د لاسرسۍ وړ لېنکونه

تازه خبر
سه شنبه ۱۴ زمری ۱۳۹۹ کابل ۰۱:۲۴

افغانستان

نامعلومو وسله والو د لوګر د ټرافیکو سرپرست مدیر وژلی

د لوګر مرکز پل علم

د افغانستان د جنوب ختیځ لوګر ولایت امنیتي چارواکي وایي چې د ټرافیکو سرپرست مدیر او د تنظیم امر اجمل عبدالرحیمزی تېره ورځ وسله والو له ځان سره وړی او بیا یې وژلی دی.

د لوګر امنیه قوماندان رحم خدا مخلص نن دوشنبه له ازادي راډیو سره په خبرو کې پېښه تأیید کړه او د لا نورو پلټنو خبر یې ورکړ.

تر اوسه د پېښې مسؤلیت چا نه دی منلی.

د ورځې تازه خبرونه دلته ولولئ

د کندهار د سپین بولدک-چمن ترمنځ لویه لار نن سهار پرانیستل شو

د چمن او سپین بولدک لار

د کندهار د سپین بولدک-چمن ترمنځ لویه لار له تېرو څو ورځو تړل کېدو وروسته نن سهار پرانیستل شوه.

خو د افغانستان د سوداګرۍ او پانګونې خونې مرستیال یونس مومند نن ازادي راډیو ته وویل چې لاهم د صادراتو او وارداتو پر مخ دا لار بنده ده چې له امله‌یې سوداګرو ته ګڼ زیانونه اوښتي.

هغه زیاته کړه: "که څه هم د کندهار د سپین بولدک-چمن ترمنځ لویه لار د تګ راتګ لپاره پرانیستل شوې، خو د سوداګریزو مالونو پر مخ لاهم بنده ده چې له دې امله يې سوداګریزې چارې ټکنۍ کړي."

نوموړي وویل دا مهال دواړه خواوو ته په لسګونه موټر ولاړ دي.

دغه دروازه له هغه وروسته بنده شوه چې په سپین بولدک کې د افغان او پاکستاني پوځیانو ترمنځ نښته وشوه.

د افغانستان د متشبثینو عالي بورډ پرون ازادي راډیو ته ویلي و چې په سپین بولدک کې د افغان او پاکستاني ځواکونو ترمنځ د وروستۍ نښتې او د سپین بولدک او چمن ترمنځ په ګمرک د پاکستاني ځواکونو په توغندیز برید کې ډېری سوداګریز مالونه سوځېدلي دي.

د دغه بورډ د مشر رحم‌الدین حاجي اغا له قوله، له دې امله سوداګرو ته نږدې څلور میلیونه ډالر زیان اوښتی.

د سپین بولدک پېښې څېړونکی پلاوی سیمې ته رسېدلی

ارشیف

هغه پلاوی چې په سپین بولدک کې د پاکستاني پوځیانو په ډزو د ملکي افغانانو د وژنې د ادعاوو په اړه د څېړنې لپاره مؤظف شوی د پېښې سیمې ته رسېدلی.

د پلاوي مشري د افغانستان د ملي امنیت شورا مرستیال صدیق‌الله فهیم کوي او د دفاع او کورنیو چارو وزارتونو او د ملي امنیت او نورو ادارو استازي یې غړي دي.

د ملي امنیت شورا په یوه بیان کې چې پرون ماښام خپور شو ویلي چې کندهار ته د پلاوي د سفر موخه د دې پېښې هر اړخیزه څېړنه، له متضررو کورنیو او خلکو سره مرسته او د دې خبرې یقیني کول دي چې راتلونکي کې دا ډول پېښې تکرار نه‌شي.

د عرفې په ورځ د افغان او پاکستاني پوځیانو نښته وروسته له هغه پیل شوه چې د راپورونو له مخې پاکستاني سرتېرو پر هغو پارېدلو اعتراض کوونکو ډزې وکړې چې د چمن-سپین بولدک د دروازې د پرانیستو غوښتنه‌یې کوله.

