د لاسرسي لېنکونه

چهارشنبه ۲۷ وږی ۱۳۹۸ کابل ۰۶:۱۰

روغتیا وزارت: په کابل کې چاودنو ۶ تنه وژلي دي

د افغانستان د کورنیو چارو وزارت وايي د کابل په کارته سخي سیمه کې چاودنې شوي.


د کابل په پېښه کې ټپي ماشوم

لنډيز

د افغانستان د کورنیو چارو وزارت وايي د کابل په کارته سخي سیمه کې چاودنې شوي.

د دې وزارت سرپرست ویاند نصرت رحیمي ازادي راډیو ته وویل چې نن سهار په ۹ او ۳۰ دقیقو د کابل د پولیسو د درېیمې حوزې په علي اباد سیمه کې درې ځای پرځای شوي ماینونه چاودلي.

نوموړي وویل چې تر اوسه د تلفاتو په اړه دقیق ارقام نه‌لري.

بل‌خوا عیني شاهدان وايي چې په‌دې پېښه کې دوه تنه وژل چې یوه ښځه او ماشوم دی او ۱۵ تنه ټپیان علي اباد روغتونو ته وړل شوي دي.

تر اوسه کومې وسله والې ډلې ددې پېښې مسؤلیت نه دی منلی.

۱۸:۵۰ ۱.۱.۱۳۹۸

د کابل د جمال مېنې د سخي زیارت په سیمه کې د نن ورځې د چاودنو مسؤلیت داعش یا اسلامي دولت سختدریځې ډلې په غاړه واخېست.

په‌دې حملو کې چې د څرنګوالي په اړه یې ضد و نقیض راپورونه ورکول کېږي، لږ تر لږه ۶ تنه وژل شوي او ۲۳ نور ژوبل دي.

د کابل د عاجلو خدماتو رئیس محمد عاصم وايي چې په ټپیانو کې ۲ ماشومان هم شامل دي.

د کورنیو چارو وزارت سرپرست ویاند نصرت رحیمي وايي چې په جمال مېنه کې د سخي زیارت ته څېرمه درې چاودنې شوي خو دفاع وزارت وايي چې پر سیمه ۳ توغندي لګېدلي دي.

۱۵:۴۶ ۱.۱.۱۳۹۸

د ۱۳۹۸ لمریز کال په لومړۍ ورځ په کابل کې درېیو چاودنو لسګونو تنو ته مرګ ژوبله واړوله.

په‌داسې حال کې چې ولسمشر محمد اشرف په بلخ ولایت کې د نوروز په مناسبت جوړو شویو مراسمو کې ۱۳۹۸ لمریز کال د سولې کال ياد کړ، په کابل کې درېیو چاودنو شپږ تنه ووژل او له شلو زیات یې ټپيان کړل.

د افغانستان د کورنیو چارو وزارت سرپرست ویاند نصرت رحیمي ازادي راډیو ته وویل، چې دغې چاودنې د کابل ښار علي‌اباد سیمه کې سخي زیارت څخه لېرې شوي دي.

د افغانستان د کورنیو چارو وزارت سرپرست ویاند نصرت رحیمي
د افغانستان د کورنیو چارو وزارت سرپرست ویاند نصرت رحیمي

ښاغلي رحیمي زیاته کړه:

"د افغانستان د خلکو دښمنانو درې حلقې ماینونه د درېیمې امنیتي حوزې اړوند د علياباد په پس کوڅو کې ځای پرځای کړي وو چې په ترڅ کې یې زموږ شپږ تنه هېواد وال چې يوه په‌کې مېرمن ده شهیدان شوي دي او ۲۳ تنه نور چې ټول ملکیان دي ټپيان شوي دي."

ښاغلي رحیمي دا شان وویل چې امنیتي ځواکونو په کابل، بلخ او هرات کې شل حلقې ماینونه هم کشف او خنثا کړي دي.

دا په‌داسې حال کې ده چې تېرکال هم په همدغه ورځ په کابل کې سخي زیارت ته څېرمه په ځانمرګي برید کې له ۲۹ تنو زیات وژل شوي و او ۵۲ نور ټپيان وو.

