د لاسرسۍ وړ لېنکونه

تازه خبر
دوشنبه ۷ سلواغه ۱۳۹۸ کابل ۱۱:۳۵

خبرونه

ايران وايي اوکراينۍ الوتکه د ايران په توغندي نه ده لګېدلې

د الوتکې ټوټې

ايران د لوېديځ هغه ادعاوې په کلکه رد کړې چې په کې ويل شوي د اوکراين هوايي شرکت الوتکه د ايران په ميزاييل نسکوره شوې ده.

تېره چهارشنبه تهران ته نږدې دغه الوتکه تر الوتنې وروسته نسکوره شوه چې په نتيجه کې يې د لسو افغانانو په ګډون يو سل او شپږ اويا کسان مړه شول.

د پېښې د علت معلومولو لپاره د الوتکې پر ټوټو د ايران او اوکراين له خوا تحقيقات روان دي.

که څه هم د امريکا متحدو ايالتونو، بريتانيا او کاناډا رهبرانو ويلي چې استخباراتي معلومات ښيي چې د ايران د هوايي مدافع د ځواک ويجاړوونکې سهوه، د الوتکې د نسکورېدو سبب شوه.

خو د ايران د هوايي چلن ادارې مشر علي عابدزاده نن په يوه کنفرانس کې وويل:

”قطعاً کوم توغندى پر الوتکې نه دى لګېدلى. دا چې په الوتکه کې د اورلګېدو علت څه و، دا موضوع تعقيبېږي.“

د عابدزاده تر دغو څرګندونو څو ساعته مخکې تهران د اوکراين تحقيق کوونکو ته اجازه ورکړه چې د الوتکې ټوټې وګوري.

ايران دغه راز بوينګ شرکت او د امريکا د حوادثو د څېړلو ادارې ته بلنه ورکړې، چې د دې الوتکې د نسکورېدو د قضيې په څېړنه کې همکاري وکړي.

د ورځې تازه خبرونه دلته ولولئ

۱۰میلیونه افغان ماشومانو ته د پولیو ضد واکسین تطبیقېږي

ارشیف

نن ( دوشنبه) د افغانستان د عامې روغتیا وزارت د هېواد په ۳۰ ولایتونو کې د پولیو یا ګوزڼ ضد واکسین کمپاین پیل کړ.

د عامې روغتیا وزارت د پولیو ضد کمپاین د پروګرام مسول هدایت الله ستانکزي ازادي راډيو ته وویل، چې د دغه کمپاین په ترڅ کې به نږدې لس میلیونه ماشومانو ته د پولیو ضد واکسین ورکړل شي.

هغه زیاته کړه: "د دې کمپاین په ترڅ کې به نږدې لس میلیونو ماشومانو ته واکسین وشي خو له بده مرغه د دولت ضد وسله والو له لوري د هغو بندیزونو له امله چې د پولیو ضد کمپاین باندې لګول شوي او امنیتي ستونزو له کبله به یو شمېر ماشومان له دغه واکسین څخه بې برخې پاتې شي."

خو طالب ویاند ذبیح الله مجاهد ازادي راډيو ته په یو استول شوي غږیز پیغام کې ویلي، چې دوی د ګوزڼ یا پولیو ضد واکسین او کمپاین پر وړاندې ستونزې نه لري او د روغتیا نړیوال سازمان سره د خبرو او هوکړو له مخې په دې برخه کې همکار دي.

د عامې روغتیا وزارت د معلوماتو پر بنسټ په څلور ولایتونو کې غور، بامیان، دایکندي او غزني کې د ورښتونو او لارو د بندښت له امله دا واکسین اوس نه بلکې د روان میلادي کال په مارچ میاشت کې طبیقېږي.

د هدایت الله ستانکزي په خبره، په ۲۰۱۹ میلادي کال کې د ټول افغانستان په کچه د پولیو ۲۹ مثبتې پېښې ثبت شوي چې ډېری دغې پېښې د هېواد په جنوبي ولایتونو کې دي خو په ۲۰۱۸ کال کې بیا ۲۱ مثبتې پېښې ثبت شوې وې.

د عامې روغتیا وزارت د معلوماتو له مخې، دا مهال په ټول هېواد کې ۳۶۰۰ روغتیایي مرکزونه او ۷۰ زره رضا کاره واکسیناتوران روزل شوي، چې هم په په روغتیایي مرکزونه او هم کور په کور دغه واکسین افغان ماشومانو ته ورسول شي.