په دې نښته کې د افغان چارواکو په وینا ۱۶ ملکي افغانان مړه او ۸۰ نور ټپیان شول.

ولسمشر غني او مودي د سولې او سیمه‌ییزو امنیتي مسایلو په اړه خبرې وکړې

افغان ولسمشر محمد اشرف غني

ولسمشر اشرف غني پرون د هند له صدراعظم نرېندرا مودي سره په ټیلیفوني تماس کې د افغانستان د سولې او سیمه‌ییزو امنیتي مسایلو په اړه خبرې کړي.

هندي رسنیو د هند صدراعظم د دفتر په حواله راپور ورکوي چې دا خبرې پرون دوشنبه وشوې او په ترڅ کې یې ښاغلي مودي د سولې د ټینګښت په هڅو کې له افغانستان سره د هند پر ژمنو ټینګار وکړ.

خبر زیاتوي چې ولسمشر غني او د هند صدراعظم د سیمې پر بدلېدونکي امنیتي وضعیت او نورو مسایلو هم بحث وکړ.

افغان حکومت تر اوسه په دې اړه څه نه‌دي ویلي.

عمران خان: د سولې لپاره هڅې به بین‌الافغاني خبرو ته لار هواره کړي

د پاکستان صدراعظم عمران خان

د پاکستان صدراعظم عمران خان وايي هیله‌من دی چې په افغانستان کې د سولې او ثبات د ټینګښت لپاره د روانو هڅو پرمختګ به د متحده ایالاتو او طالبانو ترمنځ د سولې پر موافقې باور زیات کړي او ورسره به د بین‌الافغاني خبرو پیل ته ژر تر ژره لاره هواره شي.

د پاکستاني رسنیو د راپورونو له مخې ولسمشر غني پرون د اګسټ په درېیمه په یوه ټیلیفوني تماس کې عمران خان ته د اختر مبارکي وویله.

خبر زیاتوي چې ښاغلي خان په دې خبرو کې په افغانستان کې د سولې په ټینګښت کې د پاکستان د ونډې او د کابل او اسلام‌اباد ترمنځ د اړیکو د ښه کولو پر اهمیت ټینګار وکړ.

جمهوري ریاست د عمران خان او ښاغلي غني د ټیلیفوني محاورې په اړه تر اوسه کوم بیان نه‌دی خپور کړی.

پومپیو او ملا برادر پر بین‌الافغاني خبرو او زندانیانو بحث وکړ

د امریکا د بهرنیو چارو وزیر مایک پومپیو او د طالبانو سیاسي دفتر مشر ملا عبدالغني برادر

د امریکا بهرنیو چارو وزیر مایک پومپیو د دوشنبې په ماښام په قطر کې د طالبانو د سیاسي دفتر مشر ملا عبدالغني برادر سره وېډیویي خبرې کړې دي.

د طالبانو د سیاسي دفتر ویاند سهیل شاهین پر خپل ټویټر لیکلي چې دواړو لورو د بین‌الافغاني مذاکراتو د پیل په اړه بحث درلود او د افغان حکومت له‌خوا یې د پاتې بندیانو خوشې کېدل مهم وبلل.

ښاغلي پومپیو د لوی اختر په درېیو ورځو کې د اوربند اعلان هرکلی وکړ.

امریکا او طالبانو د فبرورۍ پر ۲۹مه د سولې یوه موافقه لاسلیک کړه چې له مخې یې د افغان حکومت او طالبانو له‌خوا د یو بل بندیانو په خلاصون سره باید بین‌الافغاني خبرې پیل شي.

تر اوسه طالبان زر تنه حکومتي بندیان خوشې کړي، خو افغان حکومت ۴،۶۰۰ بندیان خوشې کړي او وایي د ۴۰۰ پاتې بندیانو د خوشې کېدو په اړه به مشورتي لویه جرګه پرېکړه وکړي.

