پاکستان وایي چې د تورخم او چمن سرحدي لارې د دې لپاره خلاصوي چې د ملګرو ملتو د دریو ادارو له لورې افغانستان ته بشري مرستې ورسیږي.

د پاکستان د سوداګرۍ وزارت نن په یوه اعلامیه کې ویلي دي چې دا لارې به د تجارت، ترانزیټ کارګو او نورو مسافرو لپاره تړلې پاتې شي.

د پاکستان او افغانستان ترمنځ پنځه تجارتي لارې د اکتوبر په دولسمه وروسته تر دې وتړل شوې چې د پاکستاني ځواکونو او افغان طاابانو ترمنځ د اکتوبر په یولسمه جګړه وشوه، د دې جګړې په ترڅ کې دواړو لوریو ته په لسګونو کسان ووژل شول.

نژدې درې اونۍ مخکې د طالبانو د ریاست الوزرا اقتصادي مرستیال ملا عبدالغني برادر تور پورې کړ چې پاکستان له تجارتي مواردو سیاسي استفاده کوي نو له پاکستان سره به تجارتي لارې وروسته له هغه خلاصې شي چې اسلام اباد دا تضمین ورکړي چې په هیڅ ډول حالاتو او شرایطو کې به بیا دا لارې نه بندوي.

د ۲۰۲۶ کال کرکټ د شل اوره نړیوال جام سیالیو په ترڅ په پام کې ده چې نن دوشنبې ایټالیا له سکاټلنډ، عمان له زیمبابوې اوکاناډا له جنوبي افریقا سره مخامخ شي. په دې جام کې افغانستان خپله لومړنۍ لوبه پرون یکشنبې نیوزیلنډ ته وبایلله.

لوبه افغانستان پیل کړه او د ۶ لوبغاړو په زیان سره یې نیوزیلنډ ته د ۱۸۳ منډو هدف وټاکه. نیوزیلنډ دا هدف په اتلسم اوور کې پوره کړ.

د افغانستان بله لوبه د راتلونکې چهارشنبې په ورځ له جنوبي افریقا سره پلان شوې ده.

د افغانستان د هواپېژندنې ادارې نن دوشنبې د افغانستان په ۲۷ ولایتونو کې د واورې او باران د ورېدو اټکل کړی.

د طالبانو د حکومت د ترانسپورت او هوايي چلن وزارت پرون یکشنبې پر خپله ایکس پاڼه د یوه بیان په خپرولو سره د هواپېژندنې ملي ادارې په حواله خبر ورکړی چې له کونړ، بدخشان، تخار، کندز، بلخ، جوزجان او نیمروز پرته په پاتې ټولو ۲۷ ولایتونو کې د درنو واورو او بارانونو احتمال شته.

د سږني کال په مرغومي او سلواغې میاشتو کې د هېواد په بېلابېلو ولایتونو کې درنې واورې او بارانونه وشول چې خلک یې د وچکالۍ پای ته رسېدو ته هیله من کړي خو دې ورښتونو په عین حال خلکو درانه ځاني او مالي زیانونه هم اړولي دي.

د ایران یوې محکمې د نوبل د سولې جایزې ګټونکې نرګس محمدي په څو کلونو بند او تبعید محکومه کړه.

د هغې مدافع وکیل مصطفی نیلي د یکشنبې په ورځ د سلواغې په ۱۹مه اعلان وکړ چې د مشهد انقلابي محکمې نرګس محمدي په اووه نیم کاله بند، له هېواده د وتلو په بندیز او تبعید محکومه کړه.

ښاغلي نیلي پرخپله ایکسپاڼه کې په یوه بیان کې وویل: "هغه د غونډو اوتوطیې په تور په شپږ کاله بند، د تبلیغاتي فعالیتونو په تور په یو نیم کال بند او د تکمیلي سزا په توګه دوه کاله له هېواده پر وتلو په بندیز او دوه کاله هم د خوسف ولسوالۍ ته په تبعید محکومه شوې ده."

هغه وویل چې میرمن محمدي د مشهد له امنیتي توقیف ځای څخه په ټیلیفوني تماس کې خبر ورکړ او ویې ویل چې هغه د شنبې په ورځ د مشهد د انقلابي محکمې لومړۍ څانګې ته احضارشوې وه او د محکمې له غونډې وروسته ورته دغه سزا واورول شوه.

نرګس محمدي او د بشري حقونو څو نور فعالان په تیره ډسمبرمیاشت کې په مشهد کې د وکیل او د بشري حقونو د فعال خسرو عليکردي د یادغونډې پر مهال نیول شوي وو.

