د روسيې ولسمشر ولادیمیر پوتین وايي، له خپل ترکي سیال رجب طیب اردوغان سرهيې موافقه کړې چې انقرې ته به د «S-۴۰۰» ډوله میزایلو ضد سیستم د ورکولو چارې چټکې کړي.
ناټو تړون چې د ترکيې متحد دی، انقرې ته د روسيې ساخت «S-۴۰۰» میزایلو ضد سیستم د ورکولو له امله اندېښنه لري.
ولسمشر پوتین له اردوغان سره تر خبرو وروسته خبریالانو ته وویل، موږ پرېکړه وکړه چې ترکيې ته د «S-۴۰۰» میزایلو د ورکولو مهالوېش چټک کړو.
دی وايي:
"موږ د روسيې او ترکيې ترمنځ د پوځي ټکنالوژۍ په برخه کې د همکاریو د پړاو په ځانګړي ډول ترکيې ته د «S-۴۰۰» ورکولو د قرارداد د نهايي کولو په اړه خبرې وکړې."
که څه هم پوتین ترکيې ته د «S-۴۰۰» میزایلو ضد سیستم د ورکولو دقیقه نېټه یاده نهکړه، خو تر دې مخکې ویل شوي چې ترکیه به د ۲۰۱۹ میلادي کال تر پایه او یا د ۲۰۲۰ میلادي کال په لومړیو کې دا سیستم ترلاسه کړي.
د ترکيې ولسمشر انقرې ته په چټکۍ سره د «S-۴۰۰» میزایلو ضد سیستم د ورکولو موضوع ته په اشارې وویل، موږ دا موضوع درک کړې ده.
تر دې مخکې ولسمشر پوتین او جمهور رئیس اردوغان په ترکیه کې د لومړنۍ اټمي بټۍ د جوړولو کار رسماً افتتاح کړ.
پوتین او اردوغان د دې اټمي بټۍ د پرانیستلو مراسم د وېډیو کنفرانس له لارې وکتل.
دا اټمي بټۍ د ۲۰ میلیارده ډالرو په لګښت د ترکيې په جنوب کې جوړېږي.
په همدې حال کې ټاکل شوې ده چې د ایران ولسمشر حسن روحاني هم نن چهارشنبه انقرې ته لاړ شي او له ترکي او روسي مشرانو سره د سوريې د جګړې په ګډون پر یو شمېر مسئلو درې اړخیزه غونډه وکړي.
