د افغانستان د سولې عالي شورا د ترکمنستان او چین لهخوا د افغانستان د سولې په پروسه کې د منځګړیتوب او بېپرې همکارۍ د پېشنهاد هرکلی کړی دی.
د سولې عالي شورا مرستیال عزیز الله دین محمد وايي، ترکمنستان او چین هغو خطرونو ته په پام سره چې خپلو پولو ته نږدې يې له ترورېزم احساسوي، کولای شي چې د افغانستان د سولې په پروسه کې ګټور رول ولوبوي.
ښاغلي دین محمد تېره شپه ازادي راډیو ته وویل، د افغان حکومت او طالبانو ترمنځ د سولې د خبرو لپاره د داسې هېوادونو منځګړیتوب مهم او ګټور دی چې خپله اجنډا ونهلري او چین او ترکمنستان هم هغه هېوادونه دي چې پهدې برخه کې بېطرفه رول لوبولی شي.
نوموړی وايي:
"زه باور لرم چې دا خلک کولای شي همکاري وکړي. دوی کولای شي چې د دواړو خواوو ترمنځ ناستې ته زمینه برابره کړي. د دې لپاره داسې هېواد په کار دی چې خپله اجنډا ونهلري او یوازې له افغانستان سره د همکارۍ یا په سیمه کې د امنیت او هم د خپلو ګټو لپاره کوربهتوب وکړي."
د ترکمنستان ولسمشر قربان قلي بردي محمداف د دوشنبې په ورځ له ازبکستانه د خپلې کتنې په ترڅ کې ویلي چې هېواد يې چمتو دی د افغان حکومت او طالبانو ترمنځ بېطرفه منځګړیتوب وکړي.
نوموړي ویلي دي چې ترکمنستان او ازبکستان د افغانستان سوله او ثبات د ځان او ټولې سیمې په ګټه بولي.
دغهراز د چین د دفاع وزیر وي فینګ پرون سې شنبې په پیکېنګ کې د شانګهای سازمان د دفاع د وزیرانو په غونډه کې وویل چې چین چمتو دی د یوه بېطرفه لوري په توګه د افغان حکومت او طالبانو ترمنځ منځګړیتوب وکړي.
د افغانستان د سولې عالي شورا ویاند احسان طاهري ازادي راډیو ته وویل، دوی د نړۍ په هر ګوټ کې چې طالبان وغواړي، ورسره د سولې د خبرو پیلولو ته چمتو دي.
د ښاغلي طاهري په خبره د افغانستان د سولې په پروسه کې د کوربهتوب لپاره د چین او ترکمنستان وړاندیزونه د هغې سیمهيیزې اجماع برخه ده چې افغان حکومتيې له ځانه سره لري.
چین او ترکمنستان پهداسې وخت کې د افغان حکومت او طالبانو ترمنځ د سولې د خبرو د برابرولو او بېپرې منځګړیتوب پېشنهاد کړی دی چې طالبانو تر اوسه د افغان حکومت د سولې وروستي وړاندیز ته چې ولسمشر محمد اشرف غني د کابل پروسې په دوهمه غونډه کې وکړ، رسمي ځواب نهدی ویلی.