د طالبانو د سیاسي دفتر ویاند سهیل شاهین په یوه بل ټویټ کې د افغانستان د حکومت هغه ادعا رد کړې چې وایي طالبانو د اختر د درې ورځني اوربند څخه سرغړونه کړې ده.

د کندهار په مرکزي زندان کې چاودنې ۳ پولیس ټپیان کړي

کندهار

نامعلومو کسانو د کندهار د مرکزي زندان پر قراول لاسي بم غورځولی دی چې د ځینو سرچینو په خبره درې پولیس په‌کي ټپیان شوي دي.

دغې امنیتي سرچینې د موضوع د حساسیت له کبله د نوم له ښودلو ډډه کړې، خو د کندهار د والي ویاند بهیر احمدي ازادي راډیو ته د یوه پولیس د ټپي کېدو خبره وکړه.

هغه زیانه کړه: "ماښام اووه بجې د کندهار محبس د دروازې لومړي قراول ته دوو موټرسایکل سپرو لاسي بم غورځولی دی. د دروازې ساتونکي ټپيان شوي دي، نور چا ته زیان نه‌دی رسېدلی."

د پېښې مسؤلیت تر اوسه چا نه‌دی منلی.

پر کندهار محبس تر دې مخکې هم څو ځله حملې شوي چې مسؤلیت وسله‌والو طالبانو منلی، څو کاله مخکې لومړی په یوه لوی موټر بم حمله کې او تر هغه وروسته د یوه اوږده تونل له لارې په سلګونه زندانیان له دغه زندانه تښتېدلي و.

د افغانستان بهرنیو چارو وزارت د دوو غونډو کوربه دی

د افغانستان بهرنیو چارو وزارت

د افغانستان بهرنیو چارو وزارت نن سې شنبه د سولې او مشورتې لویې جرګې په اړه د سیمه‌ییزو او نړیوالې غونډو کوربه‌توب کوي.

دا غونډې به نن تر غرمې وروسته جوړې شي.

د دغه وزارت ویاند ګران هېواد ازادي راډیو ته وویل چې د دې غونډو هدف د افغانستان د سولې بهیر لپاره د اجماع پیاوړي کېدل دي.

هغه زیانه کړه: "د بهرنیو چارو وزارت به د دوو سیمه‌ییزو مشورتي ناستو او نړیوالې مشورتي ناستې کوربه وي. په دې غونډو کې به د راتلونکې مشورتي لویې جرګې په اړه د افغانستان د بهرنیو چارو وزارت سرپرست او د نورو هېوادونو د استازو ترمنځ خبرې وشي."

د بهرنیو چارو وزارت ویاند د دې غونډې په اړه نور جزئیات ورنه‌کړل چې د کومو هېوادونو استازي به ګډون وکړي.

دغه وزارت تر دې وړاندې په جولای میاشت کې څو انلاین غونډې د افغانستان د سولې بهیر په اړه د سیمه‌ییزې او نړیوالې اجماع د پیاوړي کېدو لپاره جوړې کړې دي.

د افغانستان حکومت وایي د اګسټ پر اوومه مشورتي لویه جرګه رابولي څو د پاته ۴۰۰ بندیانو د برخلیک په اړه پرېکړه وکړي. ولسمشر اشرف غني وایي د دغو بندیانو د خوشې کولو صلاحیت نه‌لري چې جرمي دوسیې لري.

په بلخ کې د سوداګرو ښځو فعالیت ۵۰ سلنه کم شوی 

ارشیف

په بلخ کې په تېرو څلو میاشتو کې د قرنطین د بندیزونو په پلي کېدو سره سلګونه سوداګرې ښځې له جدي مالي او اقتصادي ستونزو سره مخ شوې او سوداګریز فعالیت یې په ټپه ودرېد.

اوس له څه کم یوې میاشتې راهیسې د بندیزونو د بشپړ لرې کېدو سره سم، ګن شمېر سوداګرو ښځو خپل فعالیت له سره پیل کړی، خو دا مېرمنې له ډېرو مالي ستونزو سره لاس او ګرېوان دي.

