د افغانستان دفاع وزارت دغه هېواد ته د تازه دمو جرمني سرتېرو استول یوه کلیدي او مهمه موضوع ګڼي.
د دغه وزارت ویاند جنرال دولت وزیري تېر ماښام له ازادي راډیو سره په خبرو کې وویل چې تمه لري، دغه سرتېري د افغان ځواکونو د روزنې او ملاتړ په برخه کې له ډېر دقته کار واخلي.
وزیري وايي:
"د افغانستان په شمال کې موږ د ۲۰۹ شاهین قول اردو، د پامیر فرقه او د انجنیري ښوونځی لرو. موږ هلته د روزنې، پلان جوړونې او د مشورو لپاره ضرورت لرو. جرمني پهدې برخه کې زموږ سره مرسته کوي او موږ اړتیا ورته لرو."
روانه اوونۍ د جرمني دوه لوړپوړي چارواکي یو په بل پسې افغانستان ته ولاړل.
د جرمني دفاع وزیرې اورزولا فن در لاین "Ursula von der Leyen" د دوشنبې په ورځ «۱۳۹۶ کال د لیندۍ ۲۷» د افغانستان په شمال کې مزار شریف ښار ته سفر وکړ او دغه هېواد تهیې د نورو جرمني ځواکونو د استولو خبر ورکړ.
خو نوموړي د دغو اضافي سرتېرو د شمېر او د استولو د وخت په اړه څه ونهویل.
د جرمني د بهرنیو چارو وزیر زیګمار ګابریل "Sigmar Gabriel" بیا د چهارشنبې په ورځ «۱۳۹۶ کال د لیندۍ ۲۹» کابل ته په خپل ناڅاپي سفر کې وویل چې افغانستان ته د خپلو نورو سرتېرو د استولو طرفدار او دې هېواد کې د جرمني ځواکونو ډېرول معقول کار دی.
د جرمني د دفاع او بهرنیو چارو وزیرانو دا پیغامونه احتمالاً هم د افغان چارواکو او هم د هغوی د نړیوالو متحدینو لپاره د پام وړ دي.
د امریکا متحده ایالاتو له نړیوالې ټولنې غوښتي چې افغانستان ته نور سرتېري ولېږي.
د ناټو عمومي منشي په دې وروستیو کې د بلجیم په پلازمېنه بروکسل کې ویلي چې په افغانستان کې د نړیوالې ټولنې د ځواکونو د شمېر ډېرېدل د ناټو لپاره یوه اساسي موضوع ده.
د راپورونو له مخې دا مهال ۱۷ زره نړیوال ځواکونه په افغانستان کې دېره دي.
پهدې کې ۹۸۰ تنهیې جرمني سرتېري دي.
تر دې وړاندې نهیوازې دغه سرتېري بلکې په افغانستان کې د جرمني ملکي تأسیسات هم له خطرونو سره مخامخ شوي دي.
د روان میلادي کال په مې میاشت کې د کابل په وزیر اکبر خان سیمه کې د جرمني سفارت ته نږدې تر یوې خونړۍ چاودنې وروسته د دغه سفارت فعالیت بند شو.
د افغانستان د جمهوري ریاست څخه په یوه خبرپاڼه کې راغلي چې افغان ولسمشر اشرف غني ګابریل ته ډاډ ورکړی چې په افغانستان کې د جرمني د سفارت او ډیپلوماتانو د امنیت ټینګښت لپاره اړین تدابیر نیول شوي دي.
په کابل کې د مې د میاشتې تر برید دمخه شااوخوا ۱۰۰ تنو په کابل کې د جرمني په سفارت کې کار کاوه.
پهدې برید کې د افغان چارواکو په خبره شااوخوا ۹۰ تنه ووژل شول او ۴۶۰ نور ټپیان شول.
