د لاسرسي لېنکونه

دوشنبه ۲ تله ۱۳۹۷ کابل ۰۴:۴۵

د ارزګان-کندهار پر لویه لاره د تښتول شویو مسافرو برخلیک لا هم نه‌دی معلوم


د ارزګان-کندهار له لویې لارې د وسله‎والو طالبانو په لاس د ۳۰ کسانو په تښتونې شپږ ورځې تېرېږي، خو لا هم له دې ډلې ځیني کسان نه‎دي راخوشې شوي.

د ارزګان ولایت چارواکي وايي، تر اوسه نه‎دي بریالي شوي چې له وسله‎والو طالبانو سره پاتې ۱۳ تنه تښتول شوي مسافرین وژغوري.

د ارزګان د والي ویاند دوست محمد نایاب پرون شپه ازادي راډیو ته وویل، تېره سې شنبه ۳۰ تنه مسافرین د ارزګان-کندهار له لویې لارې وتښتول شول چې ۱۷ تنه‌یې خوشې شول او پاتې نور لاهم له طالبانو سره دي.

د ارزګان د والي ویاند دوست محمد نایاب
د ارزګان د والي ویاند دوست محمد نایاب

ښاغلي نایاب زیاته کړه:

"۱۳ تنه‌یې متأسفانه تر اوسه پورې له ځانه سره ساتلي دي. په‎دې کسانو کې هم ډېری ملکیان او بې‎ګناه خلک دي چې یوازې د بډایه کورنیو پورې تعلق لري او د دې لپاره چې د دوی له کورنیو یو څه پیسې ترلاسه کړي، ځان سره‌یې ساتلي دي. د تېرې پنجشنبې په ورځ د سپین‎ږیرو په وساطت پنځه کسان خوشې شول. زموږ هڅې لا هم دوام لري چې پاتې کسان په یو شکل راخوشې کړو، خو تر اوسه په‎دې برخه کې نه‎یو بریالي شوي."

نایاب وايي، وسله‎وال طالبان د دغو ۱۳ کسانو ځایونه وخت په وخت بدلوي، خو د هغه په خبره دا کسان ترینکوټ ته نږدې په هغو سیمو کې ساتل کېږي چې وسله‎وال طالبان پرې کنټرول لري.

نایاب وايي، د تښتول شویو خلکو ترمنځ هېڅ دولتي کارکوونکی نه‎دی شامل او ټول عام خلک دي هغه خبره چې ځینې سرچینې یې نه‌تأییدوي.

په ارزګان کې ځینو سرچینو ازادي راډیو ته وویل چې راخوشې شوي کسان ۱۱ تنه دي او ۱۹ کسان لا هم له طالبانو سره دي چې ترمنځ‌یې ۱۷ افغان پولیس شامل دي.

د ارزګان د ولایتي شورا رئیس امیر خان بارکزي هم پرون یکشنبه له ازادي راډیو سره په خبرو کې وویل چې د تښتول شویو کسانو ترمنځ د کندهار ولایت ځیني پولیس شامل دي، خو دوی هڅه کوي چې د قومي سپین‎ږیرو په وساطت دا خلک راخوشې کړي.

د ارزګان د ولایتي شورا رئیس امیر خان بارکزی
د ارزګان د ولایتي شورا رئیس امیر خان بارکزی

نوموړی وايي:

"له دوی سره د ارزګان کوم دولتي کسان نه‌وو چې هغوی «طالبان» کومه غوښتنه وکړي او موږ یې ورسره ومنو، خو په تښتول شویو کسانو کې ځیني کسان پولیس دي چې هغه د کندهار مربوط دي. کوم ځای کې چې دوی نیولي وو، دستي یې انتقال کړي دي، مرکز ترینکوټ شااوخوا سیمو ته. یو دوه یا درې کسان چې موږ معلومات لرو هغه‌یې هلمند ته انتقال کړي دي."

د کندهار امنیتي چارواکو تر اوسه په دې اړه څه نه‎دي ویلي چې رښتیا هم د تښتول شویو کسانو ترمنځ د دغه ولایت پولیس شامل دي که څنګه؟

د افغانستان په لویو لارو او نا امنو سیمو کې د عامو خلکو او ځیني وخت د دولتي سرتېرو تښتونه او یرغمل نیونه کوم بې‌مخینې عمل نه‎دی، خو اندېښنې له دې دي چې په ډېرو پېښو کې تښتول شويو کسانو ته مرګ‎ژوبله اوښتې ده.

تر ټولو تازه پېښه په ننګرهار ولایت کې ثبت شوې ده.

د کب په لومړۍ په ننګرهار کې د هغو ۹ ملکیانو جسدونه وموندل شول چې تېر میلادي کال په کوټ ولسوالۍ کې تښتول شوي وو.

راپور: صفي‌الله ستانکزی

XS
SM
MD
LG