د ملګرو ملتونو د اټومي انرژۍ مشر رافایل ګروسي نن تهران ته ورسېد.

ټاکل شوې چې ګروسي د ایران د اټومي پروګرام په اړه له ایراني چارواکو سره وګوری او یوه خبري کانفرانس کې وینا وکړي.

دغه سفر داسې مهال ترسره کېږي چې په سیمه کې وضعیت په لوړه کچه کړکېچن دی او د ملګرو ملتونو د اټومي انرژۍ اداره نیوکه کوي چې ایران د دوی له پلټنو سره همکاري نه کوي.

ټاکل شوې چې ګروسي د ایران د بهرنیو چارو له وزیر حسین امیر عبداللهیان او د اټومي انرژۍ له مشر محمد اسماعیلي سره وګوري.

د ایران په مرکزي ښار اصفهان کې یوې محکمې ایرانی فعال محمود محرابي په ټولنیزو رسنیو کې د یوې لیکنې له امله په اعدام محکوم کړی دی.

د ازادي راډيو ایراني څانګې راډیو فردا د راپور له مخې، محرابي د ۲۰۲۳م کال په فبرورۍ کې نیول شوی او تېرې شپږ میاشتې یې هغه زندان کې تېرې کړي چې خطرناک مجرمان په کې ساتل کېږي.

که څه هم معلومه نه ده چې محرابي په مشخص ډول په ټولنیزو رسنیو څه ډول لیکنه کړې وه، خو هغه پر ټولنیزو رسنیو خلک مظاهرو ته رابللي وو، هغه مظاهرې چې ایران کې د اجباري حجاب د قانون په ضد ترسره شوې.

دغه فعال د جعلي خبرونو د خپرولو او په "ځمکه کې د فساد" په جرم محکوم دی، دا هغه تور دی چې ایران کې قاتلینو، د نشه یي توکو قاچاق وړونکو او د لوی مالي فساد عاملانو ته اورول کېږي.

د محرابي مدافع وکیل ویلي، د پرونۍ محکمې په جریان کې ستونزې وې او هیله یې ښودلې چې ستره محکمه به پام ورته وکړي.

د بلوچستان ایالت په چمن کې نن په درېیمه ورځ هم د اعتراضونو لړۍ روانه ده.

دې معترضانو له درېیو ورځو راهیسې د کوټې او چمن ترمنځ لوی سړک بند کړی دی.

دوی خبرداری ورکړی چې ترڅو یې غوښتنې ونه منل شي د کوټې چمن لویه لاره به خلاصه نه کړي.

په چمن کې روان پرلت د ۲۰۲۳م کال له اکټوبر میاشتې راهیسې پیل شوی او ګډونوال یې غوښتنه لري چې افغانستان ته د تګ راتګ لپاره باید د ویزې او پاسپورت د لرلو شرط لیرې شي، خو د پاکستان حکومت یې نه مني.

دا پرلت تېره اوونۍ وروسته له هغه په تشدد واوښت چې د ګډونوالو په وینا ملېشه ځواکونو د دوی پر کمپ برید وکړ، یو تن یې په ډزو وواژه او له لسو زیات نور یې ټپيان کړل.

پرلتوالو لومړی دا مړی د احتجاج لپاره د مرستیال کمېشنر د دفتر مخې ته ایښې وو، خو پرون یې بیا خاورو ته وسپاره.

ملېشه ځواک وايي چې پر پرلتوالو یې ډزې نه دي کړي.

د فرانسې ولسمشر امانویل مکرون او د اروپایي کمېسیون مشرې اورسلا فون دیرلاین د چین له ولسمشر شي جین پینګ څخه وغوښتل چې د اوکراین په جګړه کې پر روسیې له خپل نفوذه کار واخلي.

د رویټرز خبري اژانس د راپور له مخې له تېرو پنځو کلونو راهیسې دا لومړی ځل دی چې د چین ولسمشر د اروپا په سفر وتلی او نوموړی پرون پاریس ته رسېدلی دی.

د ارروپایي کمېسیون مشرې میرمن فون دیرلاین ویلي، له چین سره د اروپا اړیکې خورا پیچلې، خو مهمې دي.

د چین ولسمشر داسې مهال د اروپا سفر پیل کړی چې د اروپایي ټولنې او چین ترمنځ پر یو شمېر سوداګریو موضوعاتو لانجې روانې دي.

یو شمېر چینایي رسنیو لیکلي، چین غواړي له اروپايي ټولنې سره اړيکې او همغږي پياوړې، همکارۍ پراخه او شته ستونزې د خبرو له لارې هوارې کړي.

د اوکراین د دفاع وزارت د استخباراتو عمومي ریاست ویلي، د مسکو تر ولکې لاندې بردیانسک سیمه کې د روسیې هغه چارواکی " له منځه وړل شوی" چې د اوکرایني زندانیانو په شکنجې تورن و.

د اوکراین دفاع وزارت که څه هم په مستقیم ډول د دغې وژنې مسوولیت نه دی اخیستی، خو ویلې يې دي چې یفګیني انانیفسکي په هغې چاودنه کې وژل شوی چې پرون یکشنبه یې پر موټر شوې ده.

بل لور ته د روسیې د څېړنو کمېټې په یوه بیان کې ویلي چې بردیانسک سیمه کې یې یو محلي چارواکی د موټر په چاودنه کې وژل شوی، خو دوی د دغه کس نوم نه دی یاد کړی.

د پېښې د څرنګوالي نور جزییات لا نه دي خپاره شوي.

