فرانس پرس خبري اژانس د افغان او بهرنیو چارواکو په حواله خبر ورکړی چې یو شمېر فرانسوي او الجزایري وسلهوال چې په سوریه کې د داعش د وسلهوالو په ملاتړ جنګېدل، افغانستان ته تللي دي.
د فرانس پرس په حواله، دا وسلهوال د افغانستان په شمالي سیمو کې له داعش سره یوځای شوي دي.
دا اول وار دی چې په افغانستان کې د داعش د فرانسوي وسلهوالو د حضور خبر خپور شوی دی.
د فرانسې خبري اژانس د یو شمېر څارونکو په حواله ویلي چې داعش په عراق او سوریه کې ماته خوړلې، نو ښايي یو شمېر وسلهواليې له منځني ختيځه تښتېدلي او د افغانستان لور تهیې مخه کړې وي.
د جوزجان ولایت د درزاب ولسوالۍ ولسوال باز محمد داور فرانس پرس ته ویلي چې د داعش یو شمېر فرانسوي او الجزایري وسلهوال په نومبر میاشت کې هغه ولایت ته ورغلي دي.
داور زیاته کړې چې په ورغلو کسانو کې ښځې هم شته او وسلهوال له تاجکستانه د افغانستان خاورې ته وراوښتي دي.
د درزاب د ولسوال په وینا، په ورغلو وسلهوالو کې د چچنیا او ازبکستان وګړي هم دي.
د درزاب د ولسوال په وینا، د داعش فرانسوي او الجزایري وسلهوال چې ښايي په عراق او سوریه کې جنګېدل، غالباً په افغانستان او پاکستان کې له اسلامي دولت نومې شبکې سره چې ځان ته د خراسان دولت وايي، یوځای شوي دي.
نېکلسن ویلي چې د داعش ډلې ریښې به وایستل شي.
د جوزجان د والي ویاند محمد رضا غفوري فرانس پرس ته ویلي، داسې ښځې او نارینه چې په فرانسوي ژبه خبرې کوي، په هغه ولایت کې لیدل شوي او په درزاب ولسوالۍ کې د داعش وسلهوالو ته روزنه ورکوي.
د جوزجان د والي ویاند فرانس پرس ته ویلي چې داسې راپورونه ورته رسېدلي چې له ورغلو کسانو سره کوچنیان هم شته چې شمېر یې ښايي د ۵۰ په شااوخوا کې وي.
د درزاب ولسوال هم له فرانس پرس سره په خبرو کې څرګنده کړې چې لږ تر لږه ۲۰۰ وسلهوالو چې بهرنیان پهکې دي، د بي بي مریم په کلي کې یې کمپ جوړ کړی دی.
د سیمې یوه اوسېدونکي چې نومیې نهدی اخیستل شوی، د فرانسې خبري اژانس ته څرګنده کړې چې هغه بهرني وسلهوال چې سیمې ته ورغلي، ځوانان دي، لوړې ونې او سپین پوستکي لري، د مختلفو هېوادونو خلک دي، له چا سره خبرې نهکوي او سرحدي سیمو ته په تګ-راتګ کې دي.
د فرانس پرس په حواله، یو شمېر اروپايي سرچینو باور څرګند کړی چې وسلهوال کسان د تاجکستان له لارې افغانستان ته ځي.
د فرانسې خبري اژانس وايي، یوه فرانسوي وګړي چې د جولای په میاشت کې نیول شوی و، منلې وه چې غوښتليې په افغانستان کې د داعش له وسلهوالو سره یوځای شي.
د افغانستان امنیتي ادارو په شمالي ولایتونو کې د داعش د الجزایري او فرانسوي وسلهوالو د حضور په اړه خبرې نهدي کړي.
په افغانستان کې د ناټو او امریکايي ځواکونو قوماندان جنرال جان نېکلسن ویلي چې د داعش ډلې ریښې به وایستل شي.