د هند کرکټ لوبډلې ته د پاکستان کرکټ بورډ خبرداری

د پاکستان کرکټ بورډ

د پاکستان د کرکټ بورډ مرستيال وسيم خان وايي، که هندۍ لوبډله د اسيا کپ پر مهال په پاکستان کې لوبو ته زړه ښه نه‌کړي، نو د دوی لوبډله به هم د ۲۰۲۱ میلادي کال ۲۰ اوريز نړيوالو لوبو لپاره هندوستان ته ولاړه نه‌شي.

وسيم خان نن په لاهور کې خبريالانو ته وويل، پاکستان چمتو دی چې په ډاډمنه فضا کې نړيوال کرکټ ترسره کړي.

په همدې حال کې بیا د افغانستان کرکټ بورډ وايي، که چېرې د کرکټ اسیايي شورا پرېکړه وکړي چې دغه کپ په پاکستان کې ترسره شي، نو افغان لوبډله به په دغو سیالیو یې کې ګډون وکړي.

د هندوستان کرکټ بورډ لا تر اوسه په دې اړه څه نه‌دي ويلي، خو د دواړو هېوادونو د سياسي او ډيپلوماتيکو اړيکو د ترینګلتیا له کبله هند او پاکستان يوازې په ليګونو او ټورنمنټونو کې سره مخ کېږي.

هندۍ لوبډله تر ۲۰۰۸ میلادي کال وروسته د ټسټ لوبو لپاره پاکستان ته نه‌ده تللې.

د افغانستان د ښځینه فوټسال لوبډلې له ازبکستان ماتې خوړلې

د افغانستان د فوټسال د ښځو ۱۹ کلنې لوبډله

د افغانستان د ښځینه فوټسال ۱۹ کلنو لوبډلې د منځنۍ اسیا د فوټسال د ۱۹ کلنو ښځینه لوبډلو په سیالیو کې، خپله درېیمه لوبه هم ازبکستان ته وبایله.

د افغانستان د فوټبال فدراسیون د خپرونو مرستیال شمس امیني نن ازادي راډيو ته وویل، افغانستان دغه لوبه ۳ د صفر په وړاندې وبایلله.

افغانستان تر دې وړاندې له ایران او قرغزستان څخه هم ماتې خوړلي.

افغان لوبډله سبا خپله څلورمه لوبه له تاجکستان سره کوي.

کابل د نجونو والیبال سیالۍ پیل شوي

تزئیني بڼه لري، ارشیف.

د هرات د نجونو د والیبال انتخابي سیالۍ پیل شوې.

د دغه ولایت د بدني روزنې ریاست مسلکي او فني مدیر ضیاالحق ضیا نن ازادي راډيو ته وویل چې دغه لوبې د دې ولایت منتخب ټیم ته د غوره لوبغاړو د پېژندلو په هدف ترسره کېږي.

یادې سيالۍ به یوه اوونۍ دوام وکړي.

د ښاغلي ضیا په خبره، په دغو سیالیو کې اته لوبډلې په دوو ګروپونو کې سیالي کوي.

د امریکا ولسمشر او پخواني ملي امنیت سلاکار ترمنځ نوې لانجه

د امریکا ولسمشر ټرمپ او د هغه د ملي امنیت پخوانی سلاکار جان بولتون.

د امریکا د ملي امنیت پخواني سلاکار جان بولتون ادعا کړې چې ډونالد ټرمپ اوکراین ته د خپل سیاسي سیال په اړه د څېړنو نه‌کولو په غبرګون کې د مرستو د کنګلېدو ویلي دي.

د نیویارک ټایمز د راپور له مخې ښاغلي بولتون دغه تور په خپل هغه کتاب کې لیکلی چې لا چاپ شوی نه‌دی.

په دې کتاب کې ښاغلي بولتون ادعا کړې چې ډونالد ټرمپ ورته ویلي، له اوکراین سره هغه سلګونه میلیونه ډالره امنیتي مرسته به وځنډوي تر هغو چې څېړنو کې ورسره مرسته ونه‌کړي.

په دې څېړنو کې د ټرمپ د پخواني مرستیال جوبایډن او د هغه د زوی په اړه تحقیقات هم شامل و.

د ښاغلي ټرمپ حقوقي ټیم له دې وړاندې په وار وار ټینګار کړی چې ټرمپ هېڅکله د اوکراین مرستې په څېړنو پورې نه‌دي تړلي.

