د افغانستان د انتخاباتو خپلواک کمېسیون یو چارواکی وایي، د انتخاباتو زماني جدول نن تر غرمې مخکې په رسمي ډول اعلانېږي.
د دغه کمېسیون یوه غړي سید حفیظالله هاشمي تېر ماښام ازادي راډیو ته وویل چې دغه زماني جدول د ولسي جرګې او ولسوالیو شوراګانو د انتخاباتو د بهیر په اړه جزئیات تشریح کوي.
هاشمي زیاته کړه :
"څو تاریخونه مشخص دي چې په کومو نېټو نوماندان خپل نومونه لیکي، د شکایتونو د ثبتولو ورځې کومې دي، لومړني او وروستي نتایج څه وخت اعلانېږي، دا ټول هغه جزئیات دي چې پهدې بهیر پورې اړه لري چې په مفصل ډول به نن پر نهه نیمو بجو اعلان شي."
د انتخاباتو د رأی ورکوونکو د نوم لیکنې بهیر د حمل میاشتې پر ۲۵مې په ټول افغانستان کې پیل شو.
ښاغلي هاشمي وویل، تر اوسه د ۳۴ ولایتونو په مرکزونو کې څه باندې ۲۰۰ زرو کسانو نومونه لیکلي چې په وروستیو څو ورځو کې تر ټولو لوی شمېر په کابل او تر ټولو لږ شمېر په میدان وردک کې ثبت شوي دي.
په همدې حال کې د افغان حکومت اجرائیه رئیس عبدالله عبدالله تېره ورځ د وزیرانو شورا په فوقالعاده غونډه کې وویل چې د رأی ورکوونکو د نوم لیکنې په برخه کې عامه پوهاوی لږ وو.
ښاغلي عبدالله د خپلو خبرو په یوه برخه کې وویل:
"څلور ټاکنې د همدې بهیر په بریالیتوب پورې تړلې دي. که خدای مهکړه دا بهیر کامیاب نهشي، وروسته به د هېواد سیاسي وضعیت له ناخوالو سره مخامخ شي."
دغو اندېښنو ته د انتخاباتو د کمېسیون غړي په ځواب کې وویل چې په لومړي سر کې کمېسیون هم د لږ کسانو د نوم لیکنې په اړه اندېښنه درلوده، خو وایي؛ وروسته دا شمېره لوړه شوه.
د سید حفیظالله هاشمي په خبره سره لهدې چې خلک له ناامنیو څخه اندېښمن دي، پر دې بهیر یې باور تر یوه حده کم شوی، خو هیله یې وښوده چې د انتخاباتو د بهیر د زماني جدول په اعلانولو سره به دغه شمېرې نوري هم لوړې شي.
د افغاستان د انتخاباتو خپلواک کمېسیون د میزان میاشتې ۲۸مه نېټه د ولسي جرګې او ولسوالیو شوراګانو د انتخاباتو لپاره ټاکلې ده.
