د لاسرسۍ وړ لېنکونه

تازه خبر
پنجشنبه ۹ وری ۱۴۰۳ کابل ۰۷:۱۷

ائتلافي قواوې: د یمن حکومتي ځواکونه په «حدیده» کې د پرمختګ په حال کې دي


د سعودي عربستان په مشرۍ ائتلافي قواوې وايي چې د یمن حکومتي ځواکونه د هغه هېواد د لوېدیځ په ساحلي ښار حدیده کې د پرمختګ په حال کې دي.

دا ښار په یمن کې د روانې کورنۍ جګړې له امله ډېر ځپل شوی او خلک‌یې بېړنیو بشري مرستو ته اړتیا لري.

حدیده ښار له ۲۰۱۵ میلادي کال راهیسې چې په یمن کې د حکومتي ځواکونو او د ایران د ملاتړ کوونکو، شیعه حوثي وسله‎والو ترمنځ کړکېچ پیل شوی، د جګړې ډګر دی.

حدیده ښار پر سره سمندرګي پروت دی او د نړیوالو خیریه ادارو د بشري مرستو اصلي دروازه بلل کېږي.

په یمن کې د ډېرې وچکالۍ له امله هم خلک د قحطۍ له ګواښ سره مخامخ دي او میلیونونه یمنیان بشري مرستو ته اړتیا لري.

یو شمېر قحطۍ ځپلي یمنیان
یو شمېر قحطۍ ځپلي یمنیان

خو په یمن کې د سعودي عربستان په مشرۍ، د عربي ائتلاف ځواکونه وايي، حدیده داسې بندر دی چې حوثي وسله‎والو ته د بالیستیک مزایلو په ګډون، د وسلو مختلف ډولونه رسېږي.

ائتلافي قواوې پر ایران تور پورې کوي چې په سره سمندرګي کې وسلې د حدیده ښار ته لېږي او په‎دې ډول، شیعه حوثي وسله‎وال مسلح کوي.

خو تهران دا تورونه په مکرر ډول رد کړي دي.

د سعودي په مشرۍ د ائتلافي قواوو ویاند، ترکي المالکي د دوشنبې په ورځ «۱۳۹۷ کال د غبرګولي ۰۷» ریاض کې خبریالانو ته وویل، د یمن پوځ چې دوی یې ملاتړ کوي، له حدیده ښاره یوازې ۲۰ کېلو متره واټن لري او د ښار د نیولو لپاره پوځي عملیات‌یې روان دي.

ترکي المالکي وویل چې د ائتلافي قواوو هدف د هغه شاه رګ پرې کول دي چې حوثي وسله‎والو ته‌یې ګټه رسېږي.

هغه ادعا وکړه چې د حوثي وسله‎والو مورچلې د ړنګېدو په حال کې دي.

خو د یمن د پلازمېنې، صنعا لپاره د حوثي ملېشه ځواکونو له لوري ټاکل شوي والي، حمود عباد دا ادعاوې رد کړې دي.

حمود عباد د دوشنبې په ورځ «۱۳۹۷ کال د غبرګولي ۰۷» په صنعا کې د وینا پر وخت، د حدیده ښار پر قومي مشرانو غږ وکړ چې د خپل مذهبي او وطني مسئولیت پر اساس، د خپلې خاورې ساتنه وکړي.

په یمن کې د حوثي ملېشه ځواکونو قوماندان، عبدالمالک الحوثي هم د دوشنبې په ورځ «۱۳۹۷ کال د غبرګولي ۰۷» پر ټلوېزیون په وینا کې وویل چې حوثیان پر حدیده د ائتلافي قواوو د عملیاتو شنډولو ته تیار دي.

دا په‎داسې حال کې ده چې د ملګرو ملتونو سازمان خبرداری ورکړی چې د حدیده د نیولو لپاره پوځي عملیات کولای شي چې د هغو بشري مرستو مخنیوی وکړي چې یمنیان سخته اړتیا ورته لري.

راپورونه وايي چې حوثي ملېشه ځواکونو په حدیده کې د مزایلو حملو ته شدت ورکړی دی.

د یمن پوځ ویلي چې د حدیده د نیولو لپاره پوځي عملیات له دې امله په سستۍ پر مخ ځي چې حوثي وسله‎والو ډېر ماینونه اېښي دي.

په یمن کې په وروستیو درېیو کلونو کې چې د سعودي عربستان په مشرۍ ائتلافي قواوو په یمن کې پوځي عملیات پیل کړي، ۱۰ زره کسان وژل شوي دي.

د دې تر څنګ، ۲۲۰۰ وګړي د وبا له امله مړه شوي او میلیونونه یمنیان د سختې وچکالۍ له امله په سخت حال کې ژوند کوي.

ملګرو ملتونو ویلي چې یمن په نړۍ کې له تر ټولو سخت بشري ناورین سره مخامخ دی.

XS
SM
MD
LG