهرنیو چارو وزیران د منسک ډلې دغه راز د اروپا د امنیت او همکارۍ سازمان له استازو سره پرون په ژنیف کې وګوري، خو وروسته راپورونه راغلل چې دغه کتنه لږترلږه د یوې ورځې لپاره ځنډول شوې ده.

پر لانجمنه سیمه نګورنو قره‌باغ د اذربایجان او ارمنستان جګړه د سپټمبر پر ۲۷مه، پیل شوه.

فرانسه کې امنیتي احضارات تر ټولو لوړې سطحې ته پورته شول

فرانسه کې له برید وروسته د امنیت خوندیتوب

وروسته له هغې چې د فرانسې په یوه کلیسا کې یوه حمله کوونکي په چړې درې کسان ووژل، په دغه هېواد کې امنیتي احضارات تر ټولو لوړې سطحې ته پورته شول.

د فرانسې ولسمشر امانویل مکرون پرونۍ پېښه "یوه اسلام‌پاله تروریستي" حمله بللې ده.

بل‌خوا د فرانسې صدراعظم ژان کاستکس په دغه هېواد کې د نیس کلیسا په شااوخوا کې د وسله‌والو پولیسو د یوه کمرند په ایجاد سره د احضاراتو شدت زیات کړ.

حمله کوونکي چې د الله اکبر نارې وهلې د پولیسو په ډزو ټپي شو.

بلاروس له روسیې پرته ټولو ګاونډیو سره پولې وتړلې

د بلاروس بیرغ

بلاروس له روسیې پرته له نورو ګاونډیو هېوادونو سره خپلې پولې وتړلې.

دغه اقدام د الکساندر لوکاشینکا تر هغو هڅو وروسته کېږي چې په بلاروس کې پر لارو او سړکونو د مظاهرو د ختمولو لپاره یې پیل کړې دي.

مظاهرې د بلاروس د ولسمشرۍ د لانجمنو ټاکنو د نتایجو پرخلاف چې لوکاشینکا یې په نتیجه کې بریالی اعلان شوی، پیل شوي دي.

د دغه هېواد د سرحدونو د کنټرول کمېټې پرون د هغه څه په پلمه چې دوی د کرونا وبا بللې، له لاتویا، لتوانیا، پولنډ او اوکراین سره د خپلو سرحدونو د تړلو خبر ورکړ.

خو داسې ګنګوسې دي، چې دغه اقدام ښايي سیاسي انګېزه ولري.

د سرحدونو د کنټرول کمېټې ویلي، یوازې د بلاروس وګړي او باروړونکي موټر کولای شي، د ځمکنیو چک پاینټونو له لارې دغه هېواد ته ننوځي.

د بلغاریا جمهور رئيس ځان قرنطین کړ

د بلغاریا ولسمشر رومن رادف

د بلغاریا جمهور رئیس وروسته له هغې ځان قرنطین کړ چې د دفتر رئیس یې په کرونا ویروس اخته وبلل شو.

د دې هېواد جمهوري ریاست ویلي د جمهور رئیس رومن رادف د دفتر رئیس ډیمېټار ستویانوف د پنجشنبې په ورځ په 'کوویډ-۱۹' ویروس اخته تشخصی شو.

د بلغاریا د جمهوري ریاست په وینا ستویانوف د اکټوبر له ۲۶ مې نیټې راهېسې دفتر کې نه‌و او د جمهوري ریاست له کارمندانو سره یې وروستی تماس درې ورځې کې مخکې وو.

د دې هېواد صدراعظم بویاکو بوریسوف او د مرکزي بانک رئیس یې ډېمېټر راډیف هم په 'کوویډ-۱۹' د اخته کېدو له کبله په قرنطین کې دي.

بلغاریا پرون په دې هېواد کې د کرونا ویروس د خپرېدو د مخنیوي لپاره پوهنتونونه، لېسې او شپني کلپونه د دوو اوونیو په مخه وتړل.

په دې هېواد کې تر اوسه تر ۴۵ زرو زیات کسان په کرونا اخته شوي چې نږدې ۱۲ سوه تنه‌یې دې ناروغۍ وژلي دي.

پروان کې ۵ تنه د یوه ځوان د وژلو په تړاو نیول شوي

ارشیف

پروان کې چارواکي وايي، پنځه تنه‌یې د یو ۲۸ کلن کس د وژلو په تړاو نیولي دي.

د پروان د امنیې قومندانۍ د مطبوعاتي دفتر مشر سلیم نوري ازادي راډیو ته وویل، پولیسو دا کسان د چاریکار ښار په یوولسمه ناحیه کې د پنجشنبې په ورځ نیولي دي.

راپورونه وايي تر دې دوه ورځې مخکې یو ځوان هلک په چاریکار کې په ډزو وژل شوی و.

د دې پېښې علت او انګیزه تر اوسه روښانه نه‌ده.

چارواکي: بدخشان کې هوايي بريد ۲۰ وسله‌وال طالبان ووژل

ارشیف، د افغان ځواکونو هوايي حمله

د بدخشان ولایت چارواکي وايي، د بر یفتل په دوابه سیمه کې پرون چهارشنبه شل تنه وسله‌وال طالبان په هوايي برید کې ووژل شول.