د شمال د سوداګرۍ او صنایعو خونې مسئولان وايي چې د قرنطین د بندیزونو له بشپړ ختمېدو سره سره بیا هم په بلخ ولایت کې د ښځو سوداګریز فعالیت فلج شوی دی.

د یادې ادارې اجرائیه مدیر، نصیر احمد قاسمي ازادی راډیو ته ووېل چې په تېرو څلورو میاشتو کې په بلخ کې د کرونا ویروس د خپرېدو له امله د ښځینه سوداګرو فعالیت په بشپړ ډول بند و.

د قاسمي په خبره چې له یوې میاشتې راهیسې د کرونا له امله وضع شوي بندیزونه لرې شوي خو د سوداګرو ښځو پر فعالیت یې منفي اغېزه کړی دی.

هغه وویل چې په بلخ کې پنځوس سلنه ښځو چې پخوا یې د لاسي صنایعو او جامو د تولید په برخه کې کار کوه، اوس د خپل فعالیت د بیا پیلولو وړتیا نه لري.

هغه زیاته کړه: "د قرنطین شرایطو ډېر سوداګریز فعالیتونه بند کړل، دغو بندیزونو سوداګرې ښځې هم زیانمنې کړلې او پنځوس سلنه فعالیت یې کم شوی."

د یادولو ده چې د قرنطین د بندیزونو له امله نه یواځې په بلخ کې بلکې په سمنګان، سرپل او فاریاب ولایتونو کې سوداګرې ښځې له ډېر شمېر مالي ستونزو سره مخ شوي او فعالیتونه یې بند دي.

په افغانستان کې د شفتالو د حاصلاتو کچه لوړه شوې

شفتالو

په افغانستان کې د شفتالو د حاصلاتو کچه لوړه شوې ده.

د دغه هېواد د کرنې او مالدارۍ وزارت ویاند اکبر رستمي نن ازادي راډیو ته وویل، چې دوی د بڼوالۍ د پراختیا په پار ګڼ پروګرامونه پلي کړي، چې ورسره په هېواد کې د بڼوالۍ چارې پراخې شوي او بڼوالو ته د ګټې وټې زمینه هم برابره شوې ده.

نوموړي وویل تېر کال په ټول هېواد کې د شفتالو اته زره او ۷۶ هکټاره لوی او واړه بڼونه جوړ شوي، چې په ۱۳۹۸یم کال کې له دغو بڼونو ۶۱ زره او ۳۶۱ مټریک ټنه شفتالو راټول او بازار ته وړاندې شوي دي.

د ده په خبره، سږکال یوازې د افغانستان د ختیځو ولایتونو د شفتالو حاصلات لس زره ټنه دي، چې عواید یې ۵۰۰ میلیونه افغانیو ته رسېږي.

دا په داسې حال کې ده، چې تېر ۱۳۹۸ی لمریز کال کې د یادو ولایتونو د شفتالو ټول حاصل نهه زره ټنه وه، چې عواید یې ۴۵۰ میلیونه افغانۍ وه.

د افغانستان د کرنې او مالدارۍ وزارت د معلوماتو له مخې، دې ته په کتو د ختیځو ولایتونو د روان ۱۳۹۹یم کال د شفتالو حاصلات د تېرکال په پرتله لس سلنه زیاته شوې ده.

په منظمه توګه اوبه ورکول او د ښاخونو پرې کول، بزګرو ته عامه پوهاوی ورکول، د ناروغیو میخانیکي مخنیوی، موسمي ورښتونو، ښې هوا او له بڼونو څخه په فني توګه څارنه او ساتنه د ښاغلي رستمي په خبره هغه عوامل دي، چې د شفتالو حاصلات یې له امله زیات او پر وخت بازار ته وړاندې کولو ته چمتو شوي دي.