د ایران د بشري حقونو یوې ډلې د ایران په یوه زندان کې د یو افغان د اعدام خبر ورکړی دی.
د «هە نگاو» په نوم د بشري حقونودې سازمان د یکشنبې په ورځ په یوه راپورکې وویل چې دا افغان، چې احمد فرهاد نومېده، د کرج په قزل ‌حصار زندان کې اعدام شوی دی.

په راپورکې ویل شوي چې نوموړی د هرات اوسېدونکی و چې شپږ کاله مخکې د عمدي قتل په تور له نیول کیدو وروسته په اعدام محکوم شوی او پرهغه دغه سزا د ۲۰۲۵ کال په ډسمبرمیاشت کې تطبیق شوې.

هە نگاو، چې په ناروې کې مېشت دی، وایي چې له دې افغان سره یو ځای څلور نور بندیان هم اعدام شوي دي.

شاوخوا پنځه اوونۍ مخکې یو بل افغان تبعه چې امین نومېده هم د کرج په قزل ‌حصار زندان کې اعدام شوی و.

د طالبانو د حکومت د پریکړې له مخې نن دوشنبې د سلواغې یا دلوې شلمه له پاکستانه د درملو پر وارداتو بشپړ بندیز ولګید.

د طالبانو د مالیې وزارت د سلواغې د میاشتې په لومړۍ نیټه د درملو له واردوونکوغوښتي و چې تر ۱۹ ورځو پورې خپلې ټولې معاملې او اسناد تصفیه کړي. مالیې وزارت هغه مهال اعلان وکړ چې له پاکستانه واردیدونکي درمل د سلواغې له شلمې نیټې وروسته د هیواد په ګمرکونو کې نه محصول کیږي.

د طالبانو د حکومت د ریاست الوزرا اقتصادي مرستیال ملا عبدالغنی برادر په تیره لړم میاشت کې په کابل کې یوې غونډې ته وویل چې د مالیې وزارت ته یې امرکړی چې له دریو میاشتو وروسته له پاکستانه درملو ته د واردیدو اجازه ورنکړي. هغه همدارنګه وویل چې افغان سوداګردرې میاشتې وخت لري چې له پاکستاني لوري سره خپل سوداګریز تړونونه پای ته ورسوي.

په افغانستان کې د درمل پلورونکو د اتحادیې مشر یعقوب منګل د روانې سلواغې میاشتې په لومړیو کې ازادي راډیو ته وویل چې له دغه اعلان مخکې د افغانستان د اړتیا وړ ۶۰ سلنه درمل له پاکستانه واردیدل خو دوی هڅه کوي چې د درملو نیمګړتیاوې د هند، چین، بنګله دیش او مالیزیا څخه پوره کړي. په عین حال کې له پاکستانه د درملو پروارداتو د بندیز له اعلان وروسته په افغانستان کې د یوشمیر درملتونونو خاوندانو ازادي راډیو ته وویل چې دغه اعلان په بازارونو کې د درملو د کموالي سبب شوی او هم ورسره د درملو بیې لوړې شوې دي.

د هېواد د هواپېژندنې ادارې سبا دوشنبې (د سلواغې ۲۰مه) له ۷ ولایتونو پرته د هېواد په نورو ټولو ولایتونو کې د واورې او باران د ورېدو اټکل کړی.

د طالبانو د حکومت د ترانسپورت او هوايي چلن وزارت نن پر خپله ایکس پاڼه د یوه بیان په خپرولو سره د هواپېژندنې ملي ادارې په حواله خبر ورکوي چې له کونړ، بدخشان، تخار، کندز، بلخ، جوزجان او نیمروز پرته په پاتې ټولو ۲۷ ولایتونو کې د درنو واورو او بارانونو احتمال شته.

د سږني کال په مرغومي او سلواغې میاشتو کې د هېواد په بېلابېلو ولایتونو کې درنې واورې او بارانونه وشول چې خلک یې د وچکالۍ پای ته رسېدو ته هیله من کړي خو دې اوریاوو په عین حال خلکو درانه ځاني او مالي زیانونه هم اړولي دي.

ټاکل شوې چې د اسراییل صدراعظم بنیامین نتنیاهو به د امریکا له ولسمشر ډونالډټرمپ سره د خبرو لپاره د چارشنبې په ورځ واشنګټن ته ولاړ شي.

د اسراییل د صدراعظم دفتر د شنبې په ورځ اعلان وکړ چې نتنیاهو به له ایران سره د امریکا د خبرو په اړه خبرې وکړي.

د امریکا او ایران استازو د تېرې جمعې په ورځ د عمان په پلازمېنه مسقط کې مذاکرات وکړل.