کندز کې د جوګي قوم ماشومانو ته د زده‌کړو زمینه برابرېږي

کندز کې د جوګي قوم ماشومان او د دې ولایت د پوهنې سیمه‌ییز مسؤلین. 1/27/2020

د افغانستان د پوهنې وزارت وایي، کندز ښار کې به د جوګي قوم لسګونه ماشومانو ته د لومړي ځل لپاره د زده‌کړو زمینه برابره شي.

دغه وزارت په یوه خبرپاڼه کې ویلي چې په کندز ښار کې ۶۲ جوګي کورنۍ اوسي چې شااوخوا ۱۰۰ ماشومان‌یې ښوونځیو ته له تګه بې‌برخې دي.

په خبرپاڼه کې راغلي چې په ټولو ولایتونو کې د دغه قوم د ماشومانو د پېژندلو سروې پیل شوې چې ښوونځیو ته د تګ لارې چارې ورته ولټول شي.

درې میاشتې وړاندې ازادي راډیو د دغه قوم د ستونزو په اړه یو راپور جوړ کړ چې هغه مهال پوهنې وزارت له خپله اړخه د دوی د ستونزو د هواري ډاډ ورکړ.

جوګیان څه باندې ۱۰۰ کاله وړاندې د منځنۍ اسیا له هېوادونو افغانستان ته راغلل چې دا مهال په ټول افغانستان کې د دوی شااوخوا ۲۰ زره کورنۍ مېشتې دي.

د بخښنې نړیوال سازمان: پاکستان دې ژر 'منظور پشتین' خوشې کړي

د پښتون ژغورنې غورځنګ مشر منظور پشتین

د بخښنې نړیوال سازمان د پښتون ژغورنې غورځنګ د مشر منظور پشتین د ژر تر ژره او بې‌قید او شرطه خوشې کېدو غوښتنه کړې ده.

دغه سازمان ویلي، منظور پشتین د بیان ازادۍ له حقه دفاع کوله او بې‌موجبه نیول شوی دی.

منظور پشتین تېره شپه په پېښور کې له یوه کوره پولیسو نیولی دی.

د پښتون ژغورنې غورځنګ د پاکستان پوځ په سلیقوي چلند تورن کړی او ویلي دي چې دغه پوځ ځیني کسان نیسي، خو د هغو ډلو ملاتړ کوي چې افغانستان کې جنګېږي.

پشتین د پاکستان پر پوځ او طالبانو نیوکې کولې او څو ځله‌یې د پاکستان د پوځ د کړنو پر ضد پراخ اعتراضونه رهبري کړي دي.

له دې وړاندې افغان حکومت او امریکا هم د پاکستان په حکومت نیوکې کړي چې د ترهګرو ملاتړ کوي، خو د پښتون ژغورنې غورځنګ لومړنی ځایي حرکت دی چې د پاکستان په حکومت تندې نیوکې کوي.

پاکستان د افغان بار وړونکو موټرو پر مخ د واګې بندر تړلی

ارشیف

پاکستان په یو نوي اقدام سره د افغان بار وړونکو موټرو پر مخ د واګې بندر تړلی دی.

د افغانستان د سوداګرۍ او پانګونې خونې ویاند جان اقا نوید نن ازادي راډيو ته وویل، له تېرو درېیو ورځو راهیسې په ډېر شمېر سره موټر راګرځول شوي دي.

ښاغلی نوید وايي، دغه بار وړونکي موټر د پاکستان واګې بندر له لارې ټرانزیت کېدل چې له هغه وروسته بیا هند ته تلل.

هغه زیاتوي: "بار وړونکي موټر اړ شوي چې کارونه ودروي، دا مهال د مېوو د صادراتو فصل و چې باید ډېر صادرات شوي وی، خو د دې لپاره چې ډېری موټر له پاکستان څخه بېرته راګرځول شوي بار وړونکي موټر درېدلي دي زموږ غوښتنه دا ده چې دا ستونزه ژر تر ژره هواره شي."

د ښاغلي نوید په خبره، دا مهال ډېری مېوې خرابې شوي او که چېرې یاده ستونزه هواره نه‌شي د باغ لرونکو ترڅنګ به سوداګرو ته هم ګڼ مالي زیانونه واوړي.