چارواکي: سپین بولدک کې د وروستۍ نښتې له امله سوداګریز توکي سوځېدلي

سپین بولدک دروازه

د افغانستان د متشبیثینو عالي بورډ وایي، په سپین بولدک کې د افغان او پاکستاني ځواکونو ترمنځ د وروستۍ نښتې او د سپین بولدک او چمن ترمنځ په ګمرک د پاکستاني ځواکونو په توغندیز برید کې ډېری سوداګریز مالونه سوځېدلي دي.

د دغه بورډ مشر رحم الدین حاجي اغا نن ازادي راډیو ته وویل، چې له دې امله سوداګرو ته نږدې څلور میلیونه ډالر زیان اوښتی.

نوموړي وویل، اوسمهال یو دولتي پلاوی سیمې ته رسېدلی او سوداګر هیله مند دي چې د زیانونو په را کمولو او د لارې په بېرته پرانیستل کېدو کې ورسره مرسته وکړي.

په سپین بولدک کې د افغان او پاکستاني پوځیانو تر منځ نښته وروسته له هغې وشوه، چې پاکستاني سرتېرو پر هغو پارېدلو اعتراض کوونکو ډزې وکړې چې د چمن-سپین بولدک د دروازې د پرانیستو غوښتنه‌ یې کوله.

سپین بولدک ته د وروستۍ نښتې د څېړلو لپاره پلاوی واستول شو

د افغانستان-پاکستان ترمنځ سیمه کې د چمن-سپین بولدک دروازه

په سپین بولدک کې د افغان او پاکستاني ځواکونو ترمنځ د وروستۍ نښتې په اړه د څېړنې لپاره یو جګپوړی پلاوی کندهار ته تللی دی.

د افغانستان د ملي امنیت شورا نن په یو بیان کې وویل چې پلاوی به له سیمه‌ییزو چارواکو سره تر لیدنې وروسته سپین بولدک ته ولاړ شي او د هغې نښتې په اړه به څېړنې پیل کړي چې له اختر یوه ورځ مخکې وشوه. په خبرپاڼه کې د دې نښتې د پیل پړه پر پاکستاني پوځیانو اچول شوې.

د خبرپاڼې له مخې په پلاوي کې د بهرنیو چارو، دفاع او کورنیو چارو د وزارتونو او د ملي امنیت او یو شمېر نورو ادارو استازي شامل دي.

په سپین بولدک کې د افغان او پاکستاني پوځیانو نښته وروسته له هغه پیل شوه چې پاکستاني سرتېرو پر هغو پارېدلو اعتراض کوونکو ډزې وکړې چې د چمن-سپین بولدک د دروازې د پرانیستو غوښتنه‌یې کوله. په دې نښته کې د افغان چارواکو په وینا ۱۶ ملکي افغانان مړه او ۸۰ نور ټپیان شول.

اشرف غني: ښځینه مرستیال والیانې د اړیکو پر اساس نه‌ټاکل کېږي

افغان ولسمشر محمد اشرف غني

د افغانستان ولسمشر وايي په ۳۴ ولایتونو کې د والي د مرستیالانو په توګه د ښځو د ګمارنې پروسه په درېیو میاشتو کې بشپړېږي.

محمد اشرف غني دا خبره پرون شنبه په سمنګان ولایت کې د ځايي اوسېدونکو یوې غونډې ته وکړه.

ولسمشر غني وویل چې په دې ګمارنه کې د واسطو مخه نیول کېږي: "په ۳۴ ولایتونو کې د ښځینه مرستیالانو د ټاکلو پروسه د ښځو چارو وزارت، د محلي ارګانونو خپلواکې ادارې او اداري اصلاحاتو کمېسیون له‌خوا روانه ده. هېڅوک له دولتي چارواکو، وکیلانو یا هم وتليو شخصیتونو سره د اړیکو پر اساس نه‌ټاکل کېږي. د دې لپاره چې حق، حقدار ته ورسېږي، که خدای کول د یوه کمېسیون له‌خوا د ټاکلو معیارونو له مخې دا پروسه په درېیو میاشتو کې بشپړېږي."