په‌داسې حال کې چې د افغانستان دفاع وزارت په خپله ټویټرپاڼه کې لیکلي چې د علي‌اباد په جمال مېنه کې مرګ ژوبلې د هاوان یا راکټ د ویشتل شوېو ګولیو په نتیجه کې شوي دي.

بل‌خوا د افغانستان د کورنیو چارو وزارت ویاند بیا وايي چې دغې چاودنې په‌داسې ځای کې مخکې له مخې د اېښودل شویو ماینونو له امله شوي دي چې هلته کوم امنیتي کمربند نه‌وو.

په ورته وخت کې دوو تنو کابل ښاریانو محمد یحی او سجاد د دغو چاودنو په اړه د خپل سترګو لیدلی حال له ازادي راډیو سره داسې شریک کړل:

د کابل په پېښه کې ټپي شوی ماشوم
د کابل په پېښه کې ټپي شوی ماشوم

"نن د نوي کال ورځ ده، موږ کارته سخي ته راغلو چې دلته د درې فایره هانونو اوازونه واورېدل شول، موږ ته امنیتي ځواکونو وویل چې تاسو پورته لاړ شئ چې کومه بله پېښه ونه‌شي نو موږ پورته راغلو.

-دا چې راکټ و او که کوم بل څه پوه نه‌شوم، د موټر پرخچې راباندې وشیندل شوې، موږ وتښتېدو، مور هلته پټه شوه، په دیوال موږ يو راکټ ولګېد، زه او ورور مې د پلار سره په منډه روغتون ته راغلو."

دا په‌داسې حال کې ده چې تېره ورځ د کورنیو چارو وزارت اعلان وکړ چې ټول افغانستان کې يې د نوروز لمانځلو لپاره کلک امنیتي تدابیر نیول شوي دي.

خو په کابل کې د امریکا سفارت دوه ورځې وړاندې د نوروز په ورځو کې د احتمالي حملو خبرداری ورکړی و.

راپور: محمد واصل وصال

۱۳:۲۳ ۱.۱.۱۳۹۸

د کابل په جمال مېنه کې نن په درېيو چاودنو کې لږ تر لږه ۶ تنه وژل شوي دي.

د افغانستان د کورنیو چارو د وزارت سرپرست ویاند نصرت رحیمي له ازادي راډیو سره په خبرو کې وویل چې د چاودنو په نتیجه کې مرګ ژوبلې پېښې شوي دي.

ښاغلي رحیمي وايي چې د علي اباد په سیمه کې دا چاودنې د اېښودل شویو ماینونو په نتیجه کې شوي دي.

خو د عامې روغتیا وزارت وايي چې په‌دې چاودنو کې ۶ تنه وژل شوي او ۲۳ نور ژوبل دي.

د چاودنو د څرنګوالي په اړه هم ضد و نقیض راپورونه ورکول کېږي.

دفاع وزارت په خپله ټویټرپاڼه کې لیکلي چې په جمال مېنه کې مرګ ژوبلې د هاوان یا راکټ د ویشتل شویو ګولیو په نتیجه کې شوي دي.

دا وزارت همدا راز وايي چې پولیسو حمله کوونکی نیولی دی.

تراوسه کومې وسله‌والې ډلې د دغو چاودنو مسؤلیت نه دی منلی.

۱۱:۳۱ ۱.۱.۱۳۹۸

د کابل په کارته سخي کې نن درې چاودنې وشوې.

د افغانستان د کورنیو چارو د وزارت سرپرست ویاند نصرت رحیمي ازادي راډیو ته د دغو چاونو په تأیید وویل چې مرګ ژوبله یې اړولې، خو دقیق شمېر یې تر اوسه نه‌دی معلوم.

ښاغلي رحیمي د علي اباد په سیمه کې دغه چاودنې له مخکې ځای پرځای شوي ماینونه وبلل.

یو شمېر عیني شاهدانو او د علي اباد روغتون مسؤلینو د ازادي راډیو ته خبریال ته ویلي چې په‌دې پيښه کې دوه تنه مړه او ۱۳ نور ټپیان شوي دي.

په وژل شویو کې یوه مېرمن شامله ده.

د دوو ټپیانو روغتیایي وضعیت هم نازک ښودل شوی دی.

تر اوسه کومې وسله‌والې ډلې د دغو چاودنو مسؤلیت نه‌دی منلی.

نور راوښيه

XS
SM
MD
LG