د افغانستان د بیارغونې لپاره د امریکا د حکومت څارونکې اداره یا سیګار په خپل یوه نوي راپور کې د هېواد له امنیتي سکټور سره د امریکا د مرستندوی ماموریت چارو ته انتقادي کتنه کړې ده.
سیګار په خپل راپور کې وايي، متحده ایالاتو د افغانستان د امنیتي سکټور په مرستندوی ماموریت کې په مهمو پرېکړو کې افغانانو ته ونډه نه ورکوله او په نتیجه کې یې داسې پروګرامونه عملي کول چې افغانانو د امریکا له مرستې پرته هېڅ نشوای کولای.
د افغانستان د بیارغونې لپاره د امریکا د حکومت څارونکې اداره په خپل راپور کې چې پرون خپور شو، په افغانستان کې د امنیتي مسؤلیتونو د انتقال د ګډې قوماندې د یوه پخواني قوماندان ډګرجنرال دانیل بولګر له قوله لیکي چې نوموړی وايي، افغانانو ته یوازې خبر او هدایت ورکول کېدل، نه پوښتنه ترې کېده او نه سلا مشوره ورسره کېده.
د سیګار راپور زیاتوي، ډېری سلاکاران افغانستان ته له استول کېدو مخکې د ټرېننګ په پروګرامونو کې په سم ډول نه روزل کېدل او روزونکو هغوی ته د افغانستان د سېستمونو، وسلو، کلتور، عقایدو او تاریخ په اړه لازم معلومات نه ورکول.
سیګار وايي، د افغانستان د امنیتي سکټور مرستندوی ماموریت یو دوامدار او هراړخیز پلان نه درلود چې د هغه په اساس پرمخ ولاړ شي.
په راپور کې څو مهم ټکي یاد شوي دي چې سیګار وايي، په دې ماموریت کې د نیمګړتیاوو باعث شوي دي.
یو مهم ټکی دا دی چې سیګار وايي، سره له دې چې متحدایالاتو ۸۳،۳ میلیارده ډالر د امریکا د امنیتي بودجې لپاره ځانګړي کړي وو، خو حتی یو مسؤل شخص یا اداره، هېواد یا پوځ نه و چې د امنیتي سکټور د مرستندوی ماموریت پر چارو څار وکړي.
راپور یادونه کوي چې د افغانستان د امنیتي سکټور مرستندوی ماموریت د خپلو هڅو د پرمخ بیولو او د پرېکړو د تطبیق لپاره یو دومداره، هراړخیز او واضح پلان نه درلود.
راپور زیاتوي چې جنرال بولګر افغان دفاعي امنیتي ځواکونه د سازشونو یوه مجموعه بولي او وايي چې د دې ځواکونو د پیاوړتیا لپاره د امریکا د بودجې لومړیتوبونه او رغنده نظریې هرکال له پخوانیو هغو سره یوځای کېدل او د وخت په تېرېدو سره هېرېدل.
په راپور کې یادونه شوې چې په افغانستان کې د امریکا او ناټو د ځواکونو عمومي قوماندان د افغانستان په بېلابېلو ولایتونو کې د افغان ځواکونو د روزنې او سلامشورو د څرنګوالي په برخه کې قاطع صلاحیت نه لاره چې دې کار د افغانستان د دفاعي امنیتي ځواکونو د جوړولو په برخه کې ناانډولي رامنځته کړه او د امنیتي سکټور د مرستندوی ماموریت د معیاري کېدو مخه یې ونیوله.
سیګار وايي، د ډېرو زیاتو سرتېرو د تېښتې، هېواد ته له راستنیدو وروسته په بې ارتباطه دندو د ځینو روزل شویو کسانو د ګومارنې او د افغان پوځ په پالېسیو کې د توپیر له وجې د افغانستان دفاعي امنیتي ځواکونو ونشو کړای چې له هغو روزنیزو پروګرامونو ښه ګټه واخلي چې په امریکا کې دننه په پام کې نیول شوي وو او د همدې توپیرونو له کبله د امریکا دفاع وزارت په پام کې لري چې د ۲۰۲۰ کال په پای کې د افغان هوايي ځواک د پیلوټانو روزنیز پروګرام بند کړي.
