د افغانستان اجرائیه ریاست وايي، هیله شته چې دا ځلې پاکستان ته د زلمي خلیلزاد سفر له وسلهوالو طالبانو سره د سولې د عملي خبرو د پیل لامل شي.
اجرائیه ریاست وايي، هیله شته چې پاکستان ته د افغانستان د سولې لپاره د امریکا د بهرنیو چارو وزارت د ځانګړي استازي زلمي خلیلزاد دوهم سفر افغانان سولې ته نږدې او پاکستان به پهدې برخه کې عملي اقداماتو ته اړ باسي.
د دغه ریاست مرستیال ویاند فریدون خوځون د سې شنبې په ورځ «۱۳۹۷ کال د لیندۍ ۱۳» ازادي راډيو ته وویل، تمه ده چې دا وار ښاغلی خلیلزاد له یوې عملي لاسته راوړنې سره له پاکستانه افغانستان ته راشي.
ښاغلي خوځون زیاته کړه:
"د سیمې هېوادونو ته د ډاکتر زلمي خلیلزاد سفر موږ ته هيلهمند کوونکی دی، موږ تمه لرو چې دا وار به د سولې عملي خبرې اترې پیل شي او هیله مو دا ده چې دا وار ښاغلی خلیلزاد د ترورېستانو د پټنځایونو د ختمولو او د وسلهوالو طالبانو د تمویل او د تجهیز د موضوع په اړه له یوه عملي خبر سره کابل ته راشي."
دا پهداسې حال کې ده چې د افغانستان د سولې لپاره د متحده ایالاتو د بهرنیو چارو وزارت ځانګړی استازی زلمی خلیلزاد نن د دوهم ځل لپاره پاکستان ته رسېدلی دی.
د امریکا له بهرنیو چارو وزارته په خپره شوې خبرپاڼه کې راغلي چې خلیلزاد به د ډسمبر له دوهمې تر ۲۰مې نېټې پورې د افغانستان تر څنګ روسیې، ازبکستان، ترکمنستان، متحده عربي اماراتو، قطر او بلجیم ته سفرونه وکړي.
که څه هم پهدې اعلامیه کې له وسلهوالو طالبانو سره د ښاغلي خلیلزاد د لیدلو په اړه په څرګند ډول څه نهدي ویل شوي، خو بریتانوۍ ورځپاڼې ټلېګراف خبر ورکړی چې د طالبانو د قطر د سیاسي دفتر استازي له امریکا د دوهم پړاو خبرو په هدف پاکستان ته رسېدلي دي.
په ورته وخت کې د وسلهوالو طالبانو یوې سرچینې هم ازادي راډيو ته تأييد کړې چې د قطر د سیاسي دفتر د مسؤل شیر محمد عباس ستانکزي په مشرۍ د دغه دفتر شپږ کسیز پلاوی پاکستان ته رسېدلی دی.
بلخوا د پاکستان یوه لوړپوړي چارواکي ویلي چې د امریکا ولسمشر ډونالد ټرمپ د پاکستان صدارعظم ته یو لیک استولی او پهدغه لیکيې کې ترې د افغان سولې له پروسې سره د مرستې غوښتنه کړې ده، هغه موضوع چې سپینې ماڼۍ هم تأييد کړې ده.
امریکايي چارواکو پهدې وروستیو کې پر پاکستان فشارونه زیات کړي چې هغه طالب مشران چې پهدې هېواد کې اوسېږي له افغان حکومت سره د خبرو اترو مېز ته کېنوي.
د اجرائیه ریاست مرستیال ویاند فریدون خوځون وايي، افغان حکومت تمه لري چې امریکا به پر پاکستان فشارونه زیات کړي او دغه هېواد به له افغانستان سره د خپلو پخوانیو ژمنو عملي کېدو ته اړ باسي.
د پاکستان د بهرنیو چارو وزارت د یوې اعلامیې په خپرولو سره ویلي چې پاکستان دغه موضوع ته ژمن دی او د خپل نېک نیت له مخې به د افغان سولې پروسې ته د زمینې برابرولو نقش ادا کړي.
له دې ټولو سره سره د نړیوالو چارو افغان کارپوه سید خالد سادات هم د افغان سولې په اړه د ښاغلي خلیلزاد سفر مهم بولي.
ښاغلي سادات زیاته کړه:
"زه فکر کوم چې د ښاغلي خلیلزاد سفر له درېیو اړخونو ډېر مهم دی:
- یو دا چې د سولې د پروسې تېزوالی ښيي.
- دوهم د څو نورو هېوادونو زیاتول چې د افغانستان په مسئله کې دخیل دي.
- درېیم پاکستان ته د طالبانو د سیاسي استازو استول، دا ټول موارد موږ دغه سفر ته هیلهمند کوي."
ښاغلی سادات وايي چې پاکستان پر وسلهوالو طالبانو له خپل نفوذ، پهدغه ډلې د پوځي فشار راوستلو او له طالبانو سره د مرستو د درولو په وسیله کولای شي یاده ډله له افغان حکومت سره د سولې د خبرو اترو مېز ته کېنوي.
راپور: اکرامالله اکرام
