د لاسرسي لېنکونه

جمعه ۲۵ لړم ۱۳۹۷ کابل ۰۳:۴۸

صالح: کابل کې ان خلک د کورنیو په مخ کې د وسله‎والو له لوري په نښه کېږي


د افغانستان د ولسي جرګې د کورني امنیت کمېسیون یو شمېر غړي وايي، په کابل ښار کې د وسله‎والو حملو تر څنګ د خلکو تښتونې او په یو شمېر مدني فعالانو او ورزشکارانو حملو خلک اندېښمن کړي دي.

د دغه کمېسیون غړي صالح محمد صالح د پنجشنبې په ورځ «۱۳۹۷ کال د لړم ۱۷» ازادي راډیو سره په خبرو کې اندېښنه وښوده چې په‎دې وروستیو کې د کابل ښار امنیت خراب شوی ان تر دې چې خلک د کورنیو په مخ کې د وسله‎والو له لوري په نښه کېږي.

ښاغلي صالح د هدفي وژنو د زیاتېدو ستر لامل په چارو کې د امنیتي او کشفي ارګانونو ناغېړي ګڼي.

صالح محمد صالح
صالح محمد صالح

دی زیاتوي:

"په کابل او بیا په ټول افغانستان کې امنیتي وضعیت د اندېښنې وړ دی، هدفي وژنې زیاتې شوي، هغه ډول چې لازمه ده امنیتي او کشفي ارګانونو کار نه‎دی کړی. د هدفي وژنو او ورته پېښو د مخنیوي لپاره باید کشفي ارګانونو ته کافي امکانات په واک کې ورکړل شي."

دا په‎داسې حال کې ده چې په‎دې وروستیو کې د کابل ښار په بېلابېلو سیمو کې په یو شمېر کسانو د نامعلومو وسله‎والو له لوري حملې وشوې.

تر ټولو تازه پېښه‌یې د روانې اوونۍ د سې شنبې «۱۳۹۷ کال د لړم ۱۵» په ماښام پر مدني فعال خیرالله شینواري وه چې نوموړی په‎کې ټپي شو.

له دې نږدې ۱۵ ورځې وړاندې د ازادو سیالیو لوبغاړی احمد ولي هوتک هم خپل کورته نږدې په یوه حمله کې ټپي شو.

تر یادو پېښو مخکې بیا د کورنیو چارو د وزارت د پخواني جنرال زلمي وردګ او په کابل کې د پکتیکا د ځانګړو ځواکونو د قوماندان عزیزالله کاروان هدفي وژنې هغه څه دي چې د پایتخت په ځانګړي ډول د کابل ښار د امنیت په اړه‌يې د خلکو اندېښنې زیاتې کړې دي.

په ورته وخت کې د کابل امنیتي چارواکي وايي چې د دا شان حملو د مخنیوي لپاره یو لړ اقدامات شوي دي.

بصیر مجاهد
بصیر مجاهد

د کابل د امنیه قوماندانۍ ویاند بصیر مجاهد ازادي راډیو ته وویل:

"په‎دې میاشت کې مو د جنایي پېښو په برخه کې له ۲۲۲ تر ۲۲۳ زیات کسان نیولي او د قانون منګولو ته مو سپارلي دي چې په‎دې ډله کې انسان تښتوونکي، قاتلین، غله او د ناقانونه وسلو قاچاقبران وو."

ښاغلی مجاهد وايي، د امنیتي ځواکونو په هلو ځلو سره د پخوا په پرتله په کابل ښار کې د جنايي پېښو کچه هم راټیټه شوې ده،

خو د ولسي جرګې د کورني امنیت کمېسیون غړي ټینګار کوي چې کشفي او امنیتي ادارې باید له هر ډول پېښو وړاندې د دښمن ناوړه اهداف شنډ کړي.

راپور: فېروزه عزیزي

XS
SM
MD
LG