د بدخشان ولایت د امنیه قوماندانۍ ویاند ثناالله روحاني ازادي راډیو ته په دې اړه وویل: "هوايي ځواک پر هغو سنګرونو چې په‌خوا د ولسي پاڅونوالو وو او طالبانو هغه سیمه نیولې وه، برید وکړ چې د طالبانو نږدې ۳ مورچې ویجاړې شوي او د دولت ۲۰ وسله‌وال مخالفان وژل شوي او ۷ نور ژوبل شوي دي"

طالبانو په دې اړه څه نه‌دي ویلي.

د راپورونو له مخې طالبانو نږدې دوې اوونۍ وړاندې د بدخشان ولایت د مرکز فیض اباد ښار په اتمه حوزه کې د بریفتل سیمه ونیوله.

د کاپیسا امنیه قوماندان له دوو نورو سره په یوه غلچکۍ حمله کې ټپي شو

د کاپیسا ولایت امنیه قوماندان فرید احمد مشعل

د کاپیسا ولایت امنیه قوماندان فرید احمد مشعل له دوو تنو نورو سره د طالبانو په یوه غلچکۍ حمله کې ټپي شو.

د کاپیسا د امنیه قوماندانۍ ویندوی عبدالشایق شورش ازادي ته وویل چې دا پېښه پرون مازدیګر وشوه.

هغه زیاته کړه: "قوماندان صاحب د اله‌سای ولسوالۍ د لیدو لپاره تللی و، کله چې بېرته راستنېدو د اله‌سای او تګاب ترمنځ د کورغل په سیمه کې د دښمن له لوري غلچکۍ برید وشو، دوه ساعته جګړه وشوه او له بده مرغه قوماندان صاحب، د پولیسو د امنیت مدیر او یو سرتېری سرسري ټپیان شول او د قوماندان صاحب چلوونکی شهید شو."

طالبانو د دې پېښې په اړه لا څه نه‌دي ویلي.

هند کې په کرونا ویروس د اخته کسانو شمېر تر ۸ میلیونو زیات شو

هند کې روغتیايي کارکوونکي د کرونا ویروس د ناروغانو د موندلو لپاره د ازموینې پر مهال.

په هند کې نن په کرونا ویروس د اخته کسانو شمېر تر ۸ میلیونو واوښت.

تر اوسه پورې په دغه هېواد کې چې یو میلیارد او ۳۰۰ میلیونه نفوس لري، یو لک او ۲۰ زره تنه په دې وبا مړه شوي.

اوس تر هند یوازې د امریکا په متحده ایالاتو کې د کرونا پېښې ډېرې دي.

د امریکا حکومت د شمېرو له مخې، په دې هېواد کې د کرونا ۹ میلیونه او ۱۰۰ زره مثبتې پېښې ثبت شوې دي.

د اذربایجان او ارمنستان د بهرنیو چارو وزیران د مېنسک غونډه کې ګډون کوي

د اذربایجان او ارمنستان د بهرنیو چارو وزیرانو په شمول د مېنسک ډلې یو شمېر غړي

ټاکل شوې چې د اذربایجان او ارمنستان د بهرنیو چارو وزیران نن په هغه غونډه کې ګډون وکړي چې د مېنسک ډلې په مشرۍ جوړېږي.

د امریکا متحده ایالات، فرانسه او روسیه په ګډه د مېنسک ډلې مشري کوي.

د نګورنو قره‌باغ د بېلې شوې سیمې پر سر د اذربایجان او ارمنستان ترمنځ په جګړه کې مرګ‌ژوبلې په زیاتېدو دي.

دواړه خواوې یو بل د امریکا په منځګړیتوب د شوي اوربند په سرغړونې تورنوي.

'زلمي خلیلزاد او سکاټ مېلر له ملا عبدالغني برادر سره لیدلي'

ارشیف، زلمی خلیلزاد په قطر کې له یو شمېر طالب چارواکو سره د لیدو پر مهال.

د طالبانو د قطر دفتر ویاند وايي، د افغانستان د سولې لپاره د امریکا ځانګړي استازي زلمي خلیلزاد او د امریکايي ځواکونو عمومي قوماندان جنرال سکاټ مېلر د طالبانو د سیاسي دفتر له مشر ملا عبدالغني برادر سره وکتل.

د محمد نعیم په وینا په دې کتنه کې چې پرون ماښام په دوحه کې وشوه، دواړو خواوو د امریکا او طالبانو د موافقې د تطبیق، د طالبانو د نورو بندیانو د خلاصون، له تورو لېستونو د طالب مشرانو د نومونو د ایستلو او د جګړې د زیاتېدو پر عواملو خبرې وشوې.

وسله‌والو طالبانو په وروستیو کې د افغانستان په بېلابېلو سیمو کې خپلې جګړې ته زور ورکړی دی.

امریکا ۸ تنه د چین له حکومت سره په همکارۍ او جاسوسۍ تورن کړل

ارشیف، د امریکا او چین بیرغونه

د امریکا د عدلیې وزارت پرون (چهارشنبه) ۸ تنه د چین له حکومت سره په همکارۍ او جاسوسۍ تورن کړل.

د امریکا د عدلیې وزارت او «اېف بي ای» چارواکو په یوه خبري غونډه کې وویل، په دې تړاو ۵ تنه په نیویارک، نیوجرسي او کالیفورنیا کې د چین د حکومت لپاره د جاسوسۍ په تور نیول شوي.

ویل کېږي چې ۳ نور تورن کسان په چین کې دي.

نور راوښيه

XS
SM
MD
LG