د لاسرسي لېنکونه

پنجشنبه ۶ چنګاښ ۱۳۹۸ کابل ۰۵:۱۷

د پاکستان امنیتي ادارو د مستونګ د ځانمرګي برید د پلانوونکي د وژلو ادعا کړې


د مستونګ انتحاري حمله کې ۱۵۱کسان ووژل شول

د پاکستان امنیتي ادارو ادعا کړې چې د بلوچستان قلات سیمه کې یې د مستونګ د خونړي ځانمرګي برید پلانوونکی او د هغه دوه نور ملګري په عملیاتو کې وژلي دي.

دا په داسې حال کې ده چې د پنجشنبې په ورځ د بلوچستان د پولیسو مشر محسن حسن د پاکستان د مشرانو جرګې قاېمه کومېټې ته ویلي و چې پولیسو د مستونګ د ځانمرګي بریدګر او مرسته کوونکي پېژندلي چې د نیولو لپاره یې هڅې روانې دي.

نوموړي همداشان دغه کومیټې ته ویلي و، د مستونګ ځانمرګی بریدګر حافظ نواز نومېده چې له آره د پښتونخوا د ایبټ اباد سیمې اوسېدونکی و، خو په دې وروستیو کې په سند صوبه کې اوسېده.

پاکستاني رسنیو د جمعې په ورځ د امنیتي سرچینو په حواله ویلي، امنیتي ځواکونو د بلوچستان په قلات سیمه کې د ترهګرو پرضد عملیات کړي چې په نتیجه کې یې د مستونګ ځانمرګي برید پلانوونکی او په سیمه کې د داعش مهم قوماندان مفتي هدایت الله له خپلو دوو ملګرو سره وژل شوی دی.

د مستونګ په انتحاري حمله کې ګڼ کسان مړه او ټپیان شول.
د مستونګ په انتحاري حمله کې ګڼ کسان مړه او ټپیان شول.

امنیتي سرچینو ویلي، د درېواړو وژل شویو ترهګرو مړي نېږدې روغتون ته وړل شوي، خو په هغوی کې یوازې د مفتي هدایت الله پېژندنه شوې او د ملګرو په اړه یې تراوسه معلومت نه دي ترلاسه شوي.

د روانې میاشت په ۱۴مه نېټه د بلوچستان په مستونګ سیمه کې د بلوچستان عوامي ګوند د مشر او د پارلمان ټاکنو لپاره د همدې ګوند کاندید نوابزاده سراج ريساني د انتخاباتي کمپاېن پر غونډې ځانمرګی برید وشو چې په نتیجه کې یې د وروستیو راپورونو له مخې د ريساني په ګډون لږ تر لږه ۱۵۱ کسان مړه او همدومره نور ټپیان شول.

د دغه ځانمرګی برید مسؤلیت داعش وسله والې ډلې پر غاړه اخیستی و.

په پاکستان کې د روانې میاشت په ۲۵مه نېټه د پارلماني ټاکنو لپاره د کمپاین تر پیلېدو وروسته پر یو شمېر سیاستوالو بریدونه شوي چې لسګونو کسانو ته یې مرګ ژوبله اړولې ده.

په بلوچستان کې د بلوچستان عوامي نېشنل ګوند پر مشر تر ځانمرګي برید مخکې په پېښور په یکه توت سیمه کې کې د عوامي نېشنل ګوند پر یوه جګپوړي چارواکي هارون بلور هم ځانمرګی برید شوی و چې په نتیجه کې یې د هارون په ګډون لږ تر لږه ۲۱ کسان مړه او ۶۵ ټپیان شوي ول.

په دغه انتحاري حمله کې ګڼ کسان مړه او ټپیان شول
په دغه انتحاري حمله کې ګڼ کسان مړه او ټپیان شول

د یادونې وړ ده چې که څه هم ددغه برید مسؤلیت تحریک طالبان پاکستان منلی و، خو بیا وروسته د عوامي نېشنل ګوند مشر او د هارون بلور کاکا، غلام احمد بلور د طالبانو ادعا رد کړه او ویې ویل چې په دغه برید کې یې "خپلو" خلکو لاس لاره.

XS
SM
MD
LG