د افغانستان په ځینو سیمو کې د داعش ډلې د شتون خبرې نوې نهدي، خو اوس د جوزجان ولایت چارواکي، د یو شمېر بهرنیو او په تېره د اروپايي هېوادونو د اتباعو لهخوا، د داعش د غړو د روزلو خبره کوي او په وړاندې یې اندېښنې ښيي.
د دغه ولایت د والي ویاند محمد رضا غفوري د دوشنبې په ورځ «۱۳۹۶ د لړم ۲۲» ازادي راډیو ته ادعا وکړه، د فرانسویانو، چچینیانو، پاکستانیانو، عربو او ازبکو په ګډون ځیني بهرني اتباع، په دغه ولایت کې د داعش ډلې غړي روزي.
ښاغلی غفوري وايي، دغه مسئلهیې څو ځلې له امنیتي مسؤلینو سره شریکه کړې، خو تر اوسهيې د ځپلو لپاره جدي اقدام نهدی شوی.
دی وايي:
"په داعش ډله کې فرانسویان او ځیني نور بهرنیان شته چې د دغې ډلې د غړو د روزلو مسؤلیت لري. پاکستانیان او چچینیان هم پهکې دي. موږ یې تائیدوو چې بهرنیان شته، د دوی شااوخوا ۳۵ کسان دي او له کورنیو سره دلته راغلي دي."
سربېره پر دې د درزاب پخواني ولسوال رحمتالله حشر ازادي راډیو ته ادعا وکړه، دغه بهرني اتباع د سیمې زلمکي چې عمرونهیې د ۱۳ او ۱۷ کلونو ترمنځ دي، د ځان وژونکو حملو او د ماینونو د ځای پر ځای کولو لپاره روزي.
ښاغلي حشر وویل، د دغو بهرنیو موجودیت د سیمې اوسېدونکي اندېښمن کړي او له حکومته غواړي چې د ځپلو لپارهیې جدي اقدام وکړي، که نه نو په خبرهیې د داعش د ډلې فعالیتونه به د یاد ولایت نورو ولسوالیو ته هم وغځېږي.
حشر زیاتوي:
"له څو میاشتو راهیسې د بهرنیو اتباعو فعالیتونه شته. په دغو بهرنیانو کې پاکستانيان، عربان، سوډانيان، عراقيان، فرانسويان او داسې نور موجود دي او د یو لړ تحرکاتو لپاره په روزلو بوخت دي."
دغو چارواکو د خپلو ادعاوو په اړه ازادي راډيو ته شواهد او اسناد وړاندې نهکړل.
د جوزجان ولایت د مسؤلینو په خبره، داعش ډله له دوو کلونو راهیسې، د دغه ولایت په درزاب او قوشتپه ولسوالیو کې فعاله ده.
دا خبرې په داسې حال کې کېږي چې د داعش د ډلې فعالتیونه د هېواد له ختیځو سیمو نه د هېواد شمال او په تېره جوزجان ولایت ته ورسېدل.
پخوا تر دې د ولسي جرګې ځینو غړو په ننګرهار، کونړ او نورستان ولایتونو کې د داعش ډلې پر فعالتیونو اندېښنې ښودلې دي.
- خو پوښتنه دا ده چې امنیتي ارګانونه تر اوسه ولې نهدي توانېدلي ترڅو د داعش ډلې او د بهرنیو اتباعو پر ضد چې د دغې ډلې غړي روزي، اقدام وکړي؟
د دفاع وزارت د ویاند مرستیال محمد رادمنشیې ځوابوي:
"په شمال کې مو پراخ عملیات پلان کړي، د دغو عملیاتو په پلي کېدو سره به پخوانی وضعیت تکرار نهشي او دغه ډلې به وځپو. موږ باید لومړی زمینې برابر کړو او بیا پر هغو ځایونو چې مخالفین پهکې دي، ګوزار وکړو."
په ورته وخت کې د پوځي چارو ځیني پوهان، په هېواد کې د داعش ډلې فعالیتونه او د ځینو بهرنیو اتباعو لهخوا د یادې ډلې د غړو روزل، د هېواد د امنیت لپاره ستر ګواښ ګڼي.
د دغو کارپوهانو له ډلې پخوانی جنرال، حي ګل سلیمانخېل ازادي راډیو ته وویل، امنیتي ځواکونه باید د هوا او ځمکې له لارې دغه ډله وځپي، ځکه د ده په خبره که داسې ونهشي، په شمالي ولایتونو کې به د داعش ډلې فعالیتونه نور هم پراخ شي.
راپور: خان محمد سیند
