د لاسرسي لېنکونه

سه شنبه ۴ چنګاښ ۱۳۹۸ کابل ۰۱:۵۵

د پاکستانۍ کرکټ لوبډلې د ناکامیو لړۍ روانه ده


د جنوبي افریقا د کرکټ ملي لوبډله له خپلې پاکستانۍ سیالې سره

د جنوبي افریقا د کرکټ ملي لوبډلې د پاکستان د کرکټ ملي لوبډلې ته د ۵ یو ورځنیو لوبو د لړۍ په وروستۍ لوبه کې ماتې ورکړه او دا لړۍ یې وګټله.

د پاکستان او جنوبي افریقا د کرکټ د لوبډلو ترمنځ د ۵ یو ورځنیو لوبو د لړۍ دغه وروستۍ لوبه چې دواړو لوبډلو ته‌یې د پای‌لوبې حیثیت لاره، د چهارشنبې په ورځ د جنوبي افریقا په کېپ ټاون لوبغالي کې ترسره شوه.

که څه هم د لوبې پچه جنوبي افریقا وګټله، خو لومړی یې پاکستان ته د بېټنګ بلنه ورکړه.

پاکستانۍ لوبډلې په ټاکلو ۵۰ اورونو کې د ۸ لوبغاړو په سوځېدو ۲۴۰ منډې جوړې کړې او جنوبي افریقا ته‌یې د ۲۴۱ منډو هدف ورکړ.

په پاکستاني لوبغاړو کې یوازې اوپنر فخر الزمان تر ټولو ډېرې ۷۰ منډې جوړې کړې.

پاکستانی کرکټ فخر الزمان
پاکستانی کرکټ فخر الزمان

له فخر الزمان پرته نورو پاکستاني لوبغاړو د جنوبي افریقا د بالرانو مقابله ونه‌کړای شوه او عماد وسیم ۴۷، شعیب ملک ۳۱ او بابر اعظو یوازې ۲۴ منډې جوړې کړې.

د پاکستانۍ لوبډلې له‌خوا د ورکړي ۲۴۱ منډو د هدف په ځواب کې د جنوبي افریقا لوبغاړو ښه لوبه وکړه او یاد هدف‌یې په ۴۰ اوور کې یوازې د ۳ لوبغاړو په سوځېدو په اسانۍ پوره کړ او پاکستان ته‌یې په ۷ وېکټو او ۱۰ اورونو ستره ماتې ورکړه.

افریقايي لوبغاړي د لوبې له پیله پر لوبې برلاسي ښکارېدل.

اوپنر ډي.کاک یوازې د ۵۸ بالونو په لوبولو د ۳ شپږیزو او ۱۱ څلوریزو پر مټ ۸۳ منډې جوړې کړې.

پر کاک سربېره وينډر ډوسان او کپټان فاف ډوپلیسي هم ۵۰-۵۰ منډې جوړې کړې.

په پاکستاني بالرانو ګې عثمان شینواري، شاهین اپریدي او محمد عامر ۱-۱ افریقايي لوبغاړی اوټ کړ.

دا د پاکستان او جنوبي افریقا د کرکټ د لوبډلو ترمنځ ۵مه یو ورځنۍ لوبه وه.

تر دې مخکې دواړو لوبډلو ۴ لوبې کړې وې چې ۲یې پاکستان او ۲یې جنوبي افریقا ګټلې وې.

د یادونې وړ ده چې د جنوبي افریقا ډي.کاک د خپلې تېزې لوبې له امله د دغې لوبې او د پاکستان امام‌الحق په ۵ لوبو کې د ډېرو منډو جوړولو له امله د سیریز غوره لوبغاړی ونومول شو.

XS
SM
MD
LG