د لاسرسۍ وړ لېنکونه

تازه خبر
سه شنبه ۱۳ غبرګولی ۱۳۹۹ کابل ۰۸:۱۱

افغانستان

د پروان بګرام ولسوالۍ کې د ممیزخونې د جوړولو چارې پيل شوې

د پروان ولایت د بګرام ولسوالۍ اړوند د غلام علي په کلي کې د ممیز خونې د جوړولو چارې پيل شوې.

د دغه ولایت د کرنې ریاست د مسؤلینو په وینا دغه مميزخونې د کرنې وزارت د بڼوالى او مالدارۍ د ملي پروګرام د خلکو په ۵۰ سلنې ونډې سره د درې میليونو ۶۰۰ زرو افغانيو په لګښت جوړوي.

د مسؤلینو په خبره هره مميزخونه به له ۱۵ څخه تر شلو مټريک ټنو انګورو د وچولو ظرفيت ولري او له هرې خونې څخه به له څلورو څخه تر پنځو مټريک ټنو پورې معياري مميز ترلاسه شي.

د ورځې تازه خبرونه دلته ولولئ

اتمر د اذربایجان له بهرنیو چارو وزیر سره د سولې په اړه خبرې وکړې

د افغانستان د بهرنیو چارو سرپرست وزیر محمد حنیف اتمر

د افغانستان او اذربایجان د بهرنیو چارو وزیرانو د افغانستان د سولې پر پروسه خبرې وکړې.

د اذربایجان تریند خبري اژانس نن د دغه هېواد د بهرنیو چارو وزارت په حواله خبر ورکړی چې محمد حنیف اتمر او ایلمار محمدیاروف په وېډیو کنفرانس کې بحث وکړ.

د خبر له مخې د اذربایجان د بهرنیو چارو وزیر د افغانستان د سولې په پروسه کې له خپله اړخه د همکارۍ ژمنه کړې ده.

د کوچني اختر په درېیو ورځو کې نافذ شوي اوربند د افغانستان د سولې پروسې چټکتیا ته هیلې زیاتې کړې دي.

د حکومت او طالبانو ترمنځ د بندیانو تبادله هم زیاته شوې چې دواړو لورو د یو بل په لسګونه بندیان خوشې کړي دي.

په پام کې ده حکومت د طالبانو ۵،۰۰۰ او طالبان د حکومت ۱،۰۰۰ تنه بندیان خوشې کړي.

د بندیانو تبادله د بین‌الافغاني مذاکرو د پیل لپاره اساسي شرط ګڼل کېږي.

چارواکي: ننګرهار کې د دولت ۱۶ مخالف وسله‌وال وژل شوي

ارشیف

د ننګرهار چارواکي وايي په حصارک ولسوالۍ کې د دولت ۱۶ مخالف وسله‌وال وژل شوي دي.

ویل شوي، دغه وسله‌وال وروسته له هغې ووژل شول چې اول‌یې تېره شپه د امنیتي ځواکونو پر پوستو ډله‌ییز بریدونه پیل کړل چې وروسته وسله‌واله نښته وشوه.

د والي ویاند عطاالله خوګیاڼي نن رسنیو ته وویل چې په دې نښته کې سیمه‌ییزو پولیسو ته هم مرګ‌ژوبله اوښتې ده.

هغه وویل: "متأسفانه د دوی په ډله‌ییزو بریدونو کې ۳ سیمه‌ییز پولیس شهیدان شوي او یو بل ټپي شوی دی. د دغو ترورېستي بریدونو په ځواب کې امنیتي ځواکونو ۱۶ مخالف وسله‌وال وژلي او ۹ تنه نور یې ټپیان کړي چې په وژل شویو کې د عباس او ادریس په نوم د دوی دوه سرګروپان هم شامل دي."

د والي ویاند وایي تر پېښې وروسته سیمې ته تازه دمه امنیتي ځواکونه لېږل شوي دي.

د دولت کومې مخالفې ډلې د دې پېښې په اړه څه نه‌دي ویلي.

د کاپیسا د ټرافیکو مدیر نن د نامعلومو وسله‌والو په حمله کې ووژل شو

د کاپیسا نقشه

د کاپیسا د ټرافیکو مدیر نن د نامعلومو وسله‌والو په حمله کې ووژل شو.

چارواکي وايي سید منیر له کوره دفتر ته روان و چې نن سهار د کاپیسا مرکز په قلعه سید خان سیمه کې ووژل شو.

