د کندز سیمهییز چارواکي وايي چې د کندز – تخار له لارې د تښتول شوېو مسافرینو له ډلې څخه ۹۲ تنه یې خوشې شوي او ۳۶ تنه یې لا هم د وسلهوالو مخالفینو په بند کې دي.
د کندز د خاناباد ولسوال حیاتالله امیري له ازادي راډیو سره د خبرو پر مهال وویل چې نن سهار وسلهوالو طالبانو د کندز – تخار پر لويې لارې د درې عرادې ۴۰۴ ډوله مسافر وړونکو موټرونه سپرلۍ له ځانه بېولې وې، خو د سپينږېرو په هڅو سره ۹۲ تنه یې د دغې ډلې له منګلو څخه ازاد شوي او ۳۶ تنه یې لا هم د وسلهوالو طالبانو په اسارت کې دي.
ښاغلي امیري زیاته کړه:
"په مجموع کې ۹۲ تنه د درې مسافر وړونکو بسونو سپرلۍ د طالبانو له لوري خوشې شوي او ۳۶ تنه یې لا هم د وسلهوالو طالبانو په اسارت کې دي چې هغوی تذکرې نه درلودې او هڅې روانې دي چې پاتې شمېر هم د هغوی له اسارته ازاد شي."
ښاغلي امیري زیاته کړه چې اوسمهال په سیمه کې د پاتې یرغمل شوېو مسافرینو د خوشې کېدو په هدف د قومي مشرانو هڅې روانې دي، څو د وسلهوالو طالبانو له اسارته ازاد شي.
د ولسوال په خبره چې تښتول شوي مسافران ټول ملکي وګړي دي.
په ورته وخت کې د کندز ولایتي شورا هم د دې ولایت د لویو لارو د امنیت په اړه اندېښنه وښوده او سربېره پر دې د کندز سیمهییز چارواکي د دې ولایت د امنیت د تأمینولو په برخه کې پاتې بولي.
د کندز د ولایتي شورا یو تن غړی امرالدین ولي ازادي راډیو وویل:
"د کندز ټولې لويې لارې له لوړ امنیتي ګواښ سره مخ دي او هېڅڅوک په ډاډه زړه تګ را تګ نهشي کولای او سیمهییز چارواکي یي هم پهدې ښه پوهیږئ، خو بیا هم د دې ولایت امنیتي وضعیت ته توجه نهکوي، موږ پر مرکزي حکومت غږ کوو چې د دغه ولایت روان وضعیت ته جدي توجه وکړي."
له دې سره سم د کندز د مدني ټولنو رئیس عنایت الله خلیق هم پر حکومت غږ کوي چې د کندز– تخار د لويې لارې امنیت ته جدي توجه وکړي، څو خلک په ډاډه زړه پر دغې لارې ګاونډیو ولایتونو ته تګ را تګ وکړي.
نوموړی وايي:
"له ډېرې مودې راهیسې د کندز لويې لارې ناامنه دي او پهدې اړه تل خلکو خپلې انديښنې څرګند کړي، خو تراوسه ورته پاملرنه نهده شوې او موږ بیا هم پر حکومت غږ کوو چې د دې ولایت امنیتي وضعیت ته جدي پاملرنه وکړي."
دغه راز کندزیان هم وايي چې د کندز – تخار لويه لار له لوړ امنیتي ګواښ سره مخ ده او خلک په ډاډه زړه پر دغې لارې تګ را تګ نهشي کولاي.
د کندز دوو تنو اوسېدونکو ذبیح الله او امیرخان پهدې اړه ازادي راډیو ته وویل:
"د لارې وضعیت ډېر خراب دی او موږ د تګ راتګ پر مهال د خونديتوب احساس نهکوو او دولت ورته هېڅ توجه نهکوي او طالبان هر وخت دغې لارې ته راوځي او د خپل اهدافو پسې ګرځي.
-د کندز لويې لارې ډېر ناامنه دي او په ۲۰۰ مترۍ کې امنیتي پوستې هم موجودي دي، خو بیا هم طالبانو له سړکه خلک تښتوي او د پوستو کسان یوازې خپلې پوستې ساتي او د دولت پيسۍ مصرفوي او په ټوله کې دا د دولت ضعف دی."
کندزیان وايي چې په وارـ وار دوی د کندز – تخار او د کندز – بغلان د لويو لارو د امنیتي وضعیت په اړه خپل غږ پورته کړی دی، خو لا تراوسه پورې پهدې اړه د کندز د سیمهییزو چارواکو له لوري کوټلي ګامونه نهدي پورته شوي.
طالب ویاند ذبیح الله مجاهد ازادي راډیو ته تأیید کړې چې دا کسان د دوی له خوا د تلاشۍ په هدف له موټرو ښکته شوي دي، نوموړي ویلي چې له تحقیقاتو وروسته یې ګڼ شمېر له دې کسانو خوشې کړي او له پاتې نورو هم پوښتنې ګرویږنې کوي که دولتي کارکوونکي او د امنتیي ځواکونو غړي نه وي هغه به خوشې شي.
افغان چارواکي وايي، ټول برمته شوي کسان ولسي خلک دي.
راپور: اجمل ارین-کندز