یو شمېر افغانانو په کابل کې د ملګرو ملتونو د دفتر مخې ته د پاکستان د هغې پریکړې خلاف مظاهره وکړه، کومه چې لهمخې یې قبایلي سیمې په خېبر پښتونخوا کې مدغمېږي.
خېبر پښتونخوا سره د قبایلي سیمو د ادغامېدو په تړاو د پاکستان د پارلمان وروستۍ پریکړه د یو شمېر افغانانو سخت غبرګونونه راپارولي دي.
د «افغان ژغورنې غورځنګ» غړو او لسګونو افغانانو د یکشنبې په ورځ «۱۳۹۷ کال د غبرګولي ۰۶» په کابل کې د ملګرو ملتونو د دفتر مخې ته د پاکستان د دغې پریکړې پرضد شعارونه ورکول او له افغانستان سرهيې د قبایلو سیمو د یو ځای کېدو غوښتنه کوله.
د مظاهرهکوونکو له ډلې میوند ارین د پریکړهلیک یوه برخه داسې ولوسته:
"د محکوم وطن افغانانو لپاره قبایلي کارتونه بسنه نهکوي او باید ورته تذکرې ورکړل شي او په تذکرو کې دې ولایت ورته پښتونستان ولیکل شي، د افغانستان اوسنۍ نقشه دې د لوی افغانستان نقشه شي او د پښتونستان مسئله دې په اساسي قانون کې هم ولیکل شي، افغان دولت باید په ملي شورا کې د پښتونخوا خلکو ته څوکۍ هم ورکړي."
د اعتراض کوونکو یوه بله غوښتنه دا وه چې د افغانستان د پوهنې وزارت باید د قبایلو سیمو د ښې پیژندګلوۍ په هدف د پوهنې په نصاب کې مطالب او مضامین ځای پرځای کړي.
دا پهداسې حال کې ده چې د پاکستان پارلمان د پنجشنبې په ورځ په خېبر پښتونخوا کې د قبایلي سیمو د ادغامېدو مصوبه توصیب کړه او د جمعې په ورځ بیا د هغه هېواد سنا مجلس هم پرې د تأیید مهر ولګاوه.
د راپورونو له مخې په قبایلي سیمو کې شاوخوا ۵ میلیونه وګړي ژوند کوي.
ټاکل شوې چې دا مصوبه د خېبر پښتونخوا د ایالتي اسمبلې تر تأیید وروسته د توشیح لپاره د پاکستان جمهور رئیس ممنون حسین ته وسپارل شي.
افغان حکومت د شنبې په ورځ د یوې اعلامیې په خپرولو سره د پاکستان د پارلمان د وروستۍ پریکړې په اړه ویلي دي:
"د پاکستان پارلمان پهداسې شرایطو کې خېبر پښتونخوا ایالت سره د قبایلي سیمو د یوځای کېدو پرېکړه کړې ده چې پهدغو سیمو پوځي وضعیت حاکم دی."
په اعلامیه کې راغلي چي د قبایلو سیمو په اړه هره پرېکړه باید په ارام وضعیت کې د ځايي خلکو د ولسي اجماع په رڼا کې وشي.
په ورته وخت کې د افغانستان د سرحدونو، قومونو او قبایلو چارو وزارت د پاکستان دا اقدام یو اړخيز او نامشروع کار بللی او رد کړی یې دی.
له وزارت نه پهدې اړه په خپره شوې خبرپاڼه کې راغلي چې وزارت به خپل رسمي شکایت د اړوندو ادارو له لارې ملګرو ملتونو او نورو نړیوالو ادارو ته ورسوي.
لهدې سره د افغانستان مشرانو جرګې هم د یکشنبې د ورځې «۱۳۹۷ کال د غبرګولي ۰۶» په عمومي غونډه کې د پاکستان د پارلمان د وروستۍ پریکړې په اړه تُند غبرګون وښود.
د دغې جرګې مرستیال محمد عالم ایزدیار وايي:
"موږ تمه لرو چې افغان حکومت به د هغو اسنادو له مخې چې د بریتانوي هند او د وخت افغان حکومت له پریکړو څخهيې په لاس کې لري، سره سم عمل وکړي، دوی باید دا اسناد ارایه کړي او په اړهيې له پاکستان سره خبرې وکړي."
ښاغلي ایزدیار ټینګار وکړ چې افغان دولت باید د پاکستان د هر ډول ناوړه استفادو مخه ونیسي.
د مشرانو جرګې په عمومي غونډه کې یو شمېر نورو سناتورانو هم وویل، افغان حکومت ته ښايي چې د اسنادو پر بنسټ د پاکستان د پارلمان دغه پریکړه رد کړي.
راپور: یوسفخان ځدراڼ