په تبعید کې د افغان خبریالانو فدراسیون یوځل بیا په افغانستان کې د دوی په ټکو د طالبانو د استخباراتو له‌خوا د خبریالانو پر نیولو اندېښنه ښودلې ده.

دغه فدراسیون پرون ناوخته په یوه خبرپاڼه کې ویلي چې طالبانو وړمه ورځ په پروان کې د ملي تلوېزیون خبریال ندا محمد نوري نیولی دی.

خبرپاڼه کې راغلي چې د طالبانو چارواکي د دغه خبریال نیول نه تاییدوي او د خبرپاڼې په ټکو همکاران یې هم له ویرې پټه خوله دي.

دغه فدراسیون ویلي چې د طالبانو حکومت په دې کار سره غواړي چې د بیان ازادي محدوده کړي.

په پروان کې د ملي تلوېزیون د خبریال ترڅنګ دغه فدراسیون د یو شمېر نورو خبریالانو یادونه هم کړې چې په دې وروستیو کې طالبانو نیولي او توقیف کړي یې دي.

ټاکل شوې د حماس له منګولو، د یرغمل شویو د خلاصون په بدل کې، په غزه کې د اوربند د احتمالي ټینګښت پر سر نن دوشنبه خبرې بیا پیل شي.

دا په داسې حال کې ده چې د فرانسې خبري اژانس د راپور له مخې، د اسراییل او حماس ډلې ترمنځ په غزه کې د اووه میاشتنۍ جګړې د ختمېدو لپاره اختلافات زیات شوي دي.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

یوې باخبره سرچینې د فرانسې خبري اژانس ته ویلي چې ټاکل شوې نن په قطر کې دغه مذاکرې دوام ومومي، هغه ځای چې د امریکا د مرکزي استخباراتو د ادارې یا (CIA) مشر ویلییم برنز او د قطر صدراعظم محمد بن عبدالرحمن بن جاسم آل‌ثاني د منځګړیتوب پر هڅو خبرې کوي.

د فلسطینیانو د افراطي ډلې حماس پوځي څانګې پرون د کرم شالون پر سرحدي دروازې د حملې مسوولیت ومانه.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

اسراییل وايي، په دې حمله کې یې درې سرتېري وژل شوي دي.

د اسراییل د پوځ په وینا لس توغندي د غزې په جنوب کې له رفح د دې سرحدي دروازې پر لوري توغول شوي دي.

د اسراییل په وینا، دغه سرحدي دروازه د مرستو د هغو لاریو پرمخ چې کلابندې شوې غزې ته روانې وې، وتړل شوه.

نورې سرحدي دروازې لا خلاصې دي.

د حماس ډلې پوځي څانګه وايي، سرحدي دروازې ته څېرمه یې د اسراییل د پوځ پر یوه پوځي اډه توغندي ویشتلي، خو دا یې نه دي تایید کړي چې دا توغندي له کومه ځایه توغول شوي دي.

د حماس رسنیو د هغې سرچینې په وینا چې له دې ډلې سره نږدې اړیکې لري راپور ورکړی چې ویلي یې دي، د حملې هدف دغه تجارتي دروازه نه وه.

تمه ده چې د پیسو نړیوال صندوق یا "آی‌ایم‌ایف" یو پلاوی روانه میاشت پاکستان ته سفر وکړي څو د دغه هېواد له چارواکو سره د نوي پروګرام په اړه خبرې وکړي.

دغه سازمان پرون د مې ۵مه اسلام اباد ته د خپل پلاوي د سفر په اړه اعلان وکړ چې پاکستان د راتلونکي مالي کال د بودیجې په اړه بحثونه پیل کړي دي.

تېره میاشت، پاکستان په چارو کې د حکومت د پاتې راتلو د مخنیوي لپاره د ۳ میلیارد ډالرو لنډمهاله پروګرام بشپړ کړ.

خو د پاکستان د صدراعظم شهباز شریف حکومت د یوه نوي او اوږدمهاله پلان پر اړتیا ټینګار کړی دی.

د پیسو نړیوال صندوق پرون رویټرز ته په یوه ایمیل کې وویل چې تمه کېږي یو پلاوی یې همدا مې میاشت پاکستان ته سفر وکړي ترڅو د ټولو پاکستانيانو د هوساینې په هدف د ۲۰۲۵م مالي کال بودیجې، پالیسیو او اصلاحاتو په اړه خبرې وکړي.

خبري آژانسونو د بیت المقدس په ختیځ کې د الجزیرې تلوېزیون په دفتر د اسراییلي ځواکونو د حملې خبر ورکړ.

څو خبري آژانسونو د اسراییلي رسنیو په حواله ویلي دي چې اسراییلي ځواکونو تېر ماښام د مې۵مه د الجزیرې تلوېزیون پر دفتر برید وکړ او تجهیزات یې ضبط کړل.

د اسراییلو صدراعظم بنیامین نتنیاهو پرون اعلان وکړ چې د هغه هېواد د کابینې د پرېکړې پر اساس، په ټول اسراییل کې د الجزیرې تلوېزیوني چینل بند شوی دی.

اسراییلو د الجزیرې تلوېزیون چې مرکز یې د قطر په پلازمېنه دوحه کې دی، د امریکا او اروپايي ټولنې له‌خوا ترهګر ګڼل شوې ډلې حماس، په ګټه د یو اړخیزو پروګرامونو په خپرولو تورن کړی دی.

خو الجزیرې د اسراییلو دغه عمل غندلی او د دغه هېواد له لوري لګېدلي تورونه یې رد کړي دي.