د افغانستان د سوداګرۍ او پانګونې خونې د چارواکو په وینا، که څه هم دغه ستونزه له اړوندو چارواکو سره شریکه شوې، خو لاهم نه‌ده هواره شوې.

خو ښاغلی نوید وايي، پاکستان ځکه په دې اقدام لاس پورې کړی چې د افغانستان د صادراتو وخت دی دغه هېواد هڅه کوي چې یاد بهیر زیانمن کړي.

د صنعت او سوداګرۍ وزارت تر اوسه په دې هکله څه نه‌دی ویلي.

پاکستان حکومت د پښتون ژغورنې غورځنګ مشر 'منظور پشتین' نیولی

د پښتون ژغورنې غورځنګ مشر منظور پشتین

د پاکستان پولیسو د پښتون ژغورنې غورځنګ مشر منظور پشتین نیولی دی.

د هغه د کورنۍ غړو ویلي چې نوموړی تېره شپه په پېښور کې په خپل کور کې و چې پولیسو پرې چاپه ووهله.

پشتین د پاکستان پر پوځ او طالبانو نیوکې کولې او څو ځله‌یې د پاکستان د پوځ د کړنو پر ضد د پراخو اعتراضونو مشري کړې ده.

له دې وړاندې افغان حکومت او امریکا هم د پاکستان په نظام نیوکې کړي چې د ترهګرو ملاتړ کوي، خو د پښتون ژغورنې غورځنګ لومړنی ځایي حرکت دی چې د پاکستان په حکومت تندې نیوکې کوي.

غزني کې د موسمي ناروغیو له امله د ماشومانو د مړینې زیاتوالی

د غزني د ښار یوه څنډه

په غزني کې د نورو کلونو په پرتله سږ کال د موسمي ناروغیو له امله د ماشومانو د مړینې په شمېر کې زیاتوالی راغلی دی.

حلیمه چې شااوخوا یو کلن ماشوم‌یې د غزني د ملکي روغتون په ودانۍ کې دننه د ماشومانو په واټ ته راوړی، وویل: "زه ډاکتر ته راغلې یمه، دغه نجلۍ مې ناروغه ده، ټول ماشومان مو ناروغان دي، یوه نیمه میاشت کېږي یو لېورزی مې د سینه بغل له وجې مړ شو، کوچنیان مو ټول مریضان دي."

د غزني د ملکي روغتون سرطبیب ډاکتر عبدالنصیر رامکي هم وايي چې د نورو کلونو په پرتله سږ کال د ماشومانو په موسمي ناروغیو کې زیاتوالی راغلی دي.

نوموړی زیاتوي: "دا کال د یخنۍ په خاطر موسمي ناروغۍ لکه سینه بغل او زکام په واقعیت سره هم ډېر دی، موږ ورته په روغتون کې تیاری درلود، د کوچنیانو واټ ۲۴ ساعته د ماشومانو په خدمت کې دی، ډېر ناروغان چې دلته روغتون ته راغلي دي، په ښه توګه‌یې درملنه شوې ده، هغه ناروغان چې له دې روغتونه پورته‌یې درملنې ته اړتیا وه موږ د امبولانسونو په ذریعه د کابل ملي روغتونونو ته استولي دي."

ډاکتر رامکي وايي، میندې باید خپلو ماشومانو ته د یخنۍ په موسم کې ګرم کالي ورواغوندي او ګرم کورني خواړه ورته تیار کړي.

د ده په خبره په دغه خوړو کې یخني، ښوروا، شیربرنج، ترکاریانې، دال، شور نخود او سابه ښه، ګټور او اقتصادي تمامېدای شي.

خلیل‌زاد له ارګ سره د سولې اړوند وروستي معلومات شریکوي

د افغانستان د سولې لپاره د امریکا ځانګړی استازی زلمی خلیل‌زاد.

یو جګپوړی امریکایي چارواکی وايي د امریکا او طالبانو ترمنځ د سولې د خبرو د پرمختګ په صورت کې به د افغانستان د سولې لپاره د امریکا ځانګړی استازی زلمی خلیل‌زاد له افغان حکومت سره د معلوماتو د شریکولو لپاره کابل ته ولاړ شي.

په افغانستان کې د غوڅ ملاتړ مأموریت عمومي قوماندان جنرال سکات مېلر پرون له ولسمشر اشرف غني سره په کتنه کې په دې اړه خبرې کړي.