د دې پېښې مسؤلیت تر اوسه چا نه‌دی منلی.

بدخشان کې نامعلومو وسله‌والو ۴ تنه ملکیان په ډزو وژلي

د بدخشان ولایت نقشه

نامعلومو وسله‌والو کسانو په بدخشان ولایت کې تېره شپه ۴ تنه ملکیان په ډزو وژلي دي.

د بدخشان د امنیه قوماندانۍ ویاند ثناالله روحاني نن ازادي راډیو ته وویل، دغه کسان د ارغنج‌خواه ولسوالۍ په شېوه سیمه کې وژل شوي.

هغه زیاته کړه: "د ناپېژانده وسله‌والو کسانو له‌خوا څلور تنه ملکیان وژل شوي او تر اوسه د دې وژنې دلیل او انګېزه معلومه نه‌ده. پولیسو د قاتلانو د پېژندنې لپاره اقدام کړی دی."

د دې پېښې مسؤلیت تر اوسه چا نه‌دی منلی.

افغانستان کې په کرونا ویروس د اخته کسانو شمېر ۱۵،۷۵۰ ته ورسېد

افغان-جاپان روغتون کې ډاکتران په کرونا ویروس اخته ناروغ ته د لارښوونې پر مهال.

د افغانستان روغتیا وزارت وايي په تېرو ۲۴ ساعتونو کې په هېواد کې د کرونا ویروس ۵۴۵ نورې پېښې ثبت شوې دي.

د دغه وزارت معین وحید مجروح نن رسنیو ته په یوه لېږلي وېډیويي پیغام کې وویل، په دې موده کې په دې ویروس ۸ کسان مړه شوي او ۱۰۰ تنه نور روغ شوي دي.

ښاغلي مجروح له خلکو د دې وبا په مخنیوي کې د همکارۍ غوښتنه وکړه: "د کرونا وبا د کنټرول په برخه کې یوازنۍ هیله او فکټور د خلکو مرسته ده چې دوی د ګڼه ګوڼې ځایونو ته لاړ نه‌شي، په جبري توګه ماسک وکاروي او دوه متره ټولنیز واټن وساتي، د ورځې له ۲۰ تر ۳۰ وارې خپل لاسونه ومینځي."

په افغانستان په کرونا ویروس د اخته کسانو شمېر ۱۵ زره ۷۵۰ ته رسېدلی دی.

له دې جملې تر ۱،۴۰۰ زیات کسان روغ شوي هم دي.

بل‌خوا د جمهوري ریاست لومړي مرستیال د جرمني له هېواد څخه د کرونا ویروس د ټسټونو لپاره د وسایلو د مرستې غوښتنه وکړه.

امر الله صالح دا غوښتنه نن په کابل کې د جرمني له سفیر پیټر پروګل (Peter Prügel) سره په کتنه کې مطرح کړه.

بدخشان کې له سېلاب‌ځپلو سره ۱۰ میلیونه افغانۍ مرسته وشوه

ارشیف

د افغانستان حکومت په بدخشان کې له سېلاب‌ځپلو سره ۱۰ میلیونه افغانۍ مرسته وکړه.

د دغو مرستو د رسولو لپاره پېښو ته د رسېدو په چارو کې د دولت وزیر غلام بهاوالدین جیلاني پرون بدخشان ته تللی و.

دی وايي: "موږ مرستې نغد له ځانه سره راوړي. نورې مرستې به هم په څو راتلونکو ورځو کې د بدخشان د بېړنیو حالاتو ادارې ته ورسېږي. مرستې باید لومړی هغو کسانو ته چې واقعاً ډېر زیان‌یې لیدلی وسپارل شي."

د بدخشان چارواکو ویلي چې په یمګان، شهدا، بهارک، شکی، ارګو او فیض‌اباد ښار کې د سېلابونو راوتلو تر اوسه درې کسان مړه کړي او شااوخوا ۲۰۰ کورونه‌یې وران کړي دي.

په بدخشان کې هر کال د سېلابونو د راوتلو او د ځمکې د ښویېدو په پېښه کې لسګونه کسان مړه شوي چې یوه تر ټولو لویه پېښه د ۱۳۹۳ کال د غويي میاشت په ارګ ولسوالۍ کې شوې وه.

هغه کال په ارګو کې اب باریک کلی د غره د ښویېدو په پېښه کې تر خاورو او ډبرو لاندې شو او دوه نیم زره کسان په‌کې مړه شول.