د افغانستان حکومت تېره میاشت (د جولای پر شپږمه) اعلان وکړ چې د ټولو ولایتونو لپاره به یوه یوه ښځه د والي د مرستیالې په توګه ټاکل کېږي.

حکومت د دغه کار هدف په قدرت کې د ښځو شریکول او د اداري اصلاحاتو عملي کول ښوولي وو.

د ننګرهار چارواکي: له سېلاب‌ځپلو سره نقدي او ضروري مرستې وشوې

ارشیف، ننګرهار کې راوتلي سېلابونه. 29 July 2010

د ننګرهار چارواکي وايي په کوز کونړ ولسوالۍ کې له سېلاب‌ځپلو سره نقدي او نورې ضروري مرستې وشوې.

پرون سهار په دې ولسوالۍ کې د سېلابونو په نتیجه کې ۱۵ ماشومان او یوه ښځه مړه شول.

د والي ویاند عطاءالله خوګیاڼي پرون شنبه ناوخته ازادي راډیو ته وویل: "د ننګرهار د سرپرست والي په مشرۍ د پېښو په وړاندې د چمتووالي کمېټه سیمې ته لاړه، له زیانمنو کورنیو سره نقدي مرستې هم وشوې او همداراز د لومړنیو توکو او سرپناه په برخه کې هم ورسره مرسته وشوه."

په دغو سېلابونو کې د څلورو نورو ماشومانو د ټپي کېدو خبر هم ورکړل شوی دی.

د والي ویاند وايي په سیمه کې یوه ټیم ته دنده ورکړل شوې چې د زیانونو د معلومولو لپاره سروې وکړي.

د قاطع ملاتړ مأموریت افغانستان کې د تاوتریخوالي د کمولو غوښتونکی شو

ارشیف، ننګرهار کې د افغانستان امنیتي ځواکونو یو سرتېری

په افغانستان کې د ناټو په مشرۍ د قاطع ملاتړ مأموریت د تاوتریخوالي پر کمولو ټینګار وکړ.

دغه مأموریت پرون ناوخته په ټویټر کې د لوی اختر د مبارکۍ ترڅنګ د افغان ځواکونو هغه هڅې ستایلي چې اوربند ته لار اواروي.

قاطع ملاتړ په خپل پیغام کې د تاوتریخوالي د دایمي کمولو او د مذاکرو د تعقیب غوښتنه کړې ده چې د دې مأموریت په باور بالاخره افغانان وکړای شي تلپاتې سوله ولري.

وروسته له هغې چې طالبانو او امریکا د فبرورۍ پر ۲۹مه په قطر کې موافقه لاسلیک کړه، په افغانستان کې د طالبانو تاوتریخوالی لا هم دوام لري.

د غزني یو مدني فعال ووژل شو

د افغانستان په عمومي نقشه کې غزني ولایت

د غزني چارواکي وايي د دولت وسله‌والو مخالفانو د عصمت‌الله سلام په نوم یو مدني فعال وواژه.

د والي ویاند واحدالله جعمه‌زاده د شبنې په ورځ ازادي راډیو ته وویل: "د لوی اختر دوهمه ورځ غرمه مهال وسله‌والو طالبانو عصمت‌الله سلام د غزني اندړو ولسوالۍ خوزیو کلي ته چې دا یې پلرنی کلی دی پر لاره وو له موټره ښکته کړی او وژلی دی."

جمعه‌زاده وايي له عصمت‌الله سلام سره په موټر کې ښځې او ماشومان هم وو.

جمعه‌زاده وايي: "عصمت‌الله سلام له ډېره وخت په غزني کې مدني فعالیتونه کول او په سلطان محمود ښارګوټي کې «د سیمې او ولسونو شورا» رئیس هم وو."

ښاغلی جمعه‌زاده وايي عصمت‌الله سلام هېڅ دولتي دنده نه‌درلوده.

عصمت‌الله سلام د «ژوند مدني ټولنې» یو فعال غړی و.

د دې پېښې مسؤلیت چا یا کومې ډلې نه‌دی منلی.

نور راوښيه

XS
SM
MD
LG