د لاسرسۍ وړ لېنکونه

تازه خبر
چهارشنبه ۷ لړم ۱۳۹۹ کابل ۰۶:۱۴

کابل کې د سولې لپاره د ملي اجماع جوړېدو په هدف ناسته وشوه


ارشیف

د افغانستان د ځوانانو د سولې غږ موسسې، د سولې لپاره د حکومت او سیاسي ګوندونو ترمنځ د ملي اجماع د جوړېدو په هدف د یکشنبې په ورځ کابل کې د نظرونو د راټولو یوه ناسته جوړه کړې وه.

د سولې لپاره د حکومت او سیاسي ګوندونو ترمنځ د ملي اجماع د جوړېدو لپاره د سیاستوالو د نظرونو د راټولو په ناسته کې ټینګار وشو چې دولت، سیاسي ګوندونه او د دولت سیاسي مخالفین دې د سولې په مذاکراتو کې شخصي او ګوندي ګټې نه بلکې، ملي ګټي په پام کې ونیسي.

دا ناسته د یکشنبې په ورځ د افغانستان د ځوانانو د سولې غږ موسسې له خوا جوړه شوې وه.

د ناستې ګډونوال په دې نظر وو چې د سولې د بهیر لپاره دولت او سیاسي ګوندونه تر اوسه نه دي توانېدلي چې د سولې لپاره د یوې واحدې طرحې د جوړولو په هدف اختلافونه له منځه یوسي.

دوی ویل، که دغه ستونزه په مشوره او د ځانه د تېرېدنې له اصولو سره سمه هواره نه شي، د سولې راتلونکي مذاکرات به نتیجه ورنه کړي.

ځینو ګډون والو په دې هم ټینګار وکړ چې دولت دې د سولې په مذاکراتو کې سیاستوال او د ټولنې نور قشرونه له پامه نه غورځوي او سیاستوال دې هم په دغه مذاکراتو کې د دولت د نفې کولو فکر له سره وباسي.

د یادې ناستې ګډونوال او د سولې د عالي شورا د دارلانشا مخکینی رئیس محمد عمر داوودزي وویل، له طالبانو سره د سولې طرحه د سولې په چارو د دولت په وزارت کې موجوده ده او سیاستوال، مدني ټولنه او د هېواد نور قشرونه کولی شي خپلې طرحې دغه وزارت ته وړاندې کړي.

د سولې د عالي شورا د دارلانشا مخکینی رئیس محمد عمر داوودزی
د سولې د عالي شورا د دارلانشا مخکینی رئیس محمد عمر داوودزی

ده وړاندې وویل: "د دولت دریځ چې په کومه بڼه په مطبوعاتو کې بیانېږي ما حیرانوي ځکه د دولت له دریځه سم برداشت نه وي شوی، یابه دولت کې نیمګړتیاوي وي چې سم یې نه دی بیان کړی خو د دولت دریځ دادی چې ولسمشر ویلي د سولې مذاکراتو ته پرته له قیدو شرطه ځم اوس هم هماغه دریځ دی، خو ولې په کې د اوربند موضوع رامنځته شوه، ایا د اوربند غوښتل ګناه ده؟

ښاغلي داوودزي دا هم وویل کله چې نوی ولسمشر اعلان شي دوه اوونۍ ورسته به د سولې د خبرو په اړه لویه جرګه راوغوښتل شي.

د افغانستان د سولې او جنګ د بنسټ رئیس تمیم عاصي وویل: "د سولې د تعریف لپاره یوه ګډه اجماع نه شته، سوله د کرزي صاحب لپاره یو څه، د ډاکتر صاحب غني لپاره بل څه، د ډاکتر عبدالله لپاره بل او د حکمتیار لپاره بل څه ده، د جمهوریت په کچه ورته هم یوه اجماع نه لرو، باید د دې لپاره یو ګډ مېکانیزم جوړ او تعریف شي."

د افغانستان د سولې او جنګ د بنسټ رئیس تمیم عاصي
د افغانستان د سولې او جنګ د بنسټ رئیس تمیم عاصي

ښاغلي عاصي په دې هم ټینګار وکړ چې د سولې په بهیر کې د افغانستان د وسله والو مخالفینو تمویلوونکي او ملاتړی هم ښکېل او تضمین یې واخیستل شي.

د ناستې ځینو ګډون والو داهم وویل چې له طالبانو سره د مذاکراتو او د سولې د هوکړې وروستی لاسلیک د افغانستان د ولسمشر "که هرڅوک وي" حق او صلاحیت یې دی خو په دې شرط چې دولت د سولې مذاکراتو او هوکړې ته د رسېدو لپاره، د هېواد دټولو قشرونو او سیاستوالو رضایت ولري.

په همدې ورځ په کابل د حراست او ثبات شورا هم په یوې خبري ناسته کې د سولې د بین الافغاني مذاکراتو لپاره د یوې واحدې اجنډا په جوړولو ټینګار وکړ.

د دغه شورا ویاند مسعود ترشوال وویل، د افغانستان د سولې په اړه د بهرنیانو لخوا جوړې شوې طرحې د منلو نه دي.

دا په داسې حال کې ده په دې وروستیو کې د افغانستان د مخکیني ولسمشر حامد کرزي په ګډون یو شمیر سیاسیونو او مدني ټولنې د سولې لپاره بېلابېلې طرحې جوړي کړې خو ویل کېږي تر اوسه هم په دغو طرحو یو واحد نظر نه دی رامنځته شوی.

XS
SM
MD
LG