افغانستان کې د جرمني سفیر: د سولې هڅو کې د افغانانو ترڅنګ ولاړ یو

په افغانستان کې د جرمني سفیر پیټر پروګل

په افغانستان کې د جرمني سفیر پیټر پروګل وایي چې هېواد به‌یې له ترهګرۍ سره د مبارزې او د سولې په هڅو کې د افغانانو ترڅنګ ولاړ وي.

هغه دا خبره د جرمني سفارت ته نږدې د ۲۰۱۷ کال د مې ۳۱مه د خونړي برید د درېیم کال د پوره کېدو په مناسبت کړې.

پروګل یکشنبه په خپل ټویټر لیکلي چې په سفارت کې یې دننه د دې برید د قربانیانو یاد غونډه جوړه کړې وه.

درې کاله وړاندې د کابل په یوه ډیپلوماټیکه ساحه کې د جرمني سفارت ته نږدې موټر بم چاودنه وشوه چې په‌کې له ۱۵۰ زیات کسان مړه او تر ۴۰۰ نور ډېر کسان ټپیان شول.

په وژل شویو کې د جرمني سفارت یوه ډیپلوماټه او یو افغان ساتونکی او په ټپیانو کې د جرمني او جاپان د سفارتونو یو شمېر کارکوونکي شامل و.

په دغه لوی برید کې ۹۰ فیصده مرګ‌ژوبله ملکیانو ته اوښتې وه.

دغه برید د جرمني د سفارت د ودانۍ زیاته برخه ورانه کړې وه او له امله‌یې جرمني په کابل کې خپل قونسلي خدمات بند کړل. افغان چارواکو دا برید د حقاني شبکې کار بللی و.

احمد جواد عثماني د افغانستان عامې روغتیا وزارت سرپرست وټاکل شو

ډاکتر احمد جواد عثماني د عامې روغتیا وزارت نوی سرپرست او نوماند وزیر

د افغانستان جمهوري ریاست ډاکتر احمد جواد عثماني د عامې روغتیا وزارت نوی سرپرست او نوماند وزیر ټاکلی.

دا خبره د جمهوري ریاست د چارو ادارې له‌خوا د یکشنبې په شپه په یوه اعلامیه کې یاده کړې ده.

د عثماني د مقررۍ تر اعلان څو ساعته مخکې فېروزالدین فېروز چې شااوخوا پنځه کاله د افغانستان عامې روغتیا وزیر و د خپلې دندې د پای ته رسولو اعلان وکړ.

هغه خپل مأموریت بریالی ارزولی دی.

د افغانستان عامې روغتیا وزارت کې دا بدلون داسې وخت راغلی چې کرونا ویروس د افغانستان خلک له جدي ګواښ سره مخ کړي.

د فېروزالدین فېروز د لیرې کېدو او پر ځای يې د ډاکتر عثماني د مقررۍ عوامل نه‌دي په ډاګه شوي، خو ښاغلی فېروز په افغانستان کې د کرونا ویروس له پیله د رسنیو او خلکو د توجه وړ ګرځېدلی و او ځینو خلکو دی او ټیم‌یې د کرونا ویروس سره د مبارزې په چارو کې په کم‌کاریو تورنول.

په افغانستان کې تر یکشنبې ناوخته څه باندې ۱۵ زره کسان ( ۱۵،۲۰۴) په کرونا ویروس اخته شوي چې له ډلې یې ۲۵۷ تنه مړه دي.

له دې ډلې یوازې ۱،۳۵۰ کسان بېرته ښه شوي، خو هره ورځ د څه باندې ۶۰۰ نویو قضیو راپورونه تأییدېږي.

د کابل پولیسو ۱۳ تنه د بېلابېلو جرمونو په تور نیولي

دوه تنه چې د کابل پولیسو له لوري د جنايي جرمونو په تور نیول شي.

د کابل امنیه قوماندانۍ په پلازمېنه کې د بېلابېلو جرمونو په تور د ۱۳ کسانو د نیولو خبر ورکوي.

د کابل امنیه قوماندانۍ په یوه خبرپاڼه کې چې نن خپره شوه وايي د کابل جنايي پولیسو دا کسان د ښار په بېلابېلو ناحیو کې د اوپراتیفي عملیاتو په ترڅ کې توقیف کړي دي.