ارګ په یوه بیان کې وايي، په دې کتنه کې په کابل کې د امریکا سفارت شارژدافیر راس وېلسون هم حاضر و.

بیان زیاتوي چې ولسمشر غني له امریکايي چارواکو سره په خبرو کې په ټول هېواد کې د اوربند د ټینګښت پر اړتیا ټینګار وکړ.

طالبانو د اوربند لپاره د حکومت پرله‌پسې غوښتنې رد کړې دي او یوازې د تاوتریخوالي د کمولو لپاره د چمتووالي خبره‌یې کړې ده.

د قطر په پلازمېنه دوحه کې د طالبانو او امریکايي چارواکو ترمنځ خبرې له څو ورځو راهیسې روانې دي.

د افغانستان د ۱۹ کلنو څخه کم عمر کرکټ لوبډله پاکستان سره لوبېږي

د افغانستان د ۱۹ کلنو څخه د کم عمره کرکټ ملي لوبغاړي

د افغانستان د ۱۹ کلنو څخه د کم عمره کرکټ ملي لوبغاړي د پاکستان پر وړاندې د لوبې لپاره چمتووالی پيل کړی.

دوی پرون یکشنبه د جَنوبي افریقا بنوني ښار ته رسېدلي چېرته چې تمه ده د جمعې په ورځ له پاکستان سره مخامخ شي.

د پاکستان او افغانستان د ۱۹ کلنو څخه د کم عمره کرکټ ملي ټیمونه د ۲۰۲۰ میلادي کال د کوارټرفاینل یا اتو غوره ټیمونو په پړاو کې لوبېږي.

د ۱۹ کلنو څخه د کم عمره ملي ټیم سر روزونکي رئیس احمدزي پرون ویلي چې د پاکستان ټیم وار له مخه د افغان ټيم له فشار سره مخ دی.

هغه زیاته کړه: "سره له دې چې پاکستان سره له دې مخکې پنځه شپږ واره د ۱۹ کلنو په سطحه مخامخ شوي یو چې په ټولو کې مو ماته ورکړې ده، زموږ توپ وهونکي چې څنګه بېټنګ کوي او زموږ بالران چې څنګه بالنګ کوي ډېر عالي دي او ظاهره خبره ده چې پاکستان باندې به ډېر فشار وي، له همدې فشاره په ګټې اخیستو به موږ د بري لپاره هڅه کوو او په یوه نارمل حالت (له فشار پرته) به میدان ته ورسره وځو."

رئیس احمدزي چې د کرکټ بورډ په فېس‌بوک‌پاڼه‌یې بشپړه مرکه خپره شوې ویلي چې تر وروستي بریده هڅه کوي افغان ټیم بري ته ورسوي.

د افغانستان د کرکټ د ۱۹ کلنو څخه کم عمره ملي لوبغاړو د ۲۰۲۰ میلادي کال په نړیوال جام کې کوربه جَنوبي افریقا، متحده عربي امارات په رسمي لوبو کې مات کړي او تر هغه مخکې یې انګلستان ته هم په تمریني لوبه کې ماته ورکړې.

افغانستان که له پاکستان لوبه وګټي په نیمه پای‌لوبه یا سیمي فاینل کې له هند یا اسټرالیا سره مخ کېږي.

ناکامورا د هند په 'پدماشري' مډال وستایل شو

تتسو ناکامورا د ۲۰۱۹ میلادي کال د ډسیمبر په څلورمه وروسته له هغه چې په جلال‌اباد ښار کې پرې ډزې وشوې د سختو ټپونو له امله ساه ورکړه.

هند د افغانستان یوه خدمتګار ډاکتر تتسو ناکامورا ته پدماشري مډال ورکړی.

پدماشري د هند د عالي ملکي مډالونو له ډلې دی چې ډاکتر تتسو ناکامورا ته د هغه د ټولنیزو خدمتونو د درنښت په سبب ډالۍ شوی.

د هند د کورنیو چارو وزارت په یوه اعلامیه کې د پدما اوارډونو د ۱۴۱ ګټونکو نومونه اعلان کړي چې په هندیانو سربېره د ۱۸ بهرنیو ګټونکو په کتار کې د ډاکتر تتسو ناکامورا نوم هم راغلی.

تتسو ناکامورا درې لسیزې د افغانستان لپاره په تېره بیا په ختیځو سیمو کې خلکو ته د روغتیا، کرنې او اوبو لګولو په برخو کې خدمت وکړ.