ولسمشر ټرمپ ویلي دي چې دا مذاکرات ډېر ښه وو، او دوام به وکړي. ښاغلي ټرمپ د جمعې په ورځ خبریالانو ته وویل چې ایران د توافق په لټه کې دی خو هغه په عین حال کې ګواښ وکړ چې که توافق ونه کړي نو ناوړه عواقب به ولري.

د عمان له مذاکراتو یوه ورځ وروسته د ایران د بهرنیوچارو وزیر عباس عراقجي له الجزیرې ټلویزیون سره په مرکه کې له امریکا سره د مذاکراتو د دوام پر اړتیا د ټینګار ترڅنګ خبرداری ورکړ چې د واشنګټن د برید په صورت کې به په سیمه کې د امریکا پوځي اډې په نښه شي.

د ګډو رزمي ورزشونو لوبغاړو فریدبشارت او ورور یې جاوید بشارت تېره شپه د UFC د مشهور سازمان په چوکاټ کې خپلې لوبې وګټلې.

په لاس ویګاس کې له برازیلي لوبغاړي جیان ماڅوموتو سره د فریدبشارت لوبه د بېګانیو سیالیو مرکزي برخه وه چې فرید د جیوري د پرېکړې په اساس وګټله.

فریدبشارت تراوسه ۱۵ لوبې کړي او ټولې یې ګټلې دي.

د فرید ورور، جاوید بشارت هم تېره شپه له مکسیکويي جیاني وازکیز سره لوبه درلوده چې هغه هم د جیوري د پرېکړې په اساس سیالي وګټله.

جاویدبشارت ټولې ۱۷ سیالۍ کړي چې ۱۵ یې ګټلي او ۲ یې بایللې دي.

په افغانستان کې د م. م مرستندوی ماموریت یا یوناما وايي چې د تېر ۲۰۲۵ کال د اکټوبر او نوامبر میاشتو ترمنځ د پرځېدلي جمهوري نظام لږترلږه ۱۴ سرتېري په دې هېواد کې وژل شوي دي.

یوناما په افغانستان کې د بشري حقونو د وضعیت په اړه په خپل تازه راپور کې چې نن (د سلواغې ۱۹مه) خپور شو ویلي دي چې په همدې موده کې یې د پخوانیو پوځیانو د خپلسرو نیونو لږترلږه ۲۸ او له هغوی سره د ناوړه چلند یا شکنجې ۷ موارد ثبت کړي دي.

د یوناما د راپور له مخې دا کسان تازه له ایران او پاکستانه افغانستان ته ستانه شوي وو. راپور همداراز زیاتوي چې د ډسمبر په ۹مه د پروان ولایت په دوبندي او سنګي خېلو سیمو کې له پخواني دولت سره تړلي دوه کسان هم په جلا پېښو کې د ناپېژاندو وسله والو په ډزو وژل شوي دي.

پر افغانستان د طالبانو له بیاواکمنېدو وروسته د تېر پرځېدلي نظام د امنیتي او دفاعي ځواکونو یوشمېر غړي د پاکستان او ایران په ګډون ګاونډیو هېوادونو ته وتښتېدل.

د طالبانو حکومت تراوسه د یوناما د تازه راپور په اړه څه نه دي ویلي خو مخکې له دې یې د دې ډلې له خوا د پخوانيو پوځیانو د وژنو، نیونو او شکنجو اړوندې ادعاوې رد کړي دي.

د بشري حقونو ډلې وايي طالبان د عمومي عفوې له اعلان سره سره د پخواني دولت د چارواکو او پرسونل غچ اخیستونکو وژنو او جبري لادرکه کولو ته دوام ورکوي.

د افغانستان د کرکټ ملي لوبډلې په شل اووریز نړیوال جام کې نن خپله لومړۍ لوبه نیوزیلنډ ته وبایلله.

لوبه افغانستان پیل کړه او په ټاکلو ۲۰ اوورونو کې یې د ۶ لوبغاړو په زیان سره ۱۸۲ منډې جوړې کړې.

د نیوزیلنډ ملي لوبډلې دا هدف په اتلسم اوور کې د پنځو ویکټو په زیان پوره کړ او لوبه یې د پنځو ویکټو او ۱۳ بالونو په سپمولو سره وګټله.

د هند او سریلانکا په کوربه توب د ۲۰۲۶ کال د شل اووریز کرکټ نړیوال جام پرون (د فبروري ۷مه) پیل شو.

په دې جام کې ۱۶ هېوادونه په څلورو ګروپونو کې د مارچ تر اتمې پورې سیالي کوي. افغانستان له کاناډا، نیوزیلنډ، جنوبي افریقا او متحده عربي اماراتو سره په ډي ګروپ کې دی او دا یې لومړۍ لوبه وه.