د خبرپاڼې له مخې دا ۱۳ کسان چې له ځینو څخه‌یې وسلې هم ترلاسه شوي د قتل، شوکو، غلاوو او له خلکو د باج اخیستو په بېلابېلو مواردو تورن دي.

افغانستان کې تېرو ۲۴ ساعتونو کې ۶۸۰ تنه په کرونا ویروس اخته شوي

کابل کې د افغان-جاپان روغتون لابراتوار

د افغانستان عامې روغتیا وزارت وايي، په تېرو ۲۴ ساعتونو کې په ټول هېواد کې ۶۸۰ نور کسان په 'کووېډ-۱۹' ناروغۍ اخته شوي دي.

دې وزارت په یوه خبرپاڼه کې چې نن خپره شوه ویلي چې دا شمېره د څه باندې ۱،۱۰۰ مشکوکو مواردو له معاینې وروسته ترلاسه شوې دي. په بیان کې په تېرو ۲۴ ساعتونو کې په 'کووېډ-۱۹' ناروغۍ د اخته کېدو له کبله د ۸ کسانو د مړینې خبر هم ورکړل شوی دی.

له دې نویو مواردو سره په افغانستان کې په 'کووېډ-۱۹' ناروغۍ د اخته کسانو ټوله شمېره ۱۵،۲۰۵ ته او د مړینو شمېره ۲۵۷ ته لوړه شوه.

هرات کې ټرافیکي پېښې د یوې کورنۍ ۹ غړي وژلي

د افغانستان په نقشه کې هرات ولایت

د هرات په ادرسکن ولسوالۍ کې په یوه ټرافیکي پېښه کې د یوې کورنۍ ۹ غړي مړه شوي او یو ماشوم سخت ټپي دی.

د هرات والي ویاند جېلاني فرهاد نن یکشنبه ازادي راډیو ته وویل پېښه تېره شپه شوې او په قربانیانو کې یې ښځې او ماشومان هم شامل دي.

ښاغلی فرهاد زیاتوي: "له یو ټېلري موټر سره د سورلۍ د یو سرف ډوله موټر د ټکر له کبله د یوې کورنۍ ۹ غړي مړه شوي چې ۳ تنه‌یې ښځې، ۴ نارینه او ۲ ماشومان دي."

د ښاغلي فرهاد په وینا د دې پېښې ټول قربانیان د کاپیسا ولایت اوسېدونکي دي.

د هرات د والي ویاند د دې پېښې علت ټرافیکي قواعدو ته د موټر چلوونکو نه‌پاملرنه بللې ده.

داعش د خورشید ټلوېزیون د کارکوونکو پر موټر د برید مسؤلیت واخیست

د خورشید ټلوېزیون د کارکوونکو پر موټر شوې چاودنه

اسلامي دولت ډلې یا داعش په کابل کې د هغه ترورېستي برید مسؤلیت منلی چې د خورشید ټلوېزیون یو خبریال او یو تخنیکي همکار په‌کې ووژل شول او اووه نور ټپیان شول.

د خورشید ټلوېزیون مسؤل محمد رفیع رفیق صدیقي رسنیو ته ویلي دي چې پر همکارانو یې ترورېستي برید شوی دی.

د افغان ولسمشر مرستیال ویاند دوا خان مینه‌پال ازادي راډیو ته وویل چې حکومت دا برید په کلکه غندي او زیاته‌یې کړه چې د پېښې په اړه به څېړنې وشي.

د بخښنې نړیوال سازمان، د ژورنالېستانو د ملاتړ نړیوالې ټولنې او په کابل کې د امریکا سفارت هم دا حمله په کلکه غندلې او دا یې په افغانستان کې د بیان پر ازادۍ حمله بللې ده.

د هند د مرسته شويو غنمو ۳مه بېړۍ چابهار ته ورسېده

د هند مرسته شوي غنم

د هند د مرسته شويو غنمو د لېږدونې درېيمه بېړۍ پرون ناوخته چابهار ته ورسېده.

د سوداګرۍ او پانګونې خونې مرستیال یونس مومند نن ازادي راډیو ته وویل چې له افغانستان سره د هند د مرسته شویو غنمو ٥ زره ٧٥٠ مټريک ټنه چابهار بندر ته ورسېدل او هېواد ته د دغو غنمو لېږدول پيل شوي دي.