ده د ۲۰۱۹ میلادي کال د ډسیمبر په څلورمه وروسته له هغه چې په جلال‌اباد ښار کې پرې ډزې وشوې د سختو ټپونو له امله ساه ورکړه.

له ده سره څو افغان ساتونکي او موټرچلوونکی هم وژل شوي وو.

هند هر کال د "ویبوشان، بوشان او پدماشري" په نوم عالي ملکي مډالونه د جنورۍ په ۲۶مه د دغه هېواد د جمهوریت د ورځې په مناسبت د ښوونې، روغتیا، ټولنیزو کارونو، هنر او موسیقۍ زیارکښو او فعالانو ته ورکوي.

د ۱۹۵۰ میلادي کال د جنورۍ له ۲۶مې هند خپل اساسي قانون پلی کړ او هر کال په همدې مناسبت د جمهوریت ورځ لمانځي او زیارکښ او فعالان ستايي.

دفاع وزارت: بلخ کې د ملکیانو د مرګ‌ژوبلې ادعا څېړل کېږي

د افغان ځواکونو هلیکوپټره د هوايي عملیاتو پر مهال - ارشیف

د افغانستان دفاع وزارت وایي، هغه ادعاوې په جدي توګه څېړي چې په بلخ کې د هوايي ځواک په بمبار کې ملکیانو ته مرګ‌ژوبله اوښتې.

دا خبره یاد وزارت پرون په یوه اعلامیه کې وکړه.

پرون د بلخ ولایت سلګونه اوسېدونکو مظاهره وکړه او ویل‌یې چې د شنبې شپې ناوخته د بلخ ولسوالۍ په بوکه نومي کلي کې د هوايي ځواک په بمبارۍ کې د یوې کورنۍ اووه غړي وژل شوي.

د مظاهره‌چیانو یوه تنظیموونکي خیبر امیري د پوځیانو هغه عملیات چې په‌کې ملکیانو ته مرګ‌ژوبله اوړي وحشت وباله.

د افغانستان دفاع وزارت وايي د ملکیانو د وژل کېدو ادعاوې په جدي او قانوني توګه تعقیبوي.

د بشري حقونو د څار نړیوال سازمان د جنورۍ په ۱۴مه په یوه راپور کې ویلي و چې په ۲۰۱۹ میلادي کال کې د هوايي بریدونو د زیاتېدو په نتیجه کې د افغان او امریکايي ځواکونو له‌خوا ملکیانو ته اوښتې مرګ‌ژوبله تر هغې مرګ‌ژوبلې زیاته وه چې د وسله‌والو مخالفینو په بریدونو کې اوښتې ده.

دوی د طالبانو بریدونه هم بې‌رحمانه وبلل او د جګړې په ښکېلو غاړو یې غږ کړی و چې د ملکیانو خوندیتوب په جدي توګه په پام کې ونیسي.

د امریکا د باسکټ‌بال وتلی لوبغاړی 'کوب براینټ' وژل شوی

۴۱ کلن کوب براینټ پنځه واره د امریکا د باسکټ‌بال په ملي لیګ کې اتلولي ته رسېدلی.

د امریکا د باسکټ‌بال ​یو وتلی پخوانی لوبغاړی کوب براینټ په کالیفورنیا کې له څلورو نورو کسانو سره یوځای د هليکوپټرې د رالوېدو په پېښه کې وژل شوی.

هليکوپټره چې کوب براینټ په‌کې سپور و پرون له لاس انجلس ۶۵ کیلومتره لیرې په کالاباساس ښار کې په یوه اساس ځای کې لوېدلې.

۴۱ کلن کوب براینټ پنځه واره د امریکا د باسکټ‌بال په ملي لیګ "ان بي اې" کې اتلولي ته رسېدلی و او دوه وار یې د المپيک د سرو مډال په غاړه کړی و او د مرګ خبر یې ان په لومړنیو شېبو کې زیات منعکس شو.

دی د امریکا د باسکټ‌بال په تاریخ کې یو له غوره لوبغاړو شمېرل کېده.

کوب براینټ خپل ډېر وخت له لاس انجلس لېکرز ټیم سره تېر کړ او د ۲۰۰۰، ۲۰۰۱ او ۲۰۰۲ کلونو په لوبو کې یې دا ټیم اتلولۍ ته رسولی و.

نور راوښيه

XS
SM
MD
LG