د دغو غنمو په لېږدونې سره د هندوستان د مرسته شويو غنمو له جملې څخه نږدې ٢١ زره مټريک ټنه‌يې لېږدول کېږي چې په هېواد کې د کرونا ويروس د خپرېدو بېړني حالت او غنمو ته د زياتې اړتيا وضیعت کابو کړي.

دوی وایي له دې سره جوخت د پاتې غنمو د واردولو کار دوام لري او ټاکل شوې ده د پاتې غنمو د لېږدولو بهير د جون په اتمه پيل شي.

د يادونې وړ ده، د هغو ١٠ زرو ټنو غنمو لېږدول چې پخوا له کاندولا بندر څخه پيل شوي وو، بشپړ شوي او د کندهار او هرات په زېرمو کې ځاى پر ځاى شوي دي.

د ملي پرمختيا شرکت د هندوستان د ٧٥ زره مټريک ټنه غنمو د لېږدونې مسؤليت منلى دى.

د افغانستان مالیې وزارت: ملي شورا دې د کرونا بودجه ژر تصیب کړي

د مالیې وزارت

د افغانستان مالیې وزارت له ملي شورا نه غواړي چې په افغانستان کې له کرونا ویروس سره د مبارزې لپاره بودجه ژر تر ژره تصیب کړي.

د دغه وزارت ویاند شمروز مسجدي نن ازادي راډیو ته وویل چې مالیې وزارت د ثور په ١٥مه نېټه د بودجې سند ولسي جرګې ته سپارلی، خو د نږدې یوې میاشتې په تېرېدو سره لاهم دغه سند نه‌دی تصویب او بې‌پرخلیکه پاتې دی.

دی وایي چې په عادي بودجه کې د کرونا ویروس سره د مبارزې لپاره نږدې ۱۰ میلیارده او ۱۶۹ میلیونه افغانۍ تعدیلات راغلي چې باید ملي شورا یې له ارزونو وروسته تصویب کړي.

دا په داسې حال کې ده چې د ١٣٩٩ مالي کال بودجه ۴۲۸ میلیارده افغانۍ ده چې له دې ۲۸۹ میلیارده عادي او ۱۳۹ میلیارده‌یې پراختیایي بودجه ده، خو ولسي جرګه وایي دغه بودجه متوازنه نه‌ده.

ملي امنیت شورا: په ۲ ورځو کې د طالبانو ۷۱۰ تنه بندیان خوشې شوي

د ازاد شويو طالب بندیان یوه ډله

د افغانستان د ملي امنیت شورا وايي چې په وروستیو دوو ورځو کې د وسله‌والو طالبانو ۷۱۰ تنه بندیان خوشې شوي دي.

د ملي امنیت شورا ویاند، جاوېد فیصل بېګا ازادي راډیو ته وویل چې دا کسان له پلچرخي، د پروان له مرکزي توقیف ځایه او نورو ولایتي زندانونو خوشې شوي دي.

جاوېد فیصل زیاته کړه: "دا لړۍ به نن یکشنبه هم دوام لري تر څو د جمهور رئیس له فرمان سره سم د طالبانو ۲۰۰۰ بندیان له زندانه خوشې شي.

هغه نه‌دي ویلي چې نن به څو زندانیان خوشې کېږي.

د افغانستان حکومت تېره اوونۍ وویل چې د طالبانو ۲۰۰۰ بندیان له زندانه خوشي شوي خو دا لړۍ لا هم روانه ده.

وسله‌والو طالبانو له حکومت سر د سولې د خبرو د پیل لپاره د خپلو ۵۰۰۰ بندیانو د خوشې کېدو غوښتنه کړې ده.

د وسله‌والو طالبانو یو ۵ کسیز پلاوی د دې بهیر د تخنیکي اړخ د څارنې لپاره کابل ته تللی دی.

په قطر کې د وسله‌والو طالبانو د سیاسي دفتر ویاند سهېل شاهین په یوه پیغام کې چې بېګا د ازادي راډیو خبریال ته رسېدلی ویلي چې تر اوسه یې د افغانستان د امنیتي ځواکونو ۴۲۰ غړي خوشي کړي دي.

خو د افغانستان حکومتي چارواکو په دې اړه لا څه نه‌دي ویلي.

مخکې په ځیني مواردو کې چارواکو ادعا کړې وه چې وسله‌والو طالبانو ملکي خلک هم د امنیتي ځواکونو په ګڼه کې شمېرلي او خوشې کړي دي.

نور راوښيه

XS
SM